Visit:
Ravi Teja | ఇటీవలి కాలంలో వరుస పరాజయాలతో ఇబ్బందులు ఎదుర్కొంటున్న మాస్ మ‌హ‌రాజా రవితేజ కు 2022లో వచ్చిన ధమాకా సినిమా భారీ విజయాన్ని అందించింది. త్రినాథరావు నక్కిన దర్శకత్వం వహించిన ఈ చిత్రంలో శ్రీలీల క‌థానాయిక‌గా న‌టించింది. ఈ మాస్ కామెడీ ఎంటర్‌టైనర్ బాక్సాఫీస్ వద్ద ఏకంగా ₹100 కోట్లకు పైగా గ్రాస్ సాధించి రవితేజ కెరీర్‌లోనే అతిపెద్ద హిట్‌గా నిలిచింది. భీమ్స్ సిసిరోలియో అందించిన ఎనర్జిటిక్ మ్యూజిక్, థియేటర్లలో ప్రేక్షకులను ఫుల్ ఎంట‌ర్‌టైన్ చేసింది.సాంగ్స్, రవితేజ–శ్రీలీల డ్యాన్స్, అలాగే త్రినాథరావు నక్కిన దర్శకత్వం అన్ని కూడా ధమాకా చిత్రం సూప‌ర్ హిట్ అయ్యేలా చేసింది.
ధమాకా బ్లాక్‌బస్టర్ అయ్యినప్పటి నుంచే దీనికి సీక్వెల్ వస్తుందన్న ఊహాగానాలు వినిపిస్తున్నాయి. ఇప్పుడు ఆ వార్తలు మరింత బలాన్ని సంతరించుకున్నాయి. టాలీవుడ్ వర్గాల సమాచారం ప్రకారం, పీపుల్ మీడియా ఫ్యాక్టరీ నిర్మాణ సంస్థ, ధమాకా సీక్వెల్ కోసం ‘డబుల్ ధమాకా’ అనే టైటిల్‌ను ఫిలిం ఛాంబర్‌లో రిజిస్టర్ చేసినట్టు తెలుస్తోంది. దీంతో సీక్వెల్ పనులు వేగం పందుకుంటున్నాయని స్పష్టమవుతోంది. త్రినాథరావు నక్కిన ఇటీవల సందీప్ కిషన్‌తో చేసిన మజాకా సినిమా ఆశించిన ఫలితాన్ని ఇవ్వ‌క‌పోవ‌డంతో ప్రస్తుతం ఆయన చేతిలో కొత్త ప్రాజెక్టులు లేవని తెలుస్తోంది. ఇదే సమయంలో రచయిత ప్రసన్న కుమార్‌తో కలిసి ‘డబుల్ ధమాకా’ స్క్రిప్ట్‌పై యాక్టివ్‌గా వర్క్ చేస్తున్నారని సమాచారం.
అంతేకాదు, రవితేజ–శ్రీలీల కాంబో మరొకసారి ప్రేక్షకులను అలరించబోతోందని టాలీవుడ్ వర్గాలు చెబుతున్నాయి. ఈసారి కూడా అదే మాస్ ఎనర్జీని రిపీట్ చేస్తారా అన్న ఆసక్తి అభిమానుల్లో ఎక్కువగా కనిపిస్తోంది. ధమాకా తర్వాత సరైన హిట్ కోసం ఎదురు చూస్తున్న రవితేజ, ఈ సీక్వెల్‌తో మరోసారి బాక్సాఫీస్ ద‌గ్గ‌ర సత్తా చాటుతాడనే నమ్మకం అభిమానుల్లో ఉంది. త్వరలోనే అధికారిక ప్రకటన వెలువడే అవకాశం ఉంది. ర‌వితేజ‌కి ఈ మ‌ధ్య స‌క్సెస్ అనేదే రావ‌డం లేదు. ఎంత క‌ష్ట‌ప‌డి సినిమా చేసిన కూడా ఆ చిత్రం బాక్సాఫీస్ ద‌గ్గ‌ర నిరాశ‌ప‌రుస్తుంది. మ‌రి ధమాకా సీక్వెల్ అయిన రవితేజ ఫ్యాన్స్‌కి మాంచి కిక్ ఇస్తుందా, దీనికి సంబంధించిన అధికారిక ప్రకటన ఎప్పుడు వ‌స్తుంది అనేది చూడాలి.
