రేప‌టి నుండి ఎంజీయూలో దక్షిణ భారత చరిత్రకారుల సమాగమం

దక్షిణ భారతదేశ చరిత్రకు సంబంధించిన నూతన పరిశోధనలు, చారిత్రక అంశాలపై విస్తృత చర్చలకు నల్లగొండలోని మహాత్మాగాంధీ విశ్వవిద్యాలయం వేదిక కానుంది. ఎంజీయూ చరిత్ర, పర్యాటక శాఖ ఆధ్వర్యంలో ఈ నెల 13 నుండి 15వ తేదీ వరకు నిర్వహించనున్న 45వ సౌత్‌ ఇండియన్‌ హిస్టరీ కాంగ్రెస్‌కు...

– మూడు రోజుల పాటు 45వ సౌత్‌ ఇండియన్‌ హిస్టరీ కాంగ్రెస్‌
– దేశవ్యాప్తంగా 1,200 మందికి పైగా చరిత్రకారులు, పరిశోధకులు, అధ్యాపకుల హాజరు
– తెలంగాణ ఏర్పాటు తర్వాత తొలి పర్యాయం ఎంజీయూలో నిర్వహణ
– ప్రారంభోత్సవానికి హాజరు కానున్న ఉన్నత విద్యామండలి చైర్మన్ బాలకృష్ణారెడ్డి

రామగిరి, నవంబర్ 12 : దక్షిణ భారతదేశ చరిత్రకు సంబంధించిన నూతన పరిశోధనలు, చారిత్రక అంశాలపై విస్తృత చర్చలకు నల్లగొండలోని మహాత్మాగాంధీ విశ్వవిద్యాలయం వేదిక కానుంది. ఎంజీయూ చరిత్ర, పర్యాటక శాఖ ఆధ్వర్యంలో ఈ నెల 13 నుండి 15వ తేదీ వరకు నిర్వహించనున్న 45వ సౌత్‌ ఇండియన్‌ హిస్టరీ కాంగ్రెస్‌కు అన్ని ఏర్పాట్లు పూర్తయ్యాయి. మూడు రోజుల పాటు జరిగే ఈ జాతీయస్థాయి సదస్సుకు దేశంలోని వివిధ విశ్వవిద్యాలయాల నుండి సుమారు 1,200 మందికి పైగా చరిత్రకారులు, ఆచార్యులు, అధ్యాపకులు, పరిశోధకులు, విద్యార్థులు హాజరుకానున్నారు. ఈ జాతీయస్థాయి సదస్సు నిర్వహణ ద్వారా మహాత్మా గాంధీ విశ్వవిద్యాలయానికి జాతీయస్థాయిలో గుర్తింపు మరింత పెరగడంతోపాటు విద్యార్థుల్లో చరిత్ర అధ్యయనం, పరిశోధనల పట్ల ఆసక్తి పెరుగుతుందని విద్యావేత్తలు పేర్కొంటున్నారు. చారిత్రక పరిశోధనలకు, విద్యా విజ్ఞాన మార్పిడికి, తెలంగాణ ప్రాంత చరిత్ర ప్రాచుర్యానికి ఈ మూడు రోజుల సదస్సు కీలక వేదికగా నిలవనుంది.

ఎనిమిది ప్యానెళ్లలో పరిశోధన పత్రాలు

సదస్సులో సామాజిక, రాజకీయ, సాంస్కృతిక, ఆర్థిక చరిత్రతో పాటు దక్షిణ భారతదేశ చరిత్రకు సంబంధించిన వివిధ అంశాలపై ఎనిమిది ప్యానెళ్లలో పరిశోధన పత్రాల సమర్పణ, చర్చలు నిర్వహించనున్నారు. చరిత్ర పరిశోధనలో నూతన ధోరణులు, వెలుగులోకి వస్తున్న చారిత్రక ఆధారాలు, ప్రాంతీయ చరిత్ర ప్రాధాన్యత తదితర అంశాలపై నిపుణులు తమ అభిప్రాయాలను పంచుకోనున్నారు.

ప్రారంభోత్సవానికి ఉన్నత విద్యామండలి చైర్మన్‌

సదస్సు ప్రారంభోత్సవానికి తెలంగాణ రాష్ట్ర ఉన్నత విద్యామండలి చైర్మన్‌ ఆచార్య వి. బాలకృష్ణారెడ్డి ముఖ్య అతిథిగా హాజరుకానున్నారు. బెంగళూరు విశ్వవిద్యాలయానికి చెందిన ఆచార్య షేక్‌ మస్తాన్‌ ప్రధాన ఉపన్యాసం చేయనున్నారు. సౌత్‌ ఇండియన్‌ హిస్టరీ కాంగ్రెస్‌ అధ్యక్షుడు ఆచార్య విక్టర్‌బాబు సదస్సు కార్యక్రమాలను సమన్వయం చేస్తున్నారు.

తెలంగాణ చరిత్ర, నల్లగొండ పర్యాటకానికి ప్రత్యేక ప్రాధాన్యం

తెలంగాణ రాష్ట్రం ఏర్పడిన తర్వాత తొలిసారిగా ఈ సౌత్‌ ఇండియన్‌ హిస్టరీ కాంగ్రెస్‌ ఎంజీయూలో నిర్వహిస్తుండటం విశేషం. ఈ సదస్సు ద్వారా తెలంగాణ చారిత్రక వైభవాన్ని దేశవ్యాప్తంగా పరిచయం చేయడంతోపాటు నల్లగొండ జిల్లాలోని చారిత్రక కట్టడాలు, వారసత్వ సంపద, పర్యాటక ప్రదేశాలకు విస్తృత ప్రచారం కల్పించేందుకు అవకాశం కలుగుతుందని నిర్వాహకులు అభిప్రాయపడ్డారు. దక్షిణ భారతదేశ చరిత్రలో నూతన పరిశోధనలకు ఈ సదస్సు మరింత ప్రోత్సాహాన్ని అందించనుంది.

వీసీ ఖాజా అల్తాఫ్‌ హుస్సేన్ ఏర్పాట్ల ప‌రిశీల‌న‌

సదస్సు నిర్వహణకు అవసరమైన వసతి, సమావేశ మందిరాలు, పరిశోధన పత్రాల సమర్పణ, ప్రతినిధుల రిజిస్ట్రేషన్‌ తదితర ఏర్పాట్లను విశ్వవిద్యాలయ అధికారులు పూర్తి చేశారు. ఉపకులపతి ఆచార్య ఖాజా అల్తాఫ్‌ హుస్సేన్‌, రిజిస్ట్రార్‌ ఆచార్య కొప్పుల అంజిరెడ్డి ఏర్పాట్లను స్వయంగా పర్యవేక్షించారు. సదస్సు కన్వీనర్‌గా రిజిస్ట్రార్‌ ఆచార్య కొప్పుల అంజిరెడ్డి, కో-కన్వీనర్‌గా చరిత్ర, పర్యాటక శాఖకు చెందిన ఆచార్య విజయబాబు, స్థానిక కార్యదర్శిగా డాక్టర్‌ పనస రామకృష్ణ వ్యవహరిస్తున్నారు.