గోదావరిఖని ప్రాంతమే ‘ది ప్యారడైజ్‌’కు స్ఫూర్తి

‘నేను తొమ్మిదో తరగతిలో ఉన్నప్పుడు ‘జగడం’ సినిమా చూశా. అప్పుడే దర్శకుడు కావాలని ఫిక్సై పోయాను. ఇంటర్మీడియెట్‌ తర్వాత హైదరాబాద్‌ వచ్చి నాలుగేళ్లు ప్రయత్నించి సుకుమార్‌గారి దగ్గర సహాయ దర్శకుడిగా చేరాను. అలా నా సినీ ప్రయాణం మొదలైంది’ అని చెప్పారు యువ దర్శకుడు శ్రీకాంత్‌ ఓదెల. తొలి సినిమా ‘దసరా’తో సంచలనం సృష్టించి పరిశ్రమ దృష్టిని ఆకర్షించిన ఈ గోదావరిఖని యువకుడు తన ద్వితీయ ప్రయత్నంగా నానితో ‘ది ప్యారడైజ్‌' చిత్రాన్ని తెరకెక్కించారు.

‘నేను తొమ్మిదో తరగతిలో ఉన్నప్పుడు ‘జగడం’ సినిమా చూశా. అప్పుడే దర్శకుడు కావాలని ఫిక్సై పోయాను. ఇంటర్మీడియెట్‌ తర్వాత హైదరాబాద్‌ వచ్చి నాలుగేళ్లు ప్రయత్నించి సుకుమార్‌గారి దగ్గర సహాయ దర్శకుడిగా చేరాను. అలా నా సినీ ప్రయాణం మొదలైంది’ అని చెప్పారు యువ దర్శకుడు శ్రీకాంత్‌ ఓదెల. తొలి సినిమా ‘దసరా’తో సంచలనం సృష్టించి పరిశ్రమ దృష్టిని ఆకర్షించిన ఈ గోదావరిఖని యువకుడు తన ద్వితీయ ప్రయత్నంగా నానితో ‘ది ప్యారడైజ్‌’ చిత్రాన్ని తెరకెక్కించారు. ఈ నెల 24న ప్రపంచవ్యాప్తంగా ఈ సినిమా విడుదలకానుంది. ఈ సందర్భంగా శనివారం దర్శకుడు శ్రీకాంత్‌ ఓదెల విలేకరులతో ముచ్చటిస్తూ పంచుకున్న విశేషాలు..

నిజ జీవితంలో నేను చూసిన సంఘటనలకు కాల్పనిక అంశాల్ని జోడించి ‘ది ప్యారడైజ్‌’ కథ సిద్ధం చేశా. ఇందులో ఉండే తిరుగుబాటుతత్వం, ధిక్కారాన్ని ప్రదర్శించే పాత్రలకు నేను పుట్టి పెరిగిన గోదావరిఖని ప్రాంతమే స్ఫూర్తినిచ్చింది. నేను కొంతకాలం సికింద్రాబాద్‌ రైల్వే క్వార్టర్స్‌లో ఉన్నా. ఆ పక్కన ఉండే బస్తీ జీవితాన్ని చూస్తున్నప్పుడు మా ఉరిలో జరిగిన సంఘటనలు గుర్తొచ్చేవి. ఈ కారణంగానే సికింద్రాబాద్‌ నేపథ్యంలో ఈ సినిమా స్క్రిప్ట్‌ రాశాను.

• ఈ కథలో తల్లీకొడుకుల సెంటిమెంట్‌ ప్రధానంగా ఉంటుంది. ఇంట్లో ఆడపిల్ల ఉంటే బాగుంటుందని మా అమ్మ కోరుకునేది. కానీ అలా జరగలేదు. దాంతో చిన్నతనంలో నాకు జడలు, గౌను వేసి మురిసిపోయేవాళ్లు. రెండో తరగతి వరకు నాకు జడలు ఉండేవి. నాటి జ్ఞాపకాల నుంచే సినిమాలో నానికి జడలు పెట్టాలనే ఆలోచన వచ్చింది.
• ట్రైలర్‌ కట్‌ చేయడానికి చాలా సమయం కావాలి. ప్రస్తుతం ఉన్న బిజీ షెడ్యూల్‌లో అది సాధ్యం కాలేదు. అందుకే ట్రైలర్‌ ఇవ్వలేకపోయాం. మనం చిన్నప్పుడు ఏమీ చూడకుండానే థియేటర్‌కు వెళ్లి ప్రతీ మూమెంట్‌కు సర్‌ప్రైజ్‌ అయ్యేవాళ్లం. నాకు అలా సినిమా చూడటమే ఇష్టం. నా తదుపరి చిత్రాన్ని కూడా సాధ్యమైనంత తక్కువ అప్‌డేట్స్‌తోనే తీసుకురావాలనే ఆలోచనతో ఉన్నా.
• ముందుగా సిద్ధం చేసిన బౌండ్‌ స్క్రిప్ట్‌తోనే సెట్స్‌మీదకు వెళ్లాం. ఎక్కడా రీషూట్స్‌ చేయలేదు. మేము వేసుకున్న ప్రణాళికల అమలులో లోపం వల్ల షూటింగ్‌ ఆలస్యమైంది. నేను అనుకున్న అవుట్‌పుట్‌ వచ్చేంతవరకు షూటింగ్‌ చేయడం వల్ల కొంత ఆలస్యం జరిగింది.
• నాని, నేను అన్నదమ్ముల్లా మాట్లాడుకుంటాం.దర్శకుడిగా నాకు ఆయన జీవితాన్ని ఇచ్చాడు. ఆ కృతజ్ఞత జీవితాంతం ఉంటుంది. నేను నానితో ప్రతీ విషయాన్ని షేర్‌ చేసుకుంటాను. ఇక ఈ సినిమాలో మోహన్‌బాబుగారు పోషించిన ప్రతినాయకుడి పాత్ర చాలా కీలకం. ఆయనతో నాని చేసే పోరాటం చాలా ఆసక్తికరంగా అనిపిస్తుంది.
• సినిమాలో ఇటీవల విడుదల చేసిన ‘ఏష నాగుల కట్టమీద’ పాటకు అద్భుతమైన స్పందన వస్తున్నది. ఏడో తరగతి రోజుల్లో ఆటోలో వెళ్తున్నప్పుడు ఈ పాట పెట్టేవారు. వాస్తవానికి ‘దసరా’లోనే ఈ పాట పెట్టాలనుకున్నాం. మ్యూజిక్‌ డైరెక్టర్‌ అనిరుధ్‌కి ఈ ఐడియా చెప్పిన వెంటనే ఓకే అన్నాడు. స్వతహాగా నాకు తెలంగాణ జానపద గీతాలంటే చాలా ఇష్టం.
• నాకు సుకుమార్‌తో పాటు కృష్ణవంశీ, రాజమౌళి, శేఖర్‌ కమ్ముల, పూరి జగన్నాథ్‌ చాలా ఇష్టమైన దర్శకులు. వీదందరి ప్రభావం నాపై ఉంది. భవిష్యత్తులో శేఖర్‌ కమ్ముల తరహాలో సున్నితమైన ప్రేమకథ చేయాలని ఉంది. ఇక చిరంజీవిగారితో సినిమా తప్పకుండా ఉంటుంది. ‘ప్యారడైజ్‌’ రిలీజ్‌ తర్వాత ఓ మూడు నెలలు విశ్రాంతి తీసుకొని కుటుంబంతో గడపాలనుకుంటున్నా. ఇదే విషయాన్ని చిరంజీవిగారితో కూడా చెప్పాను (నవ్వుతూ).