కూలీకి 150కోట్లు?

తమిళ సూపర్‌స్టార్‌ రజనీకాంత్‌పై వయసు కూడా ప్రభావం చూపించలేకపోతున్నది. ఏడు పదులు దాటినా తలైవా ఇమేజ్‌ మాత్రం అంతకంతకూ పెరుగుతూనే ఉంది.

తమిళ సూపర్‌స్టార్‌ రజనీకాంత్‌పై వయసు కూడా ప్రభావం చూపించలేకపోతున్నది. ఏడు పదులు దాటినా తలైవా ఇమేజ్‌ మాత్రం అంతకంతకూ పెరుగుతూనే ఉంది. ఆయన సినిమా విజయం సాధిస్తే ఆ ప్రభావం ఎలా ఉంటుందో ‘జైలర్‌’ సినిమాతో నిరూపణ అయ్యింది. 220కోట్ల బడ్జెట్‌తో తెరకెక్కిన ఆ చిత్రం ప్రపంచవ్యాప్తంగా 650కోట్లు వసూలు చేసి, రజనీకాంత్‌ స్టామినా ఏంటో తెలియజెప్పింది. ప్రస్తుతం ‘కూలీ’ సినిమా షూటింగ్‌లో బిజీగా ఉన్నారు రజనీ. ఆగస్ట్‌ 15న విడుదల కానున్న ఈ సినిమాకోసం కోట్లాదిమంది తలైవా అభిమానులు ఆతృతగా ఎదురు చూస్తున్నారు. ఇదిలావుంటే.. ‘కూలీ’ సినిమాకు సంబంధించిన ఓ ఆసక్తికరమైన వార్త కోలీవుడ్‌ సర్కిల్స్‌లో బలంగా వినిపిస్తున్నది. ఈ సినిమాలో నటించినందుకు గాను 150కోట్ల పారితోషికాన్ని రజనీకాంత్‌ అందుకున్నారనేది ఆ వార్త సారాంశం.

ఇదే గనుక నిజమైతే.. ఇండియాలోనే రికార్డుగా నిలుస్తుందని అంటున్నారు. భాగస్వామ్యం, పర్సంటేజ్‌ విధానాలతో ప్రమేయం లేకుండా, కేవలం పారితోషికంగా మాత్రమే 150కోట్లు తీసుకోవడం దేశంలోనే రికార్డట. నిజానికి ఈ సినిమా బడ్జెట్‌ 375 కోట్లని తెలుస్తున్నది. అందులో రజనీ 150కోట్లు, లోకేష్‌ కనకరాజ్‌ 50కోట్లు పారితోషికాలను అందుకోగా, ఇతర పారితోషికాలు, సినిమా మేకింగ్‌కి మిగిలిన 275కోట్లు ఖర్చుపెడతారన్నమాట. మరో విషయం ఏంటంటే.. ఇప్పటికే ఈ సినిమాకు 240కోట్ల ప్రీరిలీజ్‌ బిజినెస్‌ జరిగిపోయింది. ఇంకా జరగాల్సిన బిజినెస్‌ చాలా ఉంది. మొత్తం మీద సినిమా నిర్మాత కళానిధి మారన్‌ ఇప్పటికే సేఫ్‌ జోన్‌లోకి వచ్చేశారన్నమాట. మరి తలైవానా మజాకా!