గోపీచంద్ సీటీమార్ రిలీజ్ మళ్లీ వాయిదా.. కొత్త డేట్ ఎప్పుడంటే..?

August 28, 2021 / 10:05 PM IST

మొన్నటికి మొన్న సెప్టెంబర్ 3న తమ సినిమా వస్తుందని అనౌన్స్ చేశారు సీటీమార్ దర్శక నిర్మాతలు. ప్రకటించిన మూడు రోజుల తర్వాత మనసు మార్చుకున్నారు. ఈ సినిమాను మరోసారి వాయిదా వేస్తున్నట్లు అధికారికంగా ప్రకటించారు. దాంతో గోపీచంద్ అభిమానులు నిరాశలో మునిగిపోయారు. కరోనా కాస్త తగ్గినట్లు అనిపించినా కూడా ఇప్పటికీ కేసులు బాగానే వస్తున్నాయి. దాంతో కొందరు నిర్మాతలు తమ సినిమాలు ఓటీటీకే ఇస్తున్నారు. సంపత్ నంది తెరకెక్కించిన సీటీమార్ సినిమా కూడా ఓటీటీలో విడుదలవుతుందని మొన్నటివరకు ప్రచారం జరిగినా చివరికి థియేటర్స్‌వైపు అడుగులు పడుతున్నాయి. ఈ క్ర‌మంలోనే సెప్టెంబ‌ర్ 3న ఈ సినిమా రిలీజ్ చేయ‌నున్న‌ట్లు ప్ర‌క‌టించారు. కానీ ఇప్పుడు నిర్మాత‌లు మ‌న‌సు మార్చుకున్నారు.

సెప్టెంబ‌ర్ 3వ తేదీకి బదులు వినాయ‌క చ‌వితి కానుక‌గా సెప్టెంబ‌ర్ 10న సీటీమార్ సినిమాను విడుద‌ల చేయాల‌ని ద‌ర్శ‌క నిర్మాత‌లు నిర్ణ‌యించుకున్నారు. నిజానికి ఆ రోజు సాయిప‌ల్ల‌వి, నాగ‌చైత‌న్య న‌టించిన ల‌వ్‌స్టోరీ సినిమా రావాల్సి ఉంది. అయితే ఆ సినిమా రిలీజ్‌ వాయిదా ప‌డింది. ఏపీలో నాలుగు షోల‌కు అనుమ‌తి వ‌చ్చిన త‌ర్వాత‌నే త‌మ సినిమాను విడుద‌ల చేస్తామ‌ని చెప్పాడు ల‌వ్ స్టోరీ నిర్మాత సునీల్ నారంగ్‌. ఈ సినిమా వాయిదాతో వినాయ‌క చ‌వితికి డేట్ ఖాళీ అయిపోయింది. దాన్నిప్పుడు గోపీచంద్ భ‌ర్తీ చేస్తున్నాడు. సెప్టెంబ‌ర్ 10న భారీగా సీటీమార్ విడుద‌ల కానుంది.

లౌక్యం తర్వాత గోపీచంద్ ఖాతాలో ఇప్పటి వరకు మరో హిట్ లేదు. దాంతో ఈయన ఆశలన్నీ ఇప్పుడు సీటీమార్ సినిమాపైనే ఉన్నాయి. ఈ సినిమా కబడ్డీ నేపథ్యంలో సినిమా సాగుతుంది. ఈ సినిమాలో ఆంధ్ర ఫీమేల్ కబడ్డీ టీమ్ కోచ్ బాలారెడ్డిగా గోపీచంద్.. తెలంగాణ ఫీమేల్ కబడ్డీ టీమ్ కోచ్‌ జ్వాలా రెడ్డిగా మిల్కీ బ్యూటీ తమన్నా నటిస్తున్నారు. ఈ మధ్యే విడుదలైన టీజర్‌కు మంచి రెస్పాన్స్ వచ్చింది. భారీ బడ్జెట్‌, హై టెక్నికల్ వాల్యూస్‌తో పవన్‌ కుమార్ సమర్పణలో శ్రీనివాసా సిల్వర్‌ స్క్రీన్‌ పతాకంపై శ్రీనివాసా చిట్టూరి ఈ చిత్రాన్నినిర్మిస్తున్నాడు. ఈ సినిమాతో హిట్ కొట్టి ఫామ్ లోకి రావాలని చూస్తున్నాడు గోపీచంద్.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి