Dharmendra | ఢిల్లీ ఫిల్మ్ ఫెస్టివల్‌లో ధర్మేంద్రపై ప్రత్యేక ఎగ్జిబిషన్.. భావోద్వేగానికి లోనైన హేమ మాలిని

IFFD 2026 | దేశ రాజ‌ధాని ఢిల్లీలో ప్రారంభం కానున్న మొట్టమొదటి అంతర్జాతీయ చలనచిత్రోత్సవం (IFFD 2026) భారతీయ సినీ దిగ్గజం ధర్మేంద్రకు అపురూపమైన గౌరవాన్ని అందించబోతోంది.

దేశ రాజ‌ధాని ఢిల్లీలో ప్రారంభం కానున్న మొట్టమొదటి అంతర్జాతీయ చలనచిత్రోత్సవం (IFFD 2026) భారతీయ సినీ దిగ్గజం ధర్మేంద్రకు అపురూపమైన గౌరవాన్ని అందించబోతోంది. గత ఏడాది నవంబర్ 24న కన్నుమూసిన తన భర్త ధర్మేంద్రకు ఈ వేడుకలో ఘన నివాళి అర్పించనున్నట్లు నటి, ఎంపీ హేమ మాలిని సంతోషం వ్యక్తం చేశారు.

మార్చి 25 నుంచి 31 వరకు ఢిల్లీలోని భారత్ మండపంలో జరిగే ఈ ప్రతిష్టాత్మక ఉత్సవాల్లో ధర్మేంద్ర నటించిన ఐకానిక్ చిత్రాలను ప్రత్యేకంగా ప్రదర్శించబోతున్నారు. కేవలం సినిమాలే కాకుండా, ఆయన సుదీర్ఘ సినీ ప్రస్థానాన్ని ప్రతిబింబించేలా అరుదైన ఫోటోలు, పోస్టర్లు మరియు వ్యక్తిగత జ్ఞాపకాలతో ఒక ప్రత్యేక ఎగ్జిబిషన్‌ను కూడా ఏర్పాటు చేశారు. ఈ సందర్భంగా హేమ మాలిని మాట్లాడుతూ, భారతీయ సినిమాకు ధరమ్ జీ అందించిన సేవలను ఇలా స్మరించుకోవడం గర్వకారణంగా ఉందని భావోద్వేగానికి లోనయ్యారు. ఇటీవలే జరిగిన ఆస్కార్ వేడుకల్లో ధర్మేంద్రకు తగిన గుర్తింపు లభించలేదని ఆమె అసంతృప్తి వ్యక్తం చేసిన నేపథ్యంలో, ఈ ఢిల్లీ ఫెస్టివల్‌లో ఆయనకు దక్కుతున్న గౌరవం ప్రాధాన్యత సంతరించుకుంది. మొత్తం 140 చిత్రాలు ప్రదర్శితమయ్యే ఈ మేళాలో ధర్మేంద్రతో పాటు సత్యజిత్ రే, రాజ్ కపూర్ వంటి ఇతర మహనీయులకు కూడా నివాళులు అర్పించనున్నారు.