Megastar Chiranjeevi | తెలుగు సినిమా పెద్ద దిక్కుగా చిరంజీవి.. పరిశ్రమ సంక్షోభంపై ప్ర‌తినిధుల‌తో నేడు, రేపు చర్చలు

Megastar Chiranjeevi | తెలుగు చలనచిత్ర పరిశ్రమలో గత 15 రోజులుగా నెలకొన్న వేతన వివాదాలు, కార్మికుల పని పరిస్థితులపై అగ్ర క‌థానాయ‌కుడు మెగాస్టార్ చిరంజీవి రంగంలోకి దిగిన విష‌యం తెలిసిందే.

Megastar Chiranjeevi | తెలుగు చలనచిత్ర పరిశ్రమలో గత 15 రోజులుగా నెలకొన్న వేతన వివాదాలు, కార్మికుల పని పరిస్థితులపై అగ్ర క‌థానాయ‌కుడు మెగాస్టార్ చిరంజీవి రంగంలోకి దిగిన విష‌యం తెలిసిందే. పరిశ్రమ సమ్మె దిశగా వెళ్తున్న తరుణంలో, ఆయన తన నివాసంలో 24 క్రాఫ్ట్‌ల ప్రతినిధులతో ఒక అత్యంత కీలక సమావేశాన్ని నిర్వహించారు. ఫిల్మ్ ఛాంబ‌ర్‌, ఫిల్మ్ ఫెడ‌రేష‌న్ స‌భ్యుల మధ్య ఏర్పడిన ప్రతిష్టంభన నేపథ్యంలో పరిశ్రమ వర్గాలన్నీ చిరంజీవి వైపు చూశాయి. ఈ నేపథ్యంలోనే ఆయన ఈ సమావేశాన్ని ఏర్పాటు చేశారు. ఈ సమావేశం దాదాపు రెండు గంటలకు పైగా కొనసాగింది. కేవలం ఒక సినీ నటుడిగా కాకుండా, పరిశ్రమలో దశాబ్దాల అనుభవం ఉన్న పెద్ద దిక్కుగా ఆయన ఈ చర్చలను ముందుకు నడిపించారు. ప్రతి క్రాఫ్ట్ నుండి వచ్చిన ప్రతినిధులు తమ సమస్యలను, ఆందోళనలను విన్నవించుకోవడానికి చిరంజీవి పూర్తి సమయం ఇచ్చారు.

ఈ చర్చల సందర్భంగా, పరిశ్రమ నాయకత్వానికి, కార్మికులకు మధ్య పెరుగుతున్న అంతరం పట్ల చిరంజీవి ఆవేదన వ్యక్తం చేశారు. ఒక పరిశ్రమ అభివృద్ధి చెందాలంటే, దాని వెన్నెముక అయిన కార్మికులను గౌరవంగా, మర్యాదగా చూడాలి అని ఆయన నొక్కి చెప్పారు. శ్రమకు తగిన వేతనం, మెరుగైన పని పరిస్థితులు కల్పించడం వల్లనే పరిశ్రమ ముందుకు వెళ్తుందని ఆయన అభిప్రాయపడ్డారు.

ఈ సమావేశంలో ప్రతినిధులతో విన్న విషయాల ఆధారంగా.. చిరంజీవి నేడు, రేపు నిర్మాతలు, కార్మిక సంఘాల నాయకులతో ప్రత్యేకంగా సమావేశం కానున్నారు. ఈ రెండు వర్గాల మధ్య సయోధ్య కుదిర్చి, సమస్యకు ఒక శాశ్వత పరిష్కారాన్ని కనుగొనాలని ఆయన లక్ష్యంగా పెట్టుకున్నారు. టాలీవుడ్‌ క్లిష్ట సమయాల్లో చిరంజీవి లాంటి అగ్ర న‌టులు ముందుకు రావడం పరిశ్రమకు ఒక పెద్ద భరోసా అని పలువురు అభిప్రాయపడుతున్నారు.