రవితేజ నటన చూసి థ్రిల్‌ అవుతారు

మిరపకాయ్‌, గబ్బర్‌సింగ్‌, గద్దలకొండ గణేశ్‌.. ఈ మూడు సినిమాలు చాలు దర్శకుడిగా హరీశ్‌శంకర్‌ సామర్థ్యం ఏంటో చెప్పుకోటానికి. మాస్‌ హీరోలను మాస్‌ మహారాజుల్లా చూపించడంలో హరీశ్‌ దిట్ట.

మిరపకాయ్‌, గబ్బర్‌సింగ్‌, గద్దలకొండ గణేశ్‌.. ఈ మూడు సినిమాలు చాలు దర్శకుడిగా హరీశ్‌శంకర్‌ సామర్థ్యం ఏంటో చెప్పుకోటానికి. మాస్‌ హీరోలను మాస్‌ మహారాజుల్లా చూపించడంలో హరీశ్‌ దిట్ట. రవితేజ కథానాయకుడిగా ఆయన దర్శకత్వంలో రూపొందిన చిత్రం ‘మిస్టర్‌ బచ్చన్‌’. భారీ అంచనాలతో ఆగస్ట్‌ 15న సినిమా విడుదల కానుంది. ఈ సందర్భంగా హరీశ్‌శంకర్‌ విలేకరులతో ముచ్చటించారు.

• ఈ కథకు బలం హీరో క్యారెక్టరైజేషనే. ఈ కథలో హానెస్టీగా ఉన్న హీరోయిజం నచ్చే తెరకెక్కించాను. 80ల్లో నార్త్‌ ఇండియాలో జరిగిన యథార్థ సంఘటనలను సినిమాటిక్‌ లిబర్టీ తీసుకొని రూపొందించిన కథ ఇది. లక్షల రూపాయల లంచానికి కూడా లొంగని ఆఫీసర్‌గా ఇందులో రవితేజ కనిపిస్తారు. ఆయన నుంచి ఆడియన్స్‌ ఏమి ఆశిస్తారో.. అవన్నీ ఇందులో ఉంటాయి. ముఖ్యంగా సెకండాఫ్‌లో ఆయన నటన చూసి ప్రేక్షకులు థ్రిల్‌ ఫీలవుతారు.
• నిజాయితీగా ఉండే వ్యక్తుల జీవితాల్లో వినోదం, రొమాన్స్‌, లవ్‌ అన్నీ ఉంటాయి. ఇందులో హీరో ప్రేమలో నిజాయితీ ఉంటుంది. తను చేసే పోరాటంలో నిజాయితీ ఉంటుంది. ఈ కథలో నాకు నచ్చింది అదే. అజయ్‌దేవగన్‌ ‘రైడ్‌’ సినిమా ఆద్యంతం సీరియస్‌గా సాగుతుంది. ఈ సినిమాలో ఆ సీరియస్‌నెస్‌ ఉండదు. ఆద్యంతం ఎంటర్‌టైనింగ్‌గా సాగుతుంది.
• ‘మిస్టర్‌ బచ్చన్‌’ మ్యూజిక్‌ అంతా ఒక్కవారంలో చేశాం. వారంలో నాలుగు చార్ట్‌ బస్టర్‌ ట్యూన్స్‌ ఇవ్వడం సాధారణమైన విషయం కాదు. నేను డైరెక్టర్‌గా ఫెయిల్‌ అయినా.. నా పాటలు మాత్రం ఇప్పటివరకూ ఫెయిల్‌ అవ్వలేదు. సినిమా చూడని రోజైనా ఉందేమోగానీ, పాటలు వినని రోజు నా జీవితంలో లేదు. సంగీతంపై నాకున్న మక్కువే నా సినిమాల్లో బాగా రావడానికి కారణం. మిక్కీ జే మేయర్‌ అద్భుతమైన పాటలు ఇచ్చారు. మా ఇద్దరి కాంబినేషన్‌ బాగా సెట్‌ అయ్యింది.
• రవితేజ లాంటి హీరో, విశ్వప్రసాద్‌ లాంటి నిర్మాత దొరకడం వల్లే సినిమాను అనుకున్న సమయానికి పూర్తి చేయగలిగాం. భాగ్యశ్రీ బోర్సే అందంతో పాటు అభినయంతో కూడా ఆకట్టుకుంటుంది. జగపతిబాబు ఇందులో ఎంపీగా కనిపిస్తారు. ఇక సాంకేతికంగా అన్ని విధాలుగా సినిమా అభినందనీయంగా ఉంటుంది.