Visit:
హైదరాబాద్: ఒక దర్శకుడి అద్భుతమైన ఆలోచనలకు, ఊహలకు వెండితెరపై ప్రాణం పోసే సృజనాత్మక బ్రహ్మ సినిమాటోగ్రాఫర్. నిర్మాత పెట్టే పెట్టుబడికి, బడ్జెట్కు తన విజువల్స్ ద్వారా పదింతల విలువను తీసుకువచ్చే మాయాజాలం కెమెరామెన్ చేతుల్లోనే ఉంటుంది. సినిమా అనే ప్రక్రియకు నిర్మాత తండ్రిలాంటివాడు, దర్శకుడు తల్లిలాంటివాడైతే, ఆ సినిమా ప్రారంభం నుండి ముగింపు వరకు భుజాన వేసుకుని నడిపించే పెద్ద కొడుకు లాంటి బాధ్యత సినిమాటోగ్రాఫర్దే అనడంలో ఎలాంటి సందేహం లేదు. ఈ కీలకమైన విభాగంలో టాలీవుడ్తో పాటు హాలీవుడ్, బాలీవుడ్ చిత్రాల్లో పనిచేసి తనదైన ప్రత్యేక ముద్ర వేసుకున్న ప్రతిభాశాలి కిషోర్ బోయిడాపు. మెగా బ్రదర్ నాగబాబు ప్రధాన పాత్రలో, ప్రదీప్ మద్దాలి దర్శకత్వంలో తెరకెక్కిన ‘‘మేము కాప్’లం’’ వెబ్ సిరీస్ ప్రస్తుతం ప్రముఖ ఓటీటీ సంస్థ జీ5 (Zee5) లో విజయవంతంగా స్ట్రీమింగ్ అవుతూ ప్రేక్షకుల మరియు విమర్శకుల ప్రశంసలు అందుకుంటోంది. ఈ క్రమంలో ఈ వెబ్ సిరీస్ను కేవలం 17 రోజుల్లోనే అత్యంత నాణ్యతతో తెరకెక్కించడంలో కీలక పాత్ర పోషించిన సినిమాటోగ్రాఫర్ కిషోర్ బోయిడాపు తన సినీ ప్రయాణం, హాలీవుడ్ అనుభవాలు, అలాగే ఈ సిరీస్ వెనుక ఉన్న సవాళ్లను మీడియాతో పంచుకున్నారు.
తన నేపథ్యం మరియు సినీ ప్రయాణం గురించి కిషోర్ బోయిడాపు మాట్లాడుతూ, తన పూర్తి పేరు దుర్గ కిషోర్ కుమార్ అని, తన కుటుంబ సభ్యులంతా ఇండస్ట్రీలోనే ఉండటం వల్ల చిన్నప్పటి నుంచే తనకు సినిమాలపై, కెమెరాపై సహజంగానే విపరీతమైన ఆసక్తి ఏర్పడిందని తెలిపారు. చిన్నప్పుడు తమ తండ్రి గారు తమను ఫోటోలు తీసి, ఆ ఫోటోల ఆధారంగానే కథలు చెప్పేవారని, ఆ జ్ఞాపకాలే తనను ఈ రంగం వైపు నడిపించాయని గుర్తుచేసుకున్నారు. ఆ ఆసక్తితోనే 2002లో రవి ప్రసాద్ యూనిట్లో కెమెరా అసిస్టెంట్గా తన కెరీర్ను ప్రారంభించానని చెప్పారు. అక్కడ నాలుగేళ్ల పాటు పని నేర్చుకున్న తర్వాత సరికొత్త అవకాశాల కోసం ముంబైకి వెళ్లినట్లు పేర్కొన్నారు. ముంబైలో అడుగుపెట్టిన తర్వాత హాలీవుడ్ సంచలనం, ఆస్కార్ అవార్డుల పంట పండించిన ‘స్లమ్ డాగ్ మిలియనీర్’ చిత్రానికి కెమెరా డిపార్ట్మెంట్లో పనిచేసే అరుదైన అవకాశం దక్కిందని ఆనందం వ్యక్తం చేశారు. ఆ సినిమా ఇచ్చిన గుర్తింపుతో హాలీవుడ్ స్టార్ హీరో టామ్ క్రూజ్ నటించిన ‘మిషన్ ఇంపాజిబుల్ 4’ వంటి సుమారు 15 అంతర్జాతీయ హాలీవుడ్ చిత్రాల కెమెరా విభాగంలో వివిధ హోదాల్లో పనిచేసినట్లు వెల్లడించారు.
ఆ తర్వాత 2012లో ‘బాయ్ మీట్స్ గర్ల్’ అనే చిత్రానికి మొదటిసారిగా పూర్తిస్థాయి డీఓపీ (DOP) గా బాధ్యతలు చేపట్టానని చెప్పారు. ఆ సమయంలోనే 2015లో ప్రముఖ బాలీవుడ్ సినిమాటోగ్రాఫర్ అనిల్ మెహతా గారితో తన ప్రయాణం ప్రారంభమైందని, ఆయనతో కలిసి రణ్బీర్ కపూర్ నటించిన ‘ఏ దిల్ హై ముష్కిల్’ సినిమా నుండి టాలీవుడ్ నేచురల్ స్టార్ నాని నటించిన ‘జెర్సీ’ సినిమా వరకు వన్ ఆఫ్ ది మెయిన్ అసిస్టెంట్గా సుదీర్ఘంగా పనిచేశానని తెలిపారు. ఈ మధ్యకాలంలో బాలీవుడ్లో మరో పది పెద్ద సినిమాలకు కూడా పనిచేశానని, అనిల్ మెహతా గారి వద్ద నేర్చుకున్న ప్రతి చిన్న విషయం, అనుభవం తన కెరీర్కు ఎంతో ఉపయోగపడిందని కృతజ్ఞతలు తెలిపారు. కోవిడ్ లాక్డౌన్ తర్వాత తనకు తెలుగులో హన్సిక ప్రధాన పాత్రలో నటించిన ‘105 మినిట్స్’, మరియు ‘మై నేమ్ శృతి’ వంటి చిత్రాలలో సోలో కెమెరామెన్గా అవకాశాలు వచ్చినప్పుడు అనిల్ మెహతా గారిని సంప్రదించానని, ఆయన ఎంతో సంతోషంగా ప్రోత్సహిస్తూ సొంతంగా వర్క్ స్టార్ట్ చేయమని ఆశీర్వదించారని చెప్పారు.
సినిమాటోగ్రఫీలో ఎదురయ్యే సవాళ్ల గురించి మాట్లాడుతూ, హన్సికతో చేసిన ‘105 మినిట్స్’ చిత్రాన్ని సింగిల్ క్యారెక్టర్తో, అదీ సింగిల్ షాట్ (సింగిల్ టేక్) లోనే పూర్తి చేయడం ఒక కెమెరామెన్గా తన కెరీర్లో అత్యంత సవాలుతో కూడుకున్న విషయమని చెప్పారు. థియేటర్లలో ప్రేక్షకులకు సినిమా నచ్చిందా లేదా అనేదే ముఖ్యం కానీ, ఆ సింగిల్ షాట్ వెనుక చిత్ర యూనిట్ పడే కష్టం అంత సులభంగా ఎవరికీ తెలియదన్నారు. షూటింగ్ సమయంలో ఏ ఒక్క చిన్న తప్పు జరిగినా, మళ్లీ మొదటి నుండి మొత్తం సీన్ అంతా రీ-షూట్ చేయాల్సి ఉంటుందని ఆ శ్రమను వివరించారు. అలాగే సాంకేతికత ఫిల్మ్ కాలం నుండి డిజిటల్ కాలానికి మారడం వల్ల ఇప్పుడు ఎన్ని టేకులైనా తీసుకునే వెసులుబాటు కలిగిందని, పూర్వంలా లెంగ్త్ పరిమితులు లేవని చెప్పారు. అయితే ప్రస్తుతం లెన్స్ల విషయంలో చాలా పరిశోధనలు జరుగుతున్నాయని, కథకు, బడ్జెట్కు తగిన లెన్స్ను ఎంచుకోవడమే ఇప్పుడున్న పెద్ద టాస్క్ అని అన్నారు. తాను ఎక్కువగా ‘కుక్ లెన్స్’ (Cooke lenses) ఉపయోగించడానికి ఇష్టపడతానని, త్వరలో రాబోతున్న ‘ప్రేమకు నమస్కారం’ సినిమా కోసం కుక్ 7 లెన్స్ను వాడినట్లు తెలిపారు. తాను వ్యక్తిగతంగా రవి వర్మన్, అనిల్ మెహతా, సుదీప్ చటర్జీ వంటి సీనియర్ల విజువల్ స్టైల్ను ఎక్కువగా ఫాలో అవుతుంటానని పేర్కొన్నారు.
హాలీవుడ్ మేకింగ్కు, మన దేశీయ మేకింగ్కు గల ప్రధాన వ్యత్యాసాలను వివరిస్తూ.. హాలీవుడ్ సినిమాల్లో కలర్ టోన్ ఎక్కువగా సహజంగా, సాఫ్ట్గా, రియలిస్టిక్ లైటింగ్తో ఉంటుందని, కానీ భారతీయ సినిమాల్లో మన సంస్కృతి, పండుగలు, రంగురంగుల కాస్ట్యూమ్స్ మరియు ఇక్కడి బలమైన ఎమోషన్స్కు అనుగుణంగా వైబ్రంట్ కలర్స్, రిచ్ స్కిన్ టోన్స్కు ప్రాధాన్యత ఇస్తామని స్పష్టం చేశారు. మన కథలకు హాలీవుడ్ తరహా డిప్రెస్డ్ లేదా డార్క్ కలర్ టోన్స్ అంతగా సెట్ కావని అభిప్రాయపడ్డారు. హాలీవుడ్లో వాడే లెన్స్, మనం వాడే లెన్స్ ఒకటే అయినప్పటికీ, వారు పోస్ట్ ప్రొడక్షన్ డీఐ (DI) కి, వీఎఫ్ఎక్స్ (VFX) కి చాలా ఎక్కువ సమయం తీసుకుంటారని, మనకు ఇక్కడ అంత సమయం ఉండదని ప్రాక్టికల్ ఇబ్బందులను పంచుకున్నారు. అయితే ప్రస్తుతం ఓటీటీ ప్రాజెక్టుల పుణ్యమా అని మన ఇండస్ట్రీ కూడా అడ్వాన్స్ కలర్ వర్క్ ఫ్లోలను ఉపయోగిస్తూ హాలీవుడ్ స్థాయి మేకింగ్కు దగ్గరవుతోందని ఆనందం వ్యక్తం చేశారు.
ఇక ప్రస్తుత వెబ్ సిరీస్ ‘‘మేము కాప్’లం’’ గురించి మాట్లాడుతూ.. ఈ సిరీస్ మొత్తం షూటింగ్ను కేవలం 17 రోజుల్లోనే పూర్తి చేయడం ఒక రికార్డ్ అని, ఇది కేవలం అద్భుతమైన ప్రీ-ప్రొడక్షన్ ప్లానింగ్ మరియు అన్ని విభాగాల కో-ఆర్డినేషన్ వల్లే సాధ్యమైందని స్పష్టం చేశారు. తాను, దర్శకుడు ప్రదీప్ మద్దాలి కలిసి లొకేషన్ల రెక్కీ చేస్తున్నప్పుడే ఏ సీన్ను ఎలా తీయాలి, ఎంత సమయంలో పూర్తి చేయాలనే దానిపై ఆఫీస్లోనే కూర్చుని స్పష్టమైన క్లారిటీకి వచ్చామని చెప్పారు. తమను నమ్మి ఈ ప్రాజెక్ట్ను నిర్మించిన ప్రముఖ నిర్మాత, రచయిత బీవీఎస్ రవి గారికి, అలాగే నటీనటులు నాగబాబు గారు, శ్రీను గారు, రవి గారు మరియు ప్రతి ఒక్క సాంకేతిక నిపుణుడికి ఈ సందర్భంగా ప్రత్యేక కృతజ్ఞతలు తెలిపారు. భవిష్యత్తులో దర్శకత్వం చేసే ఆలోచనలు ఉన్నాయా అనే ప్రశ్నకు స్పందిస్తూ.. కెమెరామెన్ నుండి డైరెక్టర్ కావడం అంత సులభం కాదని, దర్శకత్వం అనేది చాలా ఒత్తిడితో కూడుకున్న బాధ్యతాయుతమైన పదవి అని చెప్పారు. తనకు కొన్ని కథల ఆలోచనలు ఉన్నప్పటికీ, ప్రస్తుతానికి మాత్రం దర్శకత్వం వైపు వెళ్లడం లేదని, ఇప్పుడున్న ఖాళీ సమయంలో విజువల్స్ పెంపొందించడానికి ఉపయోగపడే సరికొత్త ‘ఏఐ (AI) టెక్నాలజీ’ని నేర్చుకునే పనిలో ఉన్నానని వెల్లడించారు. చివరగా, త్వరలోనే షణ్ముఖ్, శివాజీ, భూమిక ప్రధాన పాత్రల్లో నటించిన ‘ప్రేమకు నమస్కారం’ సినిమా విడుదలకు సిద్ధంగా ఉందని, అలాగే రాజీవ్ కనకాల ముఖ్య పాత్రలో నటించిన ‘మన డాక్టర్ బాబు’ చిత్రం పోస్ట్ ప్రొడక్షన్ పనులు జరుపుకుంటోందని, ఇవి కాకుండా మరో రెండు మూడు ప్రాజెక్టులు చర్చల దశలో ఉన్నాయని కిషోర్ బోయిడాపు ఇంటర్వ్యూను ముగించారు.
