Kaikala: నాన్నగారు కోలుకుంటున్నారు.. త‌ప్పుడు వార్త‌లు నమ్మోద్దంటున్న కైకాల కూతురు

ఎన్నో సినిమాల్లో క్యారెక్ట్ ఆర్టిస్ట్ గా, కమెడియన్ గా, విలన్ గా నటించి జనాల్ని అలరించారు కైకాల సత్యనారాయణ. గత కొద్ది కాలంగా వయోభారంతో సినిమాలకి దూరమయ్యారు. ఇటీవల కైకాలకి ఆరోగ్య పరిస్థితి విషమించడంతో అపోలో హాస్పిటల్ లో చేర్పించారు. అప్పట్నుంచి ఆయన్ను వెంటిలేటర్ పై ఉంచి చికిత్స అందిస్తున్నారు.

కొద్దిరోజుల క్రితం త‌న ఇంట్లో జారిపడ్డ కైకాల‌ నొప్పులు కాస్త ఎక్కువ‌గా ఉండ‌డంతో సికింద్రాబాద్‌లోని ఓ ప్రైవేటు హాస్పిటల్‌లో వైద్యం పొందుతున్నారు. ఆరోగ్య పరిస్థితి విషమంగా ఉండడంతో.. జూబ్లీ హిల్స్‌లోని అపోలో ఆసుపత్రికి త‌ర‌లించారు. అయితే ఆయన మ‌ర‌ణించిన‌ట్టు త‌ప్పుడు ప్ర‌చారం జ‌ర‌గ‌గా, కైకాల కూతురు ఖండించింది.

అందరికి నమస్కారం. నేను కైకాల సత్యనారాయణ గారమ్మాయి రమాదేవిని. నాన్న గారు ప్రస్తుతం హాస్పిటల్లోనే ఉన్నారు. ఆయన ఆరోగ్య పరిస్థితి బాగుంది. డాక్టర్స్ అందించే చికిత్సకి స్పందిస్తున్నారు. అందరితో మాట్లాడుతున్నారు కూడా. దయచేసి ఆయన ఆరోగ్యంపై ఎవరూ ఆందోళన చెందక్కర్లేదు. అలాగే దయచేసి ఆయన ఆరోగ్యంపై అనవసర వార్తలను రాయడం, ప్రసారం చేయడం లాంటివి చేయకండి. ఆయన ఆరోగ్యంపై అనవసర వార్తలను ప్రసారం చేసి జనాల్ని ఆందోళన పరచవద్దు” అని తెలిపారు.