Peddi | దుమ్మురేపుతున్న పెద్ది .. రెండోరోజే ఆన్‌లైన్‌లో హెచ్‌డీ ప్రింట్ ప్ర‌త్య‌క్ష్యం కావ‌డంతో షాక్

Peddi | గ్లోబల్ స్టార్ రామ్ చ‌ర‌ణ్‌ హీరోగా, దర్శకుడు బుచ్చిబాబు స‌న తెరకెక్కించిన భారీ పాన్-ఇండియా స్పోర్ట్స్ యాక్షన్ డ్రామా ‘పెద్ది’ బాక్సాఫీస్ వద్ద సంచలన విజయంతో దూసుకుపోతోంది. గ్రామీణ నేపథ్యంతో రూపొందిన ఈ చిత్రానికి ప్రేక్షకుల నుంచి అద్భుతమైన స్పందన లభిస్తుండగా, విడుదలైన తొలి రోజే భారీ వసూళ్లను నమోదు చేసి కొత్త రికార్డులకు శ్రీకారం చుట్టింది.

Peddi | గ్లోబల్ స్టార్ రామ్ చ‌ర‌ణ్‌ హీరోగా, దర్శకుడు బుచ్చిబాబు స‌న తెరకెక్కించిన భారీ పాన్-ఇండియా స్పోర్ట్స్ యాక్షన్ డ్రామా ‘పెద్ది’ బాక్సాఫీస్ వద్ద సంచలన విజయంతో దూసుకుపోతోంది. గ్రామీణ నేపథ్యంతో రూపొందిన ఈ చిత్రానికి ప్రేక్షకుల నుంచి అద్భుతమైన స్పందన లభిస్తుండగా, విడుదలైన తొలి రోజే భారీ వసూళ్లను నమోదు చేసి కొత్త రికార్డులకు శ్రీకారం చుట్టింది. మైత్రీ మూవీ మేకర్స్, సుకుమార్ రైటింగ్స్ సమర్పణలో, వృద్ధి సినిమాస్ బ్యానర్‌పై నిర్మాత వెంకట సతీష్ కిలారు నిర్మించిన ఈ చిత్రంలో రామ్ చరణ్ సరసన జాన్వీ క‌పూర్ హీరోయిన్‌గా నటించారు. అలాగే శివ‌రాజ్ కుమార్, జ‌గ‌ప‌తి బాబు, బొమ‌న్ ఇరానీ తదితరులు కీలక పాత్రలు పోషించారు.

చిత్ర నిర్మాణ సంస్థ విడుదల చేసిన అధికారిక వివరాల ప్రకారం, ‘పెద్ది’ ప్రపంచవ్యాప్తంగా తొలి రోజే రూ.135.36 కోట్ల గ్రాస్ వసూళ్లు సాధించింది. ఇది రామ్ చరణ్ సోలో హీరోగా నటించిన చిత్రాల్లోనే అత్యంత భారీ ఓపెనింగ్‌గా నిలిచినట్లు ట్రేడ్ వర్గాలు పేర్కొంటున్నాయి. సినిమాకు విడుదలకు ముందే భారీ హైప్ ఉండగా, అడ్వాన్స్ బుకింగ్స్ నుంచే అద్భుతమైన స్పందన కనిపించింది. అదే ఊపు విడుదల రోజున కూడా కొనసాగడంతో పలు ప్రాంతాల్లో హౌస్‌ఫుల్ బోర్డులు దర్శనమిచ్చాయి. ఈ విజయాన్ని పురస్కరించుకుని చిత్ర యూనిట్ ప్రత్యేక పోస్టర్‌ను విడుదల చేస్తూ ‘బాక్సాఫీస్ ఛాంపియన్’గా చిత్రాన్ని అభివర్ణించింది. చాలా కాలం తర్వాత రామ్ చరణ్ కెరీర్‌లో భారీ విజయంగా నిలిచిన ఈ చిత్రంతో మెగా అభిమానులు ఆనందోత్సాహాల్లో మునిగిపోయారు.

పలు థియేటర్ల వద్ద అభిమానులు కేక్ కటింగ్‌లు, డ్యాన్స్‌లు, బాణాసంచా కాలుస్తూ విజయోత్సవాలు నిర్వహిస్తున్నారు. ముఖ్యంగా గ్రామీణ నేపథ్యంలో రామ్ చరణ్ పోషించిన పాత్రకు ప్రేక్షకుల నుంచి విశేష స్పందన లభిస్తోంది. అయితే బాక్సాఫీస్ వద్ద విజయపథంలో దూసుకుపోతున్న ‘పెద్ది’ చిత్రబృందానికి ఊహించని షాక్ తగిలింది. సినిమా విడుదలైన రెండో రోజే కొన్ని పైరసీ వెబ్‌సైట్లలో హైక్వాలిటీ ప్రింట్ రూపంలో సినిమా లీక్ అయినట్లు సమాచారం. ఈ కాపీలు సోషల్ మీడియా, పలు అనధికారిక ప్లాట్‌ఫారమ్‌ల ద్వారా వేగంగా వ్యాపిస్తున్నాయని సినీ వర్గాలు ఆందోళన వ్యక్తం చేస్తున్నాయి. థియేటర్లలో ప్రేక్షకులను ఆకట్టుకుంటున్న ఈ భారీ విజువల్ స్పెక్టాకిల్‌కు పైరసీ రూపంలో ఎదురుదెబ్బ తగలడం చిత్రబృందాన్ని కలవరపెడుతోంది. ముఖ్యంగా వీకెండ్ కలెక్షన్లపై ఈ లీక్ ప్రభావం చూపే అవకాశం ఉందని ట్రేడ్ విశ్లేషకులు భావిస్తున్నారు. పైరసీ లింకులను వెంటనే తొలగించాలని, దీనికి బాధ్యులైన వారిపై కఠిన చట్టపరమైన చర్యలు తీసుకోవాలని అభిమానులు సోషల్ మీడియా వేదికగా డిమాండ్ చేస్తున్నారు. సైబర్ క్రైమ్ విభాగం, డిజిటల్ మానిటరింగ్ టీమ్‌లు వెంటనే జోక్యం చేసుకుని అక్రమంగా సినిమా ప్రసారం చేస్తున్న వెబ్‌సైట్లపై చర్యలు తీసుకోవాలని కోరుతున్నారు.