Visit:
Jani Master | లైంగిక వేధింపులో అరెస్టయిన జానీ మాస్టర్‌ను ఐదురోజుల కస్టడీకి ఇవ్వాలని నార్సింగి పోలీసులు దాఖలు చేసిన పిటిషన్‌పై మంగళవారం రంగారెడ్డి కోర్టు విచారణ జరిపింది. ఇరువర్గాల వాదనలు విన్న కోర్టు తీర్పును బుధవారానికి వాయిదా వేసింది. మరో వైపు కేసులో తనకు బెయిల్‌ ఇవ్వాలంటూ జానీ దాఖలు చేసిన పిటిషన్‌పై బుధవారం విచారణ జరుగనున్నది. ప్రస్తుతం అసిస్టెంట్‌ కొరియోగ్రాఫర్‌పై లైంగిక వేధింపుల కేసులో జానీ మాస్టర్‌ను ఈ నెల 19న పోలీసులు అరెస్టు చేసిన విషయం తెలిసిందే.
లైంగిక వేధింపుల కేసు, పోక్సో కింద కేసులు నమోదవడంతో జానీ పరారీలో ఉండగా.. పోలీసులు గోవాలో అదుపులోకి తీసుకున్నారు. సైబరాబాద్‌ పోలీసుల బృందం జానీని హైదరాబాద్‌కు తరలించి.. ఉప్పరపల్లి కోర్టులో హాజరుపరిచారు. ఈ మేరకు కోర్టు 14 రోజుల జ్యుడీషియల్‌ రిమాండ్‌ను విధించింది. ప్రస్తుతం జానీ మాస్టర్‌ చర్లపల్లి జైలులో రిమాండ్‌ ఖైదీగా ఉన్నాడు. కొరియోగ్రాఫర్‌ను కస్టడీకి ఇవ్వాలని పోలీసులు సోమవారం పిటిషన్‌ దాఖలు చేశారు. పిటిషన్‌ను విచారణకు స్వీకరించిన కోర్టు విచారణ మంగళావారానికి వాయిదా వేసిన విషయం తెలిసిందే.
