sirivennela songs | అలాంటి పాట‌ల‌ను రాయ‌లేను : సిరివెన్నెల‌

November 30, 2021 / 07:37 PM IST

Sirivennela Seetharama Sastry songs | సిరివెన్నెల సీతారామ‌శాస్త్రి — Sirivennela Seetharama Sastry

sirivennela songs | విధాత త‌ల‌పున ప్ర‌భ‌వించిన‌ది అనాది జీవ‌న వేదం అంటూ మొద‌లైన త‌న‌ ప్ర‌యాణంలో ఎన్నో ఆణిముత్యాల‌ను అందించారు సిరివెన్నెల సీతారామ‌శాస్త్రి. ఆది భిక్షువు వాడినేమి కోరేదీ, బూడిదిచ్చే వాడినేమి అడిగేదీ.. అంటూ భ‌క్తిభావం క‌లిగించాడు. అర్ధ‌శ‌తాబ్ద‌పు అజ్ఞాన్ని స్వ‌తంత్రం అందామా అంటూ.. అగ్నిజ్వాల‌ల‌ను ర‌గ‌లించే పాట‌లను రాశారు. తెల్లారింది లెగండొయ్ అంటూ స్ఫూర్తిని నింపారు. సామ‌జ‌వ‌ర‌గ‌మ‌నా.. నిను చూసి ఆగ గ‌ల‌నా అంటూ ప్రేమ‌గీతాల‌ను రాశారు. కేవ‌లం ఒక్క జోన‌ర్‌కు అని ప‌రిమితం కాకుండా స‌ర‌సం, శృంగారం, వేద‌న‌, ఆలోచ‌న‌.. ఇలా క‌విత్వంలో ఎన్ని విభాగాలు ఉంటే అన్నింటిలోనూ పాట‌ల‌ను రాసి తెలుగు ప్రేక్ష‌కుల గుండెల్లో చెర‌గ‌ని స్థానాన్ని సంపాదించుకున్నారు. దాదాపు మూడు దశాబ్దాల సినీ కెరీర్‌లో 3వేల‌కు పైగా పాట‌లు రాసిన సిరివెన్నెల‌కు కొన్ని ర‌కాల పాట‌లు రాయ‌డం అస్స‌లు న‌చ్చ‌ద‌ట‌. ఎంత డ‌బ్బు ఇచ్చిన స‌రే అలాంటి పాట‌లు రాసేవాడు కాదంట‌. ఈ విష‌యాన్ని సిరివెన్నెల‌నే స్వయంగా ఒక ఇంట‌ర్వ్యూలో చెప్పుకొచ్చాడు.

హీరో, హీరోయిన్ ఇంట్ర‌డ‌క్ష‌న్ పాట‌ల‌ను రాయ‌డం త‌న‌కు ఇబ్బందిగా ఉంటుంద‌ని సిరివెన్నెల సీతారామ‌శాస్త్రి ఒక సంద‌ర్భంలో తెలిపారు. అందుకే సంఘ‌ట‌న‌లు, వ్య‌క్తులు, ప్ర‌దేశాల‌పై త‌న‌ను పాట‌ల‌ను రాయ‌మ‌ని చెప్పొద్ద‌ని త‌న డైరెక్ట‌ర్లు, నిర్మాత‌ల‌కు చెప్పేవాడిన‌ని చెప్పారు. త‌న అనుభూతుల్ని మాత్ర‌మే పాట‌లుగా రాసేవాడిన‌ని అన్నారు. క‌ఠిన‌మైన పాట రాసేంత భాష త‌న‌కు రాద‌న్నారు. త‌న‌కు అష్ట‌యిశ్వ‌ర్యాల కంటే వ్య‌క్తిత్వ‌మే ముఖ్య‌మ‌ని చెప్పుకొచ్చారు. ఇది నా పాట అని ప్ర‌తి ప్రేక్ష‌కుడు అనుకునేలా త‌న పాట‌లు ఉండాల‌ని అనుకుంటాన‌ని చెప్పాడు. త‌న పాట‌ల్లో ఎట్టి ప‌రిస్థితుల్లోనూ స్త్రీని కించ‌ప‌ర‌చ‌న‌ని స్ప‌ష్టం చేశారు. సినిమాలో ఆ పాత్ర ఎలాంటిది అయినా స‌రే అవ‌మానిస్తూ రాయడం త‌న‌కు ఇష్టం ఉండ‌ద‌న్నారు. శృంగార ర‌చ‌న‌లు చేస్తాను కానీ.. అవి కుటుంబ‌స‌భ్యుల‌తో విన‌గ‌లిగేలా మాత్ర‌మే ఉంటాయ‌న్నారు. అంతేత‌ప్ప అంగాంగ వ‌ర్ణ‌న‌లు మాత్రం చేయ‌న‌ని చెప్పుకొచ్చారు. అలాగే కుర్ర‌కారును రెచ్చ‌గొట్టే పాట‌లు అస్స‌లే రాయ‌న‌ని అన్నారు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి