Kollywood | తమిళ చిత్ర పరిశ్రమలో సంక్షోభం.. సెప్టెంబర్ 1 నుంచి కొత్త సినిమాల విడుదల బంద్!

Tamil Film Industry | కోలీవుడ్‌లో థియేటర్లు మరియు ఓటీటీ (OTT) వేదికల మధ్య నెలకొన్న వివాదం తారాస్థాయికి చేరింది. తమిళ చిత్ర పరిశ్రమలో ఉద్రిక్త పరిస్థితుల నడుమ తమిళ ఫిల్మ్‌ ప్రొడ్యూసర్స్ కౌన్సిల్ (TFPC) మరియు తమిళనాడు యాక్టివ్ ఫిల్మ్ ప్రొడ్యూసర్స్ అసోసియేషన్ సంయుక్తంగా అత్యంత కీలకమైన సంచలన నిర్ణయం తీసుకున్నాయి.

Tamil Film Industry | కోలీవుడ్‌లో థియేటర్లు మరియు ఓటీటీ (OTT) వేదికల మధ్య నెలకొన్న వివాదం తారాస్థాయికి చేరింది. తమిళ చిత్ర పరిశ్రమలో ఉద్రిక్త పరిస్థితుల నడుమ తమిళ ఫిల్మ్‌ ప్రొడ్యూసర్స్ కౌన్సిల్ (TFPC) మరియు తమిళనాడు యాక్టివ్ ఫిల్మ్ ప్రొడ్యూసర్స్ అసోసియేషన్ సంయుక్తంగా అత్యంత కీలకమైన సంచలన నిర్ణయం తీసుకున్నాయి.

వచ్చేనెల సెప్టెంబర్ 1వ తేదీ నుంచి కొత్త తమిళ సినిమాల థియేట్రికల్ విడుదలతో పాటు, అన్ని రకాల సినిమా షూటింగ్‌లు మరియు పోస్ట్ ప్రొడక్షన్ పనులను పూర్తిగా నిలిపివేస్తున్నట్లు అధికారికంగా ప్రకటించాయి. సినిమా థియేటర్లలో విడుదలైన కనీసం 8 వారాల (రెండు నెలలు) తర్వాతే చిత్రాలను ఓటీటీ ప్లాట్‌ఫారమ్‌లలో స్ట్రీమింగ్ చేయాలనే డిమాండ్‌పై థియేటర్ల యజమానులు, డిస్ట్రిబ్యూటర్లు పట్టుబడుతున్నారు.

అయితే, ఈ నిబంధనలను ఏకపక్షంగా తమపై రుద్దడాన్ని నిర్మాతల వర్గం తీవ్రంగా వ్యతిరేకిస్తోంది. ఈ ఏకపక్ష నిర్ణయాల వల్ల పరిశ్రమకు ప్రతిఏటా కోట్లాది రూపాయల ఆర్థిక నష్టం వాటిల్లుతోందని, దీనిపై స్పష్టత వచ్చే వరకు వెనక్కి తగ్గేది లేదని నిర్మాతలు స్పష్టం చేశారు. ఈ వివాదం కేవలం థియేటర్లు, ఓటీటీలకే పరిమితం కాకుండా కోలీవుడ్‌లో పెద్ద ఎత్తున సంక్షోభానికి దారితీసింది. ఈ ఇబ్బందుల నుంచి గట్టెక్కేందుకు, పరిశ్రమ ఎదుర్కొంటున్న సమస్యలపై తమిళనాడు ప్రభుత్వం జోక్యం చేసుకుని తగిన పరిష్కారం చూపాలని ప్రొడ్యూసర్స్ కౌన్సిల్ కోరుతోంది. ఈ మేరకు రాష్ట్ర ముఖ్యమంత్రి మరియు సంబంధిత శాఖల మంత్రులను కలిసి వినతిపత్రం సమర్పించనున్నట్లు వారు వెల్లడించారు. సెప్టెంబర్ 1 నుంచి అన్ని రకాల సినీ కార్యకలాపాలు నిలిచిపోనుండటంతో తమిళ చిత్ర పరిశ్రమలో తీవ్రమైన అనిశ్చితి నెలకొంది.