ఇంట్లో నుంచి వెళ్లి న‌టి అదృశ్యం.. గోనె సంచిలో మృత‌దేహం ల‌భ్యం

January 19, 2022 / 07:33 PM IST

Raima Islam Shimu | బంగ్లాదేశ్‌కు చెందిన ప్ర‌ముఖ న‌టి రైమా ఇస్లాం షిము హ‌త్య ఘ‌ట‌న ఇప్పుడు సంచ‌ల‌నంగా మారింది. కొద్దిరోజుల క్రితం అదృశ్య‌మైన‌ ఆమె.. ఒక గోనె సంచిలో మృత‌దేహంగా క‌నిపించ‌డం క‌ల‌క‌లం సృష్టిస్తోంది. వివ‌రాల్లోకి వెళ్తే బంగ్లాదేశ్‌కు చెందిన న‌టి రైమా ఇస్లాం షిము 1998లో సినీ కెరీర్‌ను ప్రారంభించింది. వ‌ర్త‌మాన్ సినిమాతో సినిమాల్లోకి ఎంట్రీ ఇచ్చింది. ఇప్ప‌టివ‌ర‌కు సుమారు 25 చిత్రాల్లో న‌టించింది. అంతేకాకుండా ప‌లు టీవీ సీరియ‌ళ్ల‌లో న‌టించింది. ఇదిలా ఉంటే కొద్దిరోజుల క్రితం ఇంటి నుంచి బ‌య‌ట‌కు వెళ్లిన ఆమె క‌నిపించ‌కుండా పోయింది. ఎంత‌సేప‌టికి తిరిగి రాక‌పోవ‌డంతో ఆమె భ‌ర్త షెకావ‌త్ అలీ నోబెల్‌ ఫిర్యాదు మేర‌కు జ‌న‌వ‌రి 16న మిస్సింగ్ కేసు న‌మోదు చేసుకున్నారు.

ఈ క్ర‌మంలోనే బంగ్లాదేశ్ రాజ‌ధాని ఢాకాలోని కెరానిగంజ్ బ్రిడ్జి వ‌ద్ద ఒక గోనెసంచిలో మృత‌దేహం క‌నిపించ‌డంతో స్థానికులు పోలీసుల‌కు స‌మాచారం అందించారు. ఘ‌ట‌నాస్థలికి వెళ్లి చూసిన పోలీసులు.. బ్యాగులో ఉన్న‌ది న‌టి రైమాగా గుర్తించారు. అయితే రైమా శ‌రీరంపై గాయాలు కనిపించ‌డంతో అనుమానం వ‌చ్చిన పోలీసులు రైమా భ‌ర్త షెకావ‌త్‌తో పాటు అత‌ని స్నేహితుల‌ను అదుపులోకి తీసుకున్నారు. కాగా పోలీసుల విచార‌ణ‌లో రైమా హ‌త్య‌లో త‌న‌కు ప్ర‌మేయం ఉన్న‌ట్లు బ‌య‌ట‌పెట్టాడు. అయితే రైమాతో ఆమె భ‌ర్త‌కు కొద్దిరోజులుగా గొడ‌వ‌లు న‌డుస్తున్నాయ‌ని.. కుటుంబ క‌ల‌హాలే రైమా హ‌త్య‌కు కార‌ణం కావ‌చ్చని పోలీసులు భావిస్తున్నారు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి