రాజీనామాలతో బెదిరించలేరు.. నాకు పనులున్నాయంటున్న మంచు విష్ణు..

October 16, 2021 / 10:18 PM IST

Manchu vishnu and Prakash raj | Maa elections | Maa president — Manchu vishnu and Prakash raj

Maa elections | మా అధ్య‌క్షుడిగా మంచు విష్ణు ( Manchu vishnu ) శ‌నివారం ప్ర‌మాణ స్వీకారం చేశాడు. ఫిలింన‌గ‌ర్ క‌ల్చ‌ర‌ల్ సెంట‌ర్‌లో జ‌రిగిన కార్య‌క్ర‌మంలో విష్ణు, అత‌ని ప్యానెల్ స‌భ్యుల‌తో మా ఎన్నిక‌ల అధికారి కృష్ణ మోహ‌న్ ప్ర‌మాణ స్వీకారం చేయించాడు. ప్ర‌మాణ స్వీకారం అనంత‌రం మీడియాతో మాట్లాడిన మంచు విష్ణు ఆస‌క్తిక‌ర‌ వ్యాఖ్య‌లు చేశాడు. గ‌తం గురించి మాట్లాడే స‌మ‌యం లేద‌ని చెప్పాడు. ఎన్నిక‌లు జ‌రిగిన విధానం ఎలా ఉంద‌నేది ప‌క్క‌న పెడితే.. గెలిచాం క‌దా.. ఇక ప‌ని మొద‌లు పెడ‌తామ‌ని చెప్పుకొచ్చాడు. అలాగే ప్ర‌కాశ్ రాజ్ ( prakash raj ) ప్యాన‌ల్ చేసిన రాజీనామాల‌పై సంచ‌ల‌న వ్యాఖ్య‌లు చేశాడు.

పాత విష‌యాల గురించి ఇప్పుడు మాట్లాడుకుని అన‌వ‌స‌రంగా స‌మ‌యం వృథా చేయ‌డం ఇష్టం లేద‌ని అంటున్నాడు మంచు విష్ణు. ఇప్ప‌టి నుంచి ప‌నికొచ్చే విష‌యాలు ఉంటే తానే మీడియా ముందుకొస్తాన‌ని.. లేదంటే త‌న ప‌ని తాను చేసుకుంటాన‌ని క్లారిటీ ఇచ్చాడు. ఇప్ప‌టికే మా ఎన్నిక‌ల విష‌యంలో ప్రేక్ష‌కుల‌ను చాలా ఎంట‌ర్‌టైన్ చేశామ‌ని.. ఇక‌పై త‌మ‌ ప‌ని తాము చేసుకుంటామ‌ని అన్నాడు. రాబోయే రెండు సంవ‌త్స‌రాల‌లో మా అసోసియేష‌న్ రూపురేఖ‌ల‌ను మార్చేస్తాన‌ని చెప్పాడు. మోహ‌న్ బాబు కొడుకుగా.. మీ విష్ణుగా ఏం చేయాలో త‌న‌కు తెలుస‌ని.. అవ‌న్నీ చేసి చూపిస్తాన‌ని అంటున్నాడు.

ఇక ప్రకాష్ రాజ్ ప్యానల్ చేసిన రాజీనామాల గురించి కూడా ఆసక్తికరంగా రియాక్ట్ అయ్యాడు మంచు విష్ణు. అందరూ కలిసి పని చేయాలని చాలా రోజుల నుంచి అనుకుంటున్నానని.. అయితే వారు రాజీనామాలు చేయడం ఊహించని పరిణామం అంటున్నాడు. గేమ్ అన్న తర్వాత విన్నర్ రన్నర్ ఉంటార‌ని.. ఇక్క‌డ లూస‌ర్ ఉండ‌ర‌నే విష‌యాన్ని వారు అర్థం చేసుకుంటే మంచిద‌ని సూచించాడు. రాజీనామాలు చేసినంత మాత్రాన ఏదీ ఆగ‌ద‌ని.. త‌మ‌ను ఎవ‌రూ ఆప‌లేర‌ని.. ఇక‌పై వాళ్ల ఇష్టం అన్న‌ట్లు స్పందించాడు మంచు విష్ణు. మ‌రోవైపు మా ఎన్నిక‌లు జ‌రిగిన తీరుపై ప్ర‌కాశ్ రాజ్ కోర్టును ఆశ్ర‌యిస్తార‌ని సోష‌ల్ మీడియాలో ప్ర‌చారం జ‌రుగుతోంది. ఏదేమైనా ఎన్నిక‌లు అయిపోయి వారం రోజులు అవుతున్నా కూడా ఇప్ప‌టికీ ఆ వేడి తెలుస్తూనే ఉంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి