Operation Arunareddy | అస్సలు ఊహించని మలుపులతో పోసాని ‘ఆపరేషన్ అరుణారెడ్డి’.. ఈ నెల 17న గ్రాండ్ రిలీజ్‌కు రెడీ!

Operation Aruna reddy | ప్రముఖ రచయిత, బహుముఖ ప్రజ్ఞాశాలి పోసాని కృష్ణమురళి స్వీయ దర్శకత్వంలో ప్రతిష్టాత్మకంగా తెరకెక్కించిన సరికొత్త చిత్రం "ఆపరేషన్ అరుణారెడ్డి".

Operation Aruna reddy | ప్రముఖ రచయిత, బహుముఖ ప్రజ్ఞాశాలి పోసాని కృష్ణమురళి స్వీయ దర్శకత్వంలో ప్రతిష్టాత్మకంగా తెరకెక్కించిన సరికొత్త చిత్రం “ఆపరేషన్ అరుణారెడ్డి”. దర్శకత్వంతో పాటు కథ, స్క్రీన్‌ప్లే, మాటలు, పాటలు, కూర్పు (ఎడిటింగ్) వంటి ప్రధాన విభాగాల బాధ్యతలను ఆయనే స్వయంగా మోయడం ఈ సినిమా ప్రత్యేకత. యూపీ సినిమా లైన్స్, కుసుమ ఎంటర్టైన్మెంట్స్ పతాకాలపై నిర్మితమైన ఈ చిత్రంలో పోసాని కృష్ణమురళితో పాటు హిందోళ చక్రవర్తి, కాజల్ శర్మ, ఆయేషా ఖాన్ మరియు బీజేపీ అగ్రనేత రఘునందన్ రావు కీలక పాత్రల్లో నటించారు. ఈ నెల 17న ప్రపంచవ్యాప్తంగా థియేటర్లలోకి రాబోతున్న ఈ సినిమా ప్రీ-రిలీజ్ ఈవెంట్‌ను మంగళవారం సాయంత్రం హైదరాబాద్‌లో అత్యంత వైభవంగా నిర్వహించారు. చిత్ర యూనిట్ సభ్యులు ఈ వేడుకలో పాల్గొని సినిమాపై తమ నమ్మకాన్ని, అనుభవాలను పంచుకున్నారు.

ఈ సందర్భంగా దర్శకుడు, నటుడు పోసాని కృష్ణమురళి మాట్లాడుతూ.. తన మిత్రుడు, నిర్మాత శ్రీనివాస్ అందించిన ఆర్థిక, నైతిక సహకారం వల్లే ఈ సినిమా ఇంత వేగంగా షూటింగ్ పూర్తి చేసుకుని విడుదలకు సిద్ధమైందని కృతజ్ఞతలు తెలిపారు. ఒక రచయితగా వందకు పైగా సినిమాలు రాసి, నటుడిగా వందలాది చిత్రాల్లో మెరిసిన తాను.. దర్శక నిర్మాతగా ఇప్పటివరకు చేసిన చిత్రాలన్నింటికంటే ఈ సినిమాకు అత్యుత్తమ స్క్రీన్‌ప్లే అందించానని గర్వంగా చెప్తున్నానని అన్నారు. ఆద్యంతం ఉత్కంఠభరితంగా సాగే ఈ కథలో ఒక్క బూతు పదం కానీ, అసభ్యకరమైన సన్నివేశం కానీ ఉండవని, పూర్తి సిన్సియారిటీతో కుటుంబ సమేతంగా చూసేలా దీనిని మలిచానని ధీమా వ్యక్తం చేశారు. సినిమా ప్రారంభం నుండి ముగింపు వరకు ప్రేక్షకులు కథలో ఏం జరుగుతుందో ఊహించలేరని స్పష్టం చేశారు. చిత్ర సహ నిర్మాత శ్రీనివాస్ మాట్లాడుతూ, పోసాని గారితో కలిసి భవిష్యత్తులో ఏడాదికి రెండు సినిమాలు చేయాలని నిశ్చయించుకున్నట్లు ప్రకటించారు.

మరోవైపు ఈ సినిమాకు అద్భుతమైన స్వరాలు అందించిన సంగీత దర్శకుడు మహదేవ్ ఏలేందర్ మాట్లాడుతూ, ఈ కథ విన్నప్పుడే బ్లాక్‌బస్టర్ హిట్ కొడుతుందని తనకు అనిపించిందని, ఈ సినిమాతో పోసాని 2.0 వెర్షన్‌ను చూస్తారని నమ్మకం వ్యక్తం చేశారు. డైలాగ్స్‌తో పాటు లిరిక్స్ కూడా పోసాని గారే రాయడం ఆయన సృజనాత్మకతకు నిదర్శనమని కొనియాడారు. కెమెరామెన్ సుధాకర్ సైతం దర్శకుడితో పనిచేయడం వల్ల ఎంతో నేర్చుకున్నానని, ఆయనతో ప్రయాణం మరువలేనిదని గుర్తుచేసుకున్నారు. ముఖ్య పాత్రలో కనిపించబోతున్న హీరోయిన్ హిందోళ చక్రవర్తి మాట్లాడుతూ ఈ సమాజంలోని పరిస్థితులను ప్రతిబింబిస్తూ, నవ్విస్తూనే ఆలోచింపజేసే చక్కని చిత్రమిదని, ప్రతి ఒక్కరూ థియేటర్లలోనే చూసి ఆదరించాలని కోరారు. అరుణారెడ్డి స్నేహితురాలిగా నటించిన కాజల్ శర్మ స్పందిస్తూ, ఈ సినిమా విడుదలైన తర్వాత ప్రతి ఒక్కరూ దీని గురించే మాట్లాడుకుంటారని, అంతటి సెన్సేషన్ క్రియేట్ చేస్తుందని ఆశాభావం వ్యక్తం చేశారు. సుధాకర్ ఛాయాగ్రహణం అందించిన ఈ చిత్రానికి త్వరలోనే థియేటర్లలో భారీ స్పందన వస్తుందని చిత్రబృందం ధీమాగా ఉంది.