Shahid Kapoor | ఆలియా భట్‌పై పేయిడ్ ట్రోలింగ్.. షాహిద్ కపూర్ కీలక వ్యాఖ్యలు

AliaBhatt | కేన్స్ ఫిల్మ్ ఫెస్టివల్‌లో పాల్గొన్న అనంతరం బాలీవుడ్ స్టార్ నటి ఆలియా భట్‌పై సోషల్ మీడియాలో భారీగా ట్రోల్స్ వచ్చిన సంగతి తెలిసిందే.

Alia Bhatt | కేన్స్ ఫిల్మ్ ఫెస్టివల్‌లో పాల్గొన్న అనంతరం బాలీవుడ్ స్టార్ నటి ఆలియా భట్‌పై సోషల్ మీడియాలో భారీగా ట్రోల్స్ వచ్చిన సంగతి తెలిసిందే. అయితే ఈ నెగెటివ్ ట్రోల్స్ వెనుక ఒక పేయిడ్ పీఆర్ క్యాంపెయిన్ ఉందంటూ ప్రముఖ జర్నలిస్ట్ అనుపమ చోప్రా సంచలన ఆరోపణలు చేశారు. అయితే దీనిపై బాలీవుడ్ హీరో షాహిద్ కపూర్ ఒక ఇంటర్వ్యూలో ఆసక్తికరంగా స్పందించారు. ఈ ఆరోపణలపై నేరుగా వ్యాఖ్యానించకుండా, చిత్ర పరిశ్రమలో ఉండే అభద్రతాభావం, అవగాహనల గురించి ఆయన మాట్లాడారు. తాను స్వయంగా చూడనిదే, ఆ గదిలో లేనిదే ఎవరు చెప్పినా నమ్మనని షాహిద్ స్పష్టం చేశారు. వినే ప్రతి విషయాన్ని ఒకటికి రెండుసార్లు ఆలోచించి నమ్మడం వల్ల ఇతరులు సృష్టించే కథనాల ప్రభావానికి లోనుకాకుండా ఉండొచ్చని ఆయన చెప్పారు. పబ్లిక్ ఫిగర్స్ ఇతరులు తమ అవగాహనను రూపొందించడానికి అనుమతిస్తే తారుమారు అవ్వడానికి గురవుతారని, కాబట్టి ప్రభావవంతమైన స్థానాల్లో ఉన్నవారు ధృవీకరణ లేకుండా సమాచారాన్ని అంగీకరించడంలో జాగ్రత్తగా ఉండాలని ఆయన సూచించారు.

మ‌రోవైపు ఇమేజ్, పబ్లిక్ ప్రెజర్ గురించి షాహిద్ కపూర్ మాట్లాడుతూ.. ప్రస్తుతం ప్రేక్షకులు చాలా స్మార్ట్ అయ్యారని, ఎవరైనా కావాలని ఒక ఇమేజ్ క్రియేట్ చేసుకోవాలని చూస్తే ఈజీగా కనిపెట్టేస్తున్నారని అన్నారు. స్క్రీన్ పైన, బయట నిజాయితీగా ఉండే నటీనటులనే జనాలు ఎక్కువగా ఇష్టపడుతున్నారని చెప్పారు. ఒకప్పుడు సెలబ్రిటీల గురించి జనాలు ఏమనుకోవాలో పిఆర్ టీమ్స్ కంట్రోల్ చేసేవని, కానీ ఇప్పుడు ఆ రోజులు పోయాయని అన్నారు. అందుకే ఇప్పుడు న‌టుల‌కు నిజాయితీ అనేది చాలా ముఖ్యమని ఆయన అభిప్రాయపడ్డారు.