శ్రీదేవి సోడా సెంటర్‌ ఆనందికి పెళ్లయిందా?

‘ఈరోజుల్లో’ సినిమాలో చిన్నపాత్రలో కనిపించినా,అదే ఏడాది ‘బస్‌స్టాప్‌’తో హీరోయిన్‌గా వెండితెర మీద వెలిగిపోయింది ఆనంది. 2014లో ‘కాయల్‌’ విజయంతో, కాయల్‌ ఆనందిగా స్థిర
పడిపోయింది. ఆ సినిమాలో నటనకు తమిళనాడు రాష్ట్ర పురస్కారానికి నామినేట్‌ అయ్యింది.

జనవరిలో ఏ హంగూ ఆర్భాటం లేకుండా కుటుంబ సభ్యుల సమక్షంలో సోక్రటీస్‌ అనే కుర్రాడిని మనువాడింది. మెరైన్‌ ఇంజినీరింగ్‌ గ్రాడ్యుయేట్‌ అయిన సోక్రటీస్‌ పలు తమిళ సినిమాలకు
అసిస్టెంట్‌ డైరెక్టర్‌గా పనిచేస్తున్నాడు. ‘నచ్చినవాడిని పెండ్లాడాను. ఇక, విభిన్న పాత్రల్లో నటించి గుర్తింపు తెచ్చుకోవాలని ఉంది’ అంటూ తన ఆశలను పంచుకున్నది ఆనంది.

తెలుగులో పరిచయమై,తమిళంలో రాణిస్తున్న ఆనంది సొంతూరు వరంగల్‌. అసలు పేరు హసిక. సినిమాల్లోకి వచ్చాక కొత్త పేరుతో పాపులర్‌ అయ్యింది. ఓ తమిళ సినిమా కోసం హసిక పేరును
రక్షితగా మార్చారు. అలా ఆనందిని తెలుగు, తమిళ అభిమానులు ముచ్చటగా మూడు పేర్లతో పిలుచుకొంటున్నారు.

లాక్‌డౌన్‌తో సినిమా షూటింగ్‌లు ఆగిపోవడంతో వెబ్‌ సిరీస్‌లపై దృష్టి పెట్టింది. తెలుగులో డబ్‌ అయిన తమిళ వెబ్‌ సిరీస్‌ ‘లైవ్‌ టెలికాస్ట్‌’లో కలై పాత్రలో ఆనంది నటనకు విమర్శకుల ప్రశంసలు దక్కాయి. తమిళంలో ఆనంది నటించిన రెండు సినిమాలువిడుదలకు సిద్ధంగా ఉన్నాయి. మరో రెండు షూటింగ్‌ దశలో ఉన్నాయి. ఈ ఏడాది మలయాళ పరిశ్రమలోనూ అడుగుపెట్టనుందీ తెలంగాణ చిన్నది.

స్కిన్‌ షోకు దూరంగా ఉంటూ పదహారణాల ప్రతిభతో రాణిస్తున్నది ఆనంది. పలు చిత్రాల్లో సంప్రదాయ కట్టూ బొట్టుతో కనిపించి తెలుగుదనానికి నిలువెత్తు నిర్వచనంగా నిలిచింది.
సత్తా ఉంటే ఎప్పటికైనా అవకాశాలు వస్తాయన్నది తన నమ్మకం.

తమిళంలో వరుస అవకాశాలు అందుకుంటూ మంచి గుర్తింపును తెచ్చుకుంటున్న ఆనంది, దాదాపు ఆరేండ్ల గ్యాప్‌ తర్వాత ‘జాంబిరెడ్డి’తో మరోమారు తెలుగు ప్రేక్షకులను పలకరించింది. ‘శ్రీదేవి సోడా సెంటర్‌’లో సుధీర్‌బాబు సరసన ‘సోడాల శ్రీదేవి’గా టాలీవుడ్‌లో తన స్థానాన్ని సుస్థిరం చేసుకునే ప్రయత్నం చేసింది.