మంచి పాట కోసం థియేటర్‌కు వస్తారు

మలయాళ చిత్రం ‘హృదయం’ ద్వారా దక్షిణాది సంగీత ప్రియుల దృష్టిని ఆకర్షించారు స్వరకర్త హేషమ్‌ అబ్దుల్‌ వాహబ్‌. ప్రస్తుతం ఆయన ‘ఖుషి’ చిత్రానికి బాణీలను సమకూర్చారు. విజయ్‌ దేవరకొండ, సమంత జంటగా శివ నిర్వాణ దర్శకత్వంలో తెరకెక్కిన ఈ చిత్రం సెప్టెంబర్‌ 1న విడుదలకానుంది.

మలయాళ చిత్రం ‘హృదయం’ ద్వారా దక్షిణాది సంగీత ప్రియుల దృష్టిని ఆకర్షించారు స్వరకర్త హేషమ్‌ అబ్దుల్‌ వాహబ్‌. ప్రస్తుతం ఆయన ‘ఖుషి’ చిత్రానికి బాణీలను సమకూర్చారు. విజయ్‌ దేవరకొండ, సమంత జంటగా శివ నిర్వాణ దర్శకత్వంలో తెరకెక్కిన ఈ చిత్రం సెప్టెంబర్‌ 1న విడుదలకానుంది. ఈ చిత్ర గీతాలు మ్యూజిక్‌ ఛార్ట్స్‌లో అగ్ర భాగాన కొనసాగుతున్నాయి. ఈ సందర్భంగా మ్యూజిక్‌ డైరెక్టర్‌ హేషమ్‌ అబ్దుల్‌ వాహబ్‌ మాట్లాడుతూ “ఖుషి’ కథ వినగానే ఫీల్‌గుడ్‌ లవ్‌స్టోరీ అనిపించింది. వెంటనే అంగీకరించా. ఈ సినిమాలో ‘నా రోజా నువ్వే’ మొదలుకొని ‘ఓసీ పెళ్లామా’ వరకు అన్ని పాటలకు శ్రోతల ఆదరణ లభిస్తున్నది.

ఈ సినిమా మ్యూజిక్‌ సిట్టింగ్స్‌ నెల రోజుల పాటు నిర్వహించాం. అందుకే పాటలు అద్భుతంగా కుదిరాయి. ‘నా రోజా నువ్వే’ పాటలో మణిరత్నం సినిమా టైటిల్స్‌తో లిరిక్స్‌ ఉంటాయి. ఈ పాట థీమ్‌ బాగా వర్కవుట్‌ అయింది. దర్శకుడు శివ నిర్వాణకు సంగీతం పట్ల మంచి అవగాహన ఉంది. ఆయన అభిరుచికి తగినట్లుగా పాటలను సిద్ధం చేశాను. మంచి పాటలతో ప్రేక్షకులను థియేటర్లకు రప్పించవొచ్చు. ఈ విషయాన్ని నేను బాగా నమ్ముతాను. ‘ఖుషి’ సినిమాకు చక్కటి ప్రేమకథతోపాటు పాటలు కూడా బాగా కుదిరాయి. తప్పకుండా సినిమా పెద్ద విజయం సాధిస్తుందనే నమ్మకం ఉంది. ప్రస్తుతం నాని ‘హాయ్‌ నాన్న’ చిత్రానికి సంగీతాన్నందిస్తున్నా’ అన్నారు.