Visit:
AR Rahman | ఆస్కార్ అవార్డు గ్రహీత, భారతీయ సంగీత ప్రపంచానికి అంతర్జాతీయ గుర్తింపు తీసుకొచ్చిన స్వర మాంత్రికుడు ఏఆర్ రెహమాన్ మరోసారి తన ప్రత్యేకతను చాటుకున్నారు. వెండితెరపై అద్భుతమైన సంగీతాన్ని అందించడమే కాకుండా, దేశాన్ని కాపాడుతున్న సైనికుల పట్ల తన గౌరవాన్ని వినూత్నంగా వ్యక్తం చేస్తూ రీసెంట్గా పంజాబ్లోని అట్టారీ-వాఘా సరిహద్దును సందర్శించారు. భారత్-పాకిస్తాన్ సరిహద్దులో విధులు నిర్వహిస్తున్న బోర్డర్ సెక్యూరిటీ ఫోర్స్ (బీఎస్ఎఫ్) జవాన్లను కలిసి వారికి ప్రత్యేక సంగీత నివాళి అర్పించారు. దేశ రక్షణ కోసం నిరంతరం కృషి చేస్తున్న జవాన్ల త్యాగాలను స్మరించుకుంటూ వారి సమక్షంలో లైవ్ మ్యూజికల్ ప్రదర్శన ఇవ్వడం అందరి దృష్టిని ఆకర్షించింది.
ఈ పర్యటన వెనుక ఆయన కొత్త మ్యూజికల్ ప్రాజెక్ట్ ‘మై వాపస్ ఊంగా’ కూడా ప్రధాన కారణంగా నిలిచింది. సైనికుల జీవితాలు, వారి త్యాగాలు, దేశభక్తి భావాలను ప్రతిబింబించే ఈ ప్రాజెక్ట్లోని ప్రధాన గీతాన్ని జవాన్లకు అంకితం చేస్తూ రెహమాన్ సరిహద్దు ప్రాంతంలోనే ప్రదర్శించారు. సాధారణంగా కఠిన భద్రతా వాతావరణం, అప్రమత్తతతో కనిపించే అట్టారీ సరిహద్దు ప్రాంతం తాజాగా సంగీత స్వరాలతో మార్మోగిపోయింది. రెహమాన్ ఆలపించిన దేశభక్తి గీతాలు అక్కడి జవాన్లలో కొత్త ఉత్సాహాన్ని నింపాయి. పలువురు జవాన్లు కూడా ఆయనతో కలిసి పాటలు పాడుతూ ఆనందాన్ని వ్యక్తం చేశారు.
దేశభక్తి సంగీతంతో ఏఆర్ రెహమాన్కు ఉన్న అనుబంధం ఎంతో ప్రత్యేకం. ‘రోజా’, ‘బొంబాయి’ వంటి చిత్రాల నుంచి ‘వందే మాతరం – మా తుఝే సలామ్’ ఆల్బమ్ వరకు ఆయన అందించిన గీతాలు కోట్లాది భారతీయుల హృదయాల్లో చిరస్థాయిగా నిలిచాయి. ఇప్పుడు ‘మై వాపస్ ఊంగా’ ద్వారా మరోసారి దేశ సేవలో ఉన్న సైనికుల కథను సంగీత రూపంలో ప్రపంచానికి పరిచయం చేయబోతున్నారు. ఈ ప్రాజెక్ట్ ప్రమోషన్ను సాధారణ కార్యక్రమాల ద్వారా కాకుండా నేరుగా సరిహద్దులో విధులు నిర్వహిస్తున్న జవాన్ల సమక్షంలో ప్రారంభించడం విశేషంగా మారింది. దీంతో ఈ మ్యూజికల్ ప్రాజెక్ట్పై అంచనాలు మరింత పెరిగాయి. ఇదిలా ఉంటే, ప్రస్తుతం ఏఆర్ రెహమాన్ దక్షిణాది సినీ పరిశ్రమలోని పలు ప్రతిష్టాత్మక ప్రాజెక్టులకు సంగీతం అందిస్తున్నారు. ముఖ్యంగా రామ్ చరణ్ హీరోగా తెరకెక్కిన ‘పెద్ది’ చిత్రానికి ఆయన అందించిన సంగీతం ప్రేక్షకులను విశేషంగా ఆకట్టుకుంది.
