Paapam Prathap | ‘పాపం ప్రతాప్’కు వినూత్న ప్రచారం.. మంచు లక్ష్మి వీడియోతో పెరిగిన హైప్

Paapam Prathap |వైవిధ్యమైన పాత్రలతో ప్రేక్షకుల్లో ప్రత్యేక గుర్తింపు తెచ్చుకున్న తిరువీర్ హీరోగా నటిస్తున్న తాజా చిత్రం పాపం ప్రతాప్ విడుదలకు సిద్ధమైంది. ‘మసూద’, ‘పరేషాన్’, ‘ది గ్రేట్ ప్రీ వెడ్డింగ్’ వంటి చిత్రాలతో తనకంటూ ప్రత్యేకమైన శైలిని ఏర్పరచుకున్న తిరువీర్, ఈసారి వినోదాత్మక కథతో ప్రేక్షకులను అలరించడానికి వస్తున్నారు.

Paapam Prathap |వైవిధ్యమైన పాత్రలతో ప్రేక్షకుల్లో ప్రత్యేక గుర్తింపు తెచ్చుకున్న తిరువీర్ హీరోగా నటిస్తున్న తాజా చిత్రం పాపం ప్రతాప్ విడుదలకు సిద్ధమైంది. ‘మసూద’, ‘పరేషాన్’, ‘ది గ్రేట్ ప్రీ వెడ్డింగ్’ వంటి చిత్రాలతో తనకంటూ ప్రత్యేకమైన శైలిని ఏర్పరచుకున్న తిరువీర్, ఈసారి వినోదాత్మక కథతో ప్రేక్షకులను అలరించడానికి వస్తున్నారు. ఈ చిత్రాన్ని ఈటీవీ విన్ నిర్మాణంలో రాకేష్ రెడ్డి గడ్డం, రుద్రదేవ్ మాదిరెడ్డి సంయుక్తంగా నిర్మిస్తుండగా, దర్శకుడు ఎస్. పి. దుర్గ నరేష్ తెరకెక్కిస్తున్నారు. ఏప్రిల్ 17న ఈ సినిమా ప్రపంచవ్యాప్తంగా విడుదల కానుంది. ఈ నేపథ్యంలో చిత్ర బృందం ప్రచార కార్యక్రమాలను మరింత వేగవంతం చేసింది.

సినిమా ప్రచారంలో భాగంగా విడుదల చేసిన ఒక ప్రత్యేక వీడియో ప్రస్తుతం నెట్టింట వైరల్‌గా మారింది. ఒకప్పుడు ప్రసిద్ధి చెందిన బతుకు జట్కా బండి తరహాలో ‘బతుకు జట్కా పంచాయతీ విత్ మంచు అక్క’ అనే కాన్సెప్ట్‌తో ఈ వీడియోను రూపొందించారు. ఈ వీడియోలో మంచు లక్ష్మి ‘మంచు అక్క’ పాత్రలో కనిపిస్తూ, ప్రతాప్ సమస్యను పరిష్కరించే ప్రయత్నం చేస్తుంది. కథ ప్రకారం పెళ్లైన నాలుగు రోజుల్లోనే భార్య వదిలి వెళ్లిపోవడంతో బాధలో ఉన్న ప్రతాప్, మంచు లక్ష్మిని ఆశ్రయిస్తాడు. ఈ క్రమంలో ఆమె తనదైన శైలిలో ప్రశ్నలు అడుగుతూ, అతడిని నిలదీయడం నవ్వులు పంచుతోంది.

తిరువీర్ అమాయకంగా ఇచ్చే సమాధానాలు, మంచు లక్ష్మి మేనరిజమ్స్, డైలాగ్‌లతో వీడియో ప్రత్యేక ఆకర్షణగా నిలిచింది. ముఖ్యంగా చివర్లో అజయ్ ఘోష్ ఎంట్రీ ఇచ్చి సన్నివేశాన్ని మరింత హాస్యంగా మలచడం హైలైట్‌గా మారింది. ఆయన జోక్యం చేసుకోవడానికి ప్రయత్నించగా, మంచు లక్ష్మి ఇచ్చిన కౌంటర్ ప్రేక్షకులను బాగా అలరిస్తోంది. ఇటీవల విడుదలైన పాపం ప్రతాప్ ట్రైలర్‌కు ప్రేక్షకుల నుండి మంచి స్పందన లభిస్తోంది. 1998 కాలం నాటి గోదావరి ప్రాంతాన్ని సహజంగా చూపించిన విజువల్స్, సరదా సంభాషణలు సినిమాపై అంచనాలను పెంచాయి. టైటిల్‌కు తగ్గట్టే ఒక సాధారణ యువకుడు తన జీవితంలో ఎదురయ్యే విచిత్ర పరిస్థితుల వల్ల ‘పాపం ప్రతాప్’గా ఎలా మారాడనేది కథగా తెలుస్తోంది. హాస్యంతో పాటు భావోద్వేగాలను కలిపిన కథ ఈ చిత్రంలో ఉంటుందని చిత్ర బృందం చెబుతోంది. ఈ చిత్రంలో పాయల్ రాధాకృష్ణ హీరోయిన్‌గా నటిస్తుండగా, అజయ్ ఘోష్, రాశి, రఘుబాబు కీలక పాత్రల్లో కనిపించనున్నారు. వీరి అనుభవం సినిమాకు మరింత బలం చేకూర్చనుంది.