మెగా ఫ్యాన్స్‌కు అదిరిపోయే ట్రీట్‌.. భోళా శంక‌ర్ నుంచి మోష‌న్ పోస్ట‌ర్ రిలీజ్‌

January 1, 2022 / 05:35 PM IST

Bholaa shankar motion poster | మెగాస్టార్ చిరంజీవి ఇప్పుడు వ‌రుస సినిమాలతో ఫుల్ బిజీగా గ‌డిపేస్తున్నాడు. ఒకేసారి నాలుగు చిత్రాలను లైన్‌లో పెట్టి కుర్ర‌హీరోల‌కు కాంపిటీష‌న్ ఇస్తున్నాడు. ఇప్ప‌టికే ఆచార్య సినిమాను కంప్లీట్ చేసిన చిరు.. లూసిఫ‌ర్ రీమేక్‌ గాడ్‌ఫాద‌ర్ షూటింగ్‌ను శ‌ర‌వేగంగా కంప్లీట్ చేస్తున్నాడు. ఇదిలా ఉండ‌గానే.. మెహ‌ర్ ర‌మేశ్ ద‌ర్శ‌క‌త్వంలో భోళా శంక‌ర్ సినిమాను కూడా పూర్తి చేసే ప‌నిలో ప‌డ్డారు మెగాస్టార్‌. ఇప్ప‌టికే రాఖీ పండుగ సంద‌ర్భంగా భోళా శంక‌ర్ సినిమా నుంచి విడుద‌ల చేసిన మోష‌న్ పోస్ట‌ర్‌కు మంచి రెస్పాన్స్ వ‌చ్చింది. తాజాగా న్యూ ఇయ‌ర్ సంద‌ర్భంగా మ‌రో మోష‌న్ పోస్ట‌ర్‌ను రిలీజ్ చేసింది భోళా శంక‌ర్ టీం.

కొత్త సంవ‌త్స‌రం సంద‌ర్భంగా భోళాశంక‌ర్ టీం విడుద‌ల చేసిన మోష‌న్ పోస్ట‌ర్‌లో మెగాస్టార్ చిరంజీవి ఊర మాస్‌లుక్‌లో అద‌ర‌గొట్టాడు. చేతికి దారాలు, క‌ళ్ల‌జోడు పెట్టుకుని ఉన్న ఈ పోస్ట‌ర్‌లో ఒక‌ప్ప‌టి చిరంజీవిని గుర్తు చేశాడు. అజిత్ హీరోగా వ‌చ్చి త‌మిళంలో సూప‌ర్ హిట్ అయిన వేదాళం సినిమాకు రీమేక్‌గా భోళాశంక‌ర్ వ‌స్తుంది. సిస్ట‌ర్ సెంటిమెంట్ ప్ర‌ధానంగా న‌డిచే ఈ క‌థ‌లో.. చిరంజీవి ఇమేజ్‌కు త‌గ్గ‌ట్లుగా మెహ‌ర్ ర‌మేశ్ ప‌లు మార్పులు చేశాడు. ఈ సినిమాలో చిరంజీవి చెల్లెలుగా కీర్తి సురేశ్ న‌టిస్తోంది. త‌మ‌న్నా క‌థానాయిక‌. ఇక యంగ్ హీరో నాగ‌శౌర్య కూడా ముఖ్య పాత్ర‌లో న‌టిస్తున్న‌ట్లు తెలుస్తోంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి