Visit:
Fatima Sana Shaikh | ‘దంగల్’ సినిమాలో రెజ్లర్ గీతా ఫోగాట్ పాత్రతో దేశవ్యాప్తంగా గుర్తింపు తెచ్చుకున్న ఫాతిమా సనా షేక్, తాజాగా నటనతో కాకుండా తన సాహసంతోనే వార్తల్లో నిలిచింది. అమీర్ ఖాన్ కూతురు పాత్రలో ప్రేక్షకులను మెప్పించిన ఈ నటికి ఆ తర్వాత ఆశించిన స్థాయిలో కథానాయిక అవకాశాలు రాకపోవడం ఎన్నో చర్చలకు దారితీసింది. అయితే కెరీర్ పరంగా ఎన్ని ఒడిదుడుకులు ఎదురైనా, ఫాతిమా మాత్రం తన వ్యక్తిత్వం, ధైర్యంతో ఎప్పుడూ ప్రత్యేకంగా కనిపిస్తూనే ఉంది. ఇటీవల ఒక ఇంటర్వ్యూలో తనకు నటనకు ఆస్కారం ఉన్న పాత్రలు చేయాలనే కోరిక ఉన్నప్పటికీ, అలాంటి ఆఫర్లు తక్కువగా వస్తున్నాయని ఫాతిమా ఆవేదన వ్యక్తం చేసింది. అయినా సరే, ఆమె మాటల్లో ఎక్కడా నిరాశ కంటే ఆత్మవిశ్వాసమే ఎక్కువగా కనిపిస్తుంది. ఇదే ధైర్యం ఆమెను సోషల్ మీడియాలో కూడా ఎప్పటికప్పుడు ట్రెండ్ చేస్తోంది.
తాజాగా ఫాతిమా షేర్ చేసిన ఓ వీడియో నెట్టింట వైరల్గా మారింది. కొండ ప్రాంతంలో ఉన్న ఓ లోతైన కొలనులోకి అత్యంత ఎత్తు నుంచి దూకిన వీడియో చూసిన నెటిజన్లు ఆశ్చర్యపోతున్నారు. సాధారణంగా అలాంటి ప్రదేశాల్లో ఈత కొట్టడమే ప్రమాదకరం, అలాంటిది అంత ఎత్తు నుంచి దూకడం అంటే మామూలు విషయం కాదు. రాళ్లు ఉండే అవకాశాలు, ప్రమాదాల ముప్పు ఉన్నప్పటికీ ఫాతిమా ఆ సాహసం చేయడం ఆమె ధైర్యానికి నిదర్శనంగా మారింది. ఈ వీడియోతో పాటు ఫాతిమా తన అనుభూతులను కూడా పంచుకుంది. జంప్ చేయడానికి ముందు దాదాపు 20 నిమిషాల పాటు తాను సందిగ్ధంలో ఉన్నానని, ధైర్యం తెచ్చుకోవడానికి చాలా కష్టపడ్డానని చెప్పింది. గాల్లో ఉన్న క్షణం చాలా పొడవుగా అనిపించిందని, నీటిని తాకేలోపు వింత అనుభూతి కలిగిందని ఆమె వివరించింది. అయితే జంప్ చేసిన తర్వాత మాత్రం అంతా నార్మల్గా అనిపించిందని, ఒక పెద్ద ఛాలెంజ్ను జయించిన ఆనందం కలిగిందని వెల్లడించింది.
ఈ వీడియో చూసిన అభిమానులు మాత్రమే కాదు, సినీ వర్గాలు కూడా ఫాతిమా ధైర్యాన్ని ప్రశంసిస్తున్నాయి. సాధారణంగా హీరోయిన్లు స్విమ్మింగ్ పూల్లో జంప్ చేయడానికే భయపడతారు, అలాంటిది సహజ ప్రదేశంలో, అంత ఎత్తు నుంచి దూకడం నిజంగా అభినందనీయమని కామెంట్స్ చేస్తున్నారు. చాలా మంది యువతులకు ఫాతిమా ఒక ఇన్స్పిరేషన్ అంటూ సోషల్ మీడియాలో ప్రశంసలు కురుస్తున్నాయి. మొత్తానికి, సినిమాల్లో అవకాశాలు ఎలా ఉన్నా… నిజ జీవితంలో సాహసం, ఆత్మవిశ్వాసం ఉంటే గుర్తింపు తప్పకుండా వస్తుందని ఫాతిమా సనా షేక్ మరోసారి నిరూపించింది.
View this post on Instagram
