Visit:
Kamal Hasan | దిగ్గ‌జ నటుడు కమల్ హాసన్ ఇటీవల కన్నడ భాషపై చేసిన వ్యాఖ్యలు కర్ణాటకలో తీవ్ర దుమారం రేపాయి. దీంతో, కర్ణాటక ఫిల్మ్ ఛాంబర్ ఆఫ్ కామర్స్ (KFCC) ఆయన తదుపరి చిత్రం ‘థగ్ లైఫ్’ విడుదలను నిలిపివేయాలని డిమాండ్ చేస్తుంది. కమల్ హాసన్ బహిరంగ క్షమాపణ చెప్పాలని, లేకపోతే సినిమా విడుదల అడ్డుకుంటామని స్పష్టం చేసింది.
అస‌లు ఏం జరిగిందంటే
‘థగ్ లైఫ్’ ఆడియో విడుదల కార్యక్రమంలో కమల్ హాసన్ మాట్లాడుతూ, “కన్నడ భాష తమిళం నుండే పుట్టింది” అని వ్యాఖ్యానించారు. అయితే ఈ వ్యాఖ్యలు కన్నడిగుల మనోభావాలను తీవ్రంగా దెబ్బతీశాయని, కన్నడ అనుకూల సంఘాలు, రాజకీయ నాయకులు తీవ్ర అభ్యంతరం వ్యక్తం చేశారు. కన్నడ సంస్కృతి మరియు భాషకు అవమానం కలిగించేలా ఈ వ్యాఖ్యలు ఉన్నాయని మండిపడ్డారు.
కర్ణాటక ఫిల్మ్ ఛాంబర్ నిర్ణయం
కర్ణాటక కన్నడ మరియు సంస్కృతి శాఖ మంత్రి శివరాజ్ ఎస్ తంగడగి, కమల్ హాసన్ వ్యాఖ్యలు కన్నడిగులకు తీవ్ర బాధను కలిగించాయని పేర్కొంటూ, KFCCకి ఒక లేఖ రాశారు. ఈ నేపథ్యంలో, KFCC అధ్యక్షుడు ఎం. నరసింహులు, ఇతర సభ్యులు, పరిశ్రమ వాటాదారులతో సమావేశమయ్యారు. సమావేశం అనంతరం, మే 30లోగా కమల్ హాసన్ బహిరంగ క్షమాపణ చెప్పకపోతే ‘థగ్ లైఫ్’ సినిమాను కర్ణాటకలో విడుదల చేయమని ప్రకటించారు. “మా భాష, భూమి, నీటి విషయంలో ఎవరైనా వ్యతిరేకంగా మాట్లాడితే, ఎంతటి గొప్ప వ్యక్తి అయినా సరే సహించబోము” అని మంత్రి తంగడగి అన్నారు.
కమల్ హాసన్ వివరణ
తన వ్యాఖ్యలపై తీవ్ర వ్యతిరేకత రావడంతో, కమల్ హాసన్ స్పందించారు. తన వ్యాఖ్యలు “ప్రేమతో” చేసినవని, “ప్రేమ ఎప్పుడూ క్షమాపణ చెప్పదు” అని అన్నారు. భాషల గురించి మాట్లాడటానికి తాను సహా రాజకీయ నాయకులకు అర్హత లేదని, ఈ లోతైన చర్చలను చరిత్రకారులు, పురావస్తు శాస్త్రజ్ఞులు, భాషా నిపుణులకు వదిలేయాలని సూచించారు. అయితే, ఆయన ఈ వివరణ కన్నడిగుల ఆగ్రహాన్ని తగ్గించలేదని తెలుస్తోంది.
కన్నడ సంఘాలు ఇప్పటికే బెంగళూరు, మైసూర్, హుబ్బళ్లి వంటి నగరాల్లో నిరసనలు, పోస్టర్ల దహనాలు, సినిమాను బహిష్కరించాలని డిమాండ్ చేస్తున్నాయి. మాజీ KFCC అధ్యక్షుడు సా రా గోవిందు మాట్లాడుతూ, కమల్ హాసన్ క్షమాపణ చెప్పకపోతే నిరసనలను మరింత తీవ్రతరం చేస్తామని హెచ్చరించారు. ఈ వివాదం ‘థగ్ లైఫ్’ సినిమా విడుదలకు ముందు చిత్ర బృందానికి పెద్ద తలనొప్పిగా మారింది. ఈ సినిమా జూన్ 5న విడుదల కావాల్సి ఉంది.
