Visit:
Kalyanam Kamaneeyam Jeevitham | టాలీవుడ్లో ప్రతిభావంతులైన యువ నటీనటులు, కొత్త ఆలోచనలతో వస్తున్న టెక్నీషియన్లను ప్రోత్సహించే చిత్రాలకు ఎల్లప్పుడూ ప్రత్యేక స్థానం ఉంటుంది. ఆ కోవలోనే యూత్ మరియు ఫ్యామిలీ ఆడియన్స్ను ఏకకాలంలో అలరించే సరికొత్త కథాంశంతో ప్రేక్షకుల ముందుకు వస్తోన్న చిత్రం “కళ్యాణం కమనీయం జీవితం”. వివిఫై మీడియా ఫిల్మ్ ఫ్యాక్టరీ పతాకంపై పైలా ప్రసాద్ రావు, కిషోర్ గుండాల సంయుక్తంగా అత్యున్నత నిర్మాణ విలువలతో ఈ చిత్రాన్ని నిర్మించారు. రవి లోకిరెడ్డి దర్శకత్వం వహించిన ఈ సినిమాలో ఖాన్ దురాని, సాహితి ఆవంచ జంటగా నటిస్తున్నారు. అన్ని కార్యక్రమాలను పూర్తి చేసుకున్న ఈ చిత్రం, ఈ నెల 18న ప్రపంచవ్యాప్తంగా ఘనంగా థియేట్రికల్ రిలీజ్కు సిద్ధమైంది. తెలుగు రాష్ట్రాల్లో ఈ చిత్రాన్ని ప్రముఖ డిస్ట్రిబ్యూటర్ రాజవంశీ అత్యంత భారీ స్థాయిలో విడుదల చేస్తున్నారు.
ఈ నేపథ్యంలో చిత్ర యూనిట్ హైదరాబాద్లో అత్యంత ఘనంగా ట్రైలర్ లాంఛ్ ఈవెంట్ను నిర్వహించింది. టాలీవుడ్ ప్రముఖ స్టార్ డైరెక్టర్ వి.వి.వినాయక్, ప్రముఖ నిర్మాతలు కేఎల్ దామోదర ప్రసాద్, ప్రసన్న కుమార్ తదితరులు ముఖ్య అతిథులుగా విచ్చేసి సందడి చేశారు. ఈ వేడుకలో చిత్ర బృందం పంచుకున్న ఆసక్తికర విశేషాలు సినిమాపై అంచనాలను తారాస్థాయికి చేర్చాయి. సమాజంలో నేడు సర్వసాధారణంగా మారుతున్న భార్యాభర్తల బంధాలు, వాటి మధ్యలోకి ఒక మూడో వ్యక్తి ప్రవేశం వల్ల వచ్చే మనస్పర్థలు, ఆ సవాళ్లను ఎదుర్కొంటూ ఆ జంట తమ ప్రేమను, బంధాన్ని ఎలా నిలబెట్టుకున్నారు అనే సున్నితమైన భావోద్వేగాల సమాహారంగా ఈ సినిమాను తెరకెక్కించారు. ఎక్కడా అసభ్యతకు తావులేకుండా, కుటుంబం అంతా కలిసి నవ్వుతూ, భావోద్వేగానికి గురవుతూ చూసేలా ఈ క్లీన్ ఫ్యామిలీ అండ్ లవ్ ఎంటర్టైనర్ను రూపొందించినట్లు మేకర్స్ తెలిపారు.
ఈ వేడుకలో నిర్మాత పైలా ప్రసాద్ రావు మాట్లాడుతూ, తాము యూఎస్లో సాఫ్ట్వేర్ రంగంలో స్థిరపడినప్పటికీ సినిమాపై ఉన్న మక్కువతో గతంలో ’24 కిస్సెస్’ చిత్రాన్ని నిర్మించామని, ఇప్పుడు కొత్తవారితో మరింత ఇన్నోవేటివ్ కంటెంట్ను ప్రేక్షకులకు అందించాలనే తపనతో ఈ సినిమా చేశామని తెలిపారు. వ్యాపార లెక్కలకంటే మంచి సినిమా తీయాలనే ప్యాషన్తో పనిచేశామని, ఈ చిత్రంలోని లవ్, ఫ్యామిలీ ఎమోషన్స్ ప్రేక్షకులను కచ్చితంగా కదిలిస్తాయని పేర్కొన్నారు. మరో నిర్మాత కిషోర్ గుండాల మాట్లాడుతూ, ఈ సినిమా పోస్టర్ను లెజెండరీ రైటర్ విజయేంద్రప్రసాద్ విడుదల చేయడం, సాంగ్ను ఆస్కార్ విన్నర్ చంద్రబోస్ లాంఛ్ చేయడం తమ అదృష్టమని, నేడు వినాయక్ గారు అతిథిగా రావడం ఈ ఈవెంట్కు మరింత ప్రత్యేకత తెచ్చిందని ఆనందం వ్యక్తం చేశారు. ఇందులో వచ్చే ట్విస్టులు ప్రేక్షకులను సీట్ల అంచుల మీద కూర్చోబెడతాయని ధీమా వ్యక్తం చేశారు.
స్టార్ డైరెక్టర్ వి.వి.వినాయక్ మాట్లాడుతూ, కొత్త దర్శకులకు, అభిరుచిగల నిర్మాతలకు పరిశ్రమలో అండగా నిలవాల్సిన అవసరం ఉందని తెలిపారు. ప్రసాదరావు, కిషోర్ వంటి నిర్మాతలు ఇండస్ట్రీకి ఎంతో అవసరమని, ఈ సినిమా పెద్ద విజయం సాధించి ఇందులో నటించిన ప్రతి ఒక్కరికీ మంచి పేరు ప్రఖ్యాతలు తేవాలని మనసారా ఆశీర్వదించారు. నిర్మాత కేఎల్ దామోదర ప్రసాద్ మాట్లాడుతూ, కంటెంట్ బాగుంటే చిన్న సినిమా అనే తేడా లేకుండా ప్రేక్షకులు ఎప్పుడూ ఆదరిస్తారని, ఈ సినిమా ట్రైలర్ చూస్తుంటే చాలా రిచ్గా, ప్రామిసింగ్గా ఉందని కొనియాడారు. ప్రొడ్యూసర్ ప్రసన్న కుమార్ మాట్లాడుతూ, ఈ చిత్రం నేటి ట్రెండ్కు తగ్గట్టుగా ఒక ‘అర్జున్ రెడ్డి’ లేదా ‘బేబి’ రేంజ్ ఇంపాక్ట్ ఇచ్చేలా కంటెంట్తో వస్తోందని, ఈ ప్రయత్నం తప్పకుండా విజయవంతం కావాలని ఆకాంక్షించారు.
మ్యూజిక్ డైరెక్టర్ శ్రీ మురళీ కార్తికేయ మాట్లాడుతూ, తాను అందించిన ట్యూన్స్ మరియు బ్యాక్గ్రౌండ్ స్కోర్కు తగినంత సమయం దొరకడంతో అద్భుతమైన అవుట్పుట్ వచ్చిందని, లిరిక్స్ కూడా సినిమాకు ప్రధాన బలంగా నిలిచాయని తెలిపారు. దర్శకుడు రవి లోకిరెడ్డి మాట్లాడుతూ, తన కెరీర్లో ఎదురైన ఇబ్బందికర పరిస్థితులను దాటుకుని ఈ సినిమాతో ఒక మంచి సువర్ణావకాశం దక్కించుకున్నానని, రచయిత ఎన్.సి. అరవింద్ ఏకలవ్య అందించిన అద్భుతమైన పాయింట్కు స్క్రీన్ ప్లే తోడై సినిమాను నెక్స్ట్ లెవెల్కు తీసుకెళ్లిందని తెలిపారు. ప్రముఖ నటుడు సత్యానంద్ ఇందులో ఒక కీలక పాత్ర పోషించడం తమ చిత్రానికి అదనపు బలం అని పేర్కొన్నారు.
హీరోయిన్ సాహితీ ఆవంచ మాట్లాడుతూ, టీమ్లోని ప్రతి ఒక్కరూ ఎంతో ప్యాషన్తో పనిచేశారని, ప్రతి ఫ్రేమ్లోనూ క్వాలిటీ కనిపిస్తుందని తెలిపారు. హీరో ఖాన్ దురాని మాట్లాడుతూ, తాను కెమెరామెన్గా అనుభవం ఉన్నప్పటికీ హీరో కావాలనే లక్ష్యంతో కెమెరా, ఎడిటింగ్, కలరింగ్ వంటి అన్ని విభాగాలపై పట్టు సాధించి ఈ జర్నీలోకి వచ్చానని చెప్పారు. కష్టపడి చేసిన ఈ క్లీన్ ఫ్యామిలీ ఎంటర్టైనర్ను ప్రేక్షకులు థియేటర్లలో చూసి ఆదరించాలని కోరారు. ఈ చిత్రంలో ఉదయ్ పులిమి, విషిక, కాకినాడ నాని, ధనలక్ష్మి బల్ల తదితరులు ఇతర ప్రధాన పాత్రల్లో నటించారు.
