Visit:
టాలీవుడ్ సీనియర్ హీరో శ్రీకాంత్, ఒకప్పటి స్టార్ హీరోయిన్ లయ జంటగా నటించిన సరికొత్త సోషియో ఫాంటసీ కామెడీ ఎంటర్టైనర్ ‘మిస్టర్ మిడిల్ క్లాస్’. బ్లూ.జే క్రియేషన్స్ బ్యానర్పై జీకే, చందు నిర్మించిన ఈ చిత్రానికి ప్రముఖ కామెడీ డైరెక్టర్ జి. నాగేశ్వరరెడ్డి దర్శకత్వం వహించారు. నటకిరీటి రాజేంద్రప్రసాద్ మొదటిసారిగా వేంకటేశ్వర స్వామి పాత్రలో కనిపించడంతో ఈ సినిమాపై ప్రేక్షకుల్లో మంచి అంచనాలు ఏర్పడ్డాయి. తాజాగా థియేటర్లలోకి వచ్చిన ఈ చిత్రం ప్రేక్షకులను ఏ మేరకు మెప్పించిందో సమీక్షలో చూద్దాం.
కథా నేపథ్యం:
మధ్యతరగతి కుటుంబానికి చెందిన వెంకటరమణ (శ్రీకాంత్) తన ఆర్థిక ఇబ్బందులతో సతమతమవుతుంటాడు. ఈ క్రమంలోనే కలియుగ దైవం వేంకటేశ్వర స్వామి (రాజేంద్రప్రసాద్) అతనికి ప్రత్యక్షమై ఒక మాయా పుస్తకాన్ని వరంగా ఇస్తాడు. ఆ పుస్తకంలో ఏం రాస్తే అది నిజమవుతుంది, కానీ అందులో కొన్ని కఠినమైన షరతులు కూడా ఉంటాయి. అయితే, ఆ మాయా పుస్తకం అనుకోకుండా రకరకాల వ్యక్తుల చేతులు మారడం.. దానివల్ల మనుషుల్లోని అత్యాశ, గర్వం బయటపడటంతో పరిస్థితులు అదుపు తప్పుతాయి. అసలు ఆ పుస్తకం వల్ల వెంకటరమణ కష్టాలు తీరాయా? మధ్యలో యముడు ఎందుకు రంగంలోకి దిగాల్సి వచ్చింది? చివరికి వెంకటరమణ కుటుంబం ఎలాంటి పాఠాలు నేర్చుకుంది? అనేదే ఈ సినిమా ముఖ్యాంశం.
విశ్లేషణ
దర్శకుడు జి. నాగేశ్వరరెడ్డి తన మార్క్ కామెడీ శైలిలోనే ఈ చిత్రాన్ని మలిచారు. 2000వ దశకంలో వచ్చిన సోషియో ఫాంటసీ, ఫ్యామిలీ సినిమాలను గుర్తుచేస్తూనే, నేటి ప్రేక్షకులను సైతం ఎంగేజ్ చేసేలా కథను నడిపించారు. సినిమా ప్రారంభంలో మధ్యతరగతి కష్టాలను చూపిస్తూ ప్రేక్షకులను ఎమోషనల్గా కనెక్ట్ చేసిన దర్శకుడు, దేవుడి ఎంట్రీతో కథను పూర్తి వినోదాత్మక ట్రాక్లోకి మళ్లించారు. ఇంటర్వెల్ బ్యాంగ్ ఆసక్తికరంగా ఉండటమే కాకుండా, సెకండాఫ్పై క్యూరియాసిటీని పెంచుతుంది. ద్వితీయార్థంలో కొద్దిపాటి స్లో నెరేషన్ ఉన్నప్పటికీ.. డబ్బు చుట్టూ తిరిగే సీన్స్, మనుషుల అత్యాశను చూపించే సన్నివేశాలు ఆకట్టుకుంటాయి. ముఖ్యంగా థియేటర్లలో వెన్నెల కిషోర్ చేసిన ‘అఖండ’ స్పూఫ్ నవ్వుల పూయిస్తుంది. క్లైమాక్స్లో “ఎంత డబ్బు ఉన్నా దేవుని నిర్ణయమే అంతిమం” అనే ఒక మంచి సందేశాన్ని ఇస్తూనే, పార్ట్-2 కు సంబంధించిన హింట్ ఇవ్వడం విశేషం.
నటీనటుల ప్రదర్శన:
మధ్యతరగతి తండ్రిగా శ్రీకాంత్ తన సహజ నటనతో మెప్పించారు. చాలా కాలం తర్వాత తెలుగు తెరపై కనిపించిన లయ, భార్య పాత్రలో చక్కగా ఒదిగిపోయి పాత రోజులను గుర్తుచేశారు. రాజేంద్రప్రసాద్ స్వామివారి పాత్రలో ఆడంబరాలు లేకుండా హుందాగా నటిస్తూ సినిమాకు ప్రధాన బలంగా నిలిచారు. నెగెటివ్ ఛాయలున్న గెస్ట్ రోల్లో సునీల్, యముడి పాత్రలో ధనరాజ్ ఆకట్టుకోగా.. అలీ, మురళీధర్ గౌడ్, రఘుబాబు తమ కామెడీ టైమింగ్తో నవ్వులు పంచారు.
సాంకేతిక వర్గం:
సినిమాటోగ్రఫీ విజువల్స్ పర్వాలేదనిపిస్తాయి. శ్రీవారిపై వచ్చే రెండు భక్తి గీతాలు, దేవుడు-కర్మ సిద్ధాంతాలపై రాసిన సంభాషణలు సినిమాకు హైలైట్గా నిలిచాయి. అయితే, దేవుడికి సంబంధించిన గ్రాఫిక్స్ (VFX)పై ఇంకాస్త శ్రద్ధ పెట్టి, ఫస్టాఫ్ ఎడిటింగ్ మరింత క్రిస్ప్గా చేసి ఉంటే సినిమా స్థాయి మరోలా ఉండేది. నిర్మాణ విలువలు సినిమాకు తగ్గట్టుగా బాగున్నాయి.
చివరిగా..
‘మిస్టర్ మిడిల్ క్లాస్’ పాతకాలపు సోషియో ఫాంటసీ నవ్వులను, ఫ్యామిలీ ఎమోషన్స్ను గుర్తుచేసే చిత్రం. ఎలాంటి అశ్లీలత లేకుండా, వారాంతంలో కుటుంబంతో కలిసి హాయిగా నవ్వుకుని, సరదాగా కాలక్షేపం చేయడానికి ఈ సినిమా ఒక మంచి ఛాయిస్.
రేటింగ్: 3
