Visit:
NTR- Neel | నందమూరి అభిమానులు ఎంతో ఆసక్తిగా ఎదురుచూస్తున్న జూనియర్ ఎన్టీఆర్-ప్రశాంత్ నీల్ కాంబినేషన్లో తెరకెక్కుతున్న భారీ ప్రాజెక్ట్ ప్రస్తుతం శరవేగంగా చిత్రీకరణ జరుపుకుంటోంది. తాజాగా ఈ చిత్ర బృందం జోర్డాన్లో కీలక షెడ్యూల్ను పూర్తి చేసింది. ముందుగా రూపొందించిన ప్లాన్ ప్రకారం మార్చి 6 వరకు జోర్డాన్లో షూటింగ్ కొనసాగాల్సి ఉండగా, ప్రధాన యాక్షన్ సీక్వెన్స్లను విజయవంతంగా పూర్తి చేసినట్లు సమాచారం. ప్రశాంత్ నీల్ స్టైల్కు తగ్గట్టుగా భారీ స్థాయిలో రూపొందించిన ఈ యాక్షన్ బ్లాక్స్లో ఎన్టీఆర్ అదిరిపోయే ప్రదర్శన ఇచ్చినట్లు చిత్ర యూనిట్ వర్గాలు చెబుతున్నాయి.ఈ సన్నివేశాలు సినిమాకు ప్రధాన హైలైట్గా నిలుస్తాయని, ‘నెవర్ బిఫోర్ – ఎవర్ ఆఫ్టర్’ స్థాయిలో ప్రేక్షకులకు కొత్త అనుభూతిని అందిస్తాయని టాక్ వినిపిస్తోంది.
అయితే యాక్షన్ సీక్వెన్స్లకు అనుసంధానంగా ఉండే కొన్ని లింక్ సీన్స్ చిత్రీకరణలో స్వల్ప ఇబ్బందులు ఎదురయ్యాయి. జోర్డాన్లో అవసరమైన జూనియర్ ఆర్టిస్టులు అందుబాటులో లేకపోవడం, కొన్ని లాజిస్టిక్ సమస్యలు తలెత్తడంతో మేకర్స్ ప్లాన్లో మార్పులు చేశారు. అక్కడే వేచి ఉండటానికి బదులుగా, మిగిలిన సన్నివేశాలను హైదరాబాద్లోని రామోజీ ఫిల్మ్ సిటీలో లేదా పరిసర ప్రాంతాల్లో ప్రత్యేకంగా ఏర్పాటు చేసే సెట్స్లో పూర్తి చేయాలని నిర్ణయించారు. దీంతో ముందుగా అనుకున్న తేదీ కంటే ముందుగానే, ఈ నెల 25న చిత్ర యూనిట్ హైదరాబాద్కు తిరిగి రానుంది.
షూటింగ్లో ఇలాంటి మార్పులు సహజమే అయినప్పటికీ, సినిమా నాణ్యత విషయంలో దర్శకుడు ప్రశాంత్ నీల్ ఎక్కడా రాజీ పడకుండా జాగ్రత్తలు తీసుకుంటున్నారని తెలుస్తోంది. ప్రతి సన్నివేశం అత్యుత్తమంగా రావాలనే ఉద్దేశంతోనే ఈ మార్పులు చేసినట్లు సమాచారం. భారీ అంచనాల మధ్య తెరకెక్కుతున్న ఈ చిత్రం ఎన్టీఆర్ అభిమానులకు పక్కా మాస్ ట్రీట్గా నిలుస్తుందని సినీ వర్గాలు విశ్వసిస్తున్నాయి.
