నైట్‌ ఎఫెక్ట్‌లో పెద్ది రొమాన్స్‌

రామ్‌చరణ్‌ ఎంత మంచి నటుడో మగధీర, రంగస్థలం, ఆర్‌ఆర్‌ఆర్‌ సినిమాలు నిరూపించేశాయ్‌. పాత్రలో సత్తా ఉండాలేకానీ.. అందులో జీవించేయడం తండ్రి నుంచి పుణికిపుచ్చుకున్నారు రామ్‌చరణ్‌. ప్రస్తుతం ఆయన బుచ్చిబాబు సానా దర్శకత్వంలో ‘పెద్ది’ సినిమా చేస్తున్నారు.

రామ్‌చరణ్‌ ఎంత మంచి నటుడో మగధీర, రంగస్థలం, ఆర్‌ఆర్‌ఆర్‌ సినిమాలు నిరూపించేశాయ్‌. పాత్రలో సత్తా ఉండాలేకానీ.. అందులో జీవించేయడం తండ్రి నుంచి పుణికిపుచ్చుకున్నారు రామ్‌చరణ్‌. ప్రస్తుతం ఆయన బుచ్చిబాబు సానా దర్శకత్వంలో ‘పెద్ది’ సినిమా చేస్తున్నారు. ఈ విలేజ్‌ స్పోర్ట్స్‌ డ్రామాలో ఆయన ఆట కూలీగా కనిపించనున్నారు. రామ్‌చరణ్‌ పాత్రని ముందు పెట్టి, పలు క్రీడల్లో పందాలు కాస్తూ ఆ ఊరిలో కొందరు డబ్బు గడిస్తుంటారట. కథ రీత్యా ఇందులో రామ్‌చరణ్‌ అన్ని క్రీడల్లోనూ ఆరితేరి ఉంటారని వినికిడి. ఇటీవల రిలీజైన ఫస్ట్‌ గ్లింప్స్‌లో రామ్‌చరణ్‌ ఆహార్యం, శారీరక భాష, ఆట ఆడే తీరు ఆడియన్స్‌ని విపరీతంగా ఆకట్టుకున్నది. రికార్డు స్థాయి వ్యూస్‌తో ఆ గ్లింప్స్‌ సంచలనం సృష్టించిన విషయం తెలిసిందే.

ప్రస్తుతం ఈ సినిమా షూటింగ్‌ హైదరాబాద్‌ ఆర్‌ఎఫ్‌సీలో జరుగుతున్నది. ఈ షెడ్యూల్‌ అంతా నైట్‌ ఎఫెక్ట్‌తోనే సాగుతుందని సమాచారం. ఇందులో భాగంగా రామ్‌చరణ్‌, కథానాయిక జాన్వీకపూర్‌లపై ఓ రొమాంటిక్‌ సాంగ్‌ని చిత్రీకరిస్తున్నారు దర్శకుడు బుచ్చిబాబు.

వచ్చే ఏడాది మార్చి 27న సినిమాను విడుదల చేయనున్నట్టు నిర్మాత వెంకటసతీశ్‌ కిలారు ఇప్పటికే ప్రకటించారు కూడా. శివరాజ్‌కుమార్‌ ప్రత్యేక పాత్ర పోషిస్తున్న ఈ చిత్రంలో జగపతిబాబు, దివ్యేందు శర్మ కీలక పాత్రధారులు. ఈ చిత్రానికి సంగీతం: ఏ.ఆర్‌.రెహమాన్‌, కెమెరా: ఆర్‌.రత్నవేలు, సమర్పణ: మైత్రీ మూవీమేకర్స్‌, సుకుమార్‌ రైటింగ్స్‌, నిర్మాణం: వృద్ధి సినిమాస్‌.