‘డేర్‌ డెవిల్‌ ముస్తఫా’కు పన్నురాయితీ

విద్వేష ప్రచారకులకు కనువిప్పు కలిగించే చిత్రమిదని సీంఎ సిద్ధరామయ్య ప్రశంసలు గత ఏడాది హిజాబ్‌ వివాదం కర్ణాటక రాష్ర్టాన్ని కుదిపి వేసింది. విద్యార్థుల మధ్య మతపరమైన ఉద్రికత్తలను సృష్టించేందుకు కొన్ని శక్తులు ప్రయత్నం చేశాయి.

విద్వేష ప్రచారకులకు కనువిప్పు కలిగించే చిత్రమిదని సీంఎ సిద్ధరామయ్య ప్రశంసలు గత ఏడాది హిజాబ్‌ వివాదం కర్ణాటక రాష్ట్రాన్ని కుదిపి వేసింది. విద్యార్థుల మధ్య మతపరమైన ఉద్రికత్తలను సృష్టించేందుకు కొన్ని శక్తులు ప్రయత్నం చేశాయి. అయితే ఈ గొడవల వెనకున్న కుట్రను ప్రజలు అర్థం చేసుకోవడంతో ఈ వివాదం క్రమంగా సద్దుమణిగింది. ఈ నేపథ్యంలో ఇటీవల అధికార పగ్గాలు చేపట్టిన ముఖ్యమంత్రి సిద్ధరామయ్య మతసామరస్యాన్ని చాటుతూ తెరకెక్కించిన ‘డేర్‌ డెవిల్‌ ముస్తఫా’ చిత్రానికి పన్ను మినహాయింపు ఇవ్వడం అందరి ప్రశంసలందుకుంటున్నది.

ప్రముఖ కన్నడ రచయిత పూర్ణచంద్ర తేజస్వి రాసిన షార్ట్‌స్టోరీ ఆధారంగా దర్శకుడు శశాంక్‌ సొహగల్‌ ఈ చిత్రాన్ని తెరకెక్కించాడు. ఇటీవల విడుదలైన ఈ చిత్రం మతసామరస్య అవశ్యకతను చాటుతూ అందరిని ఆకట్టుకుంటున్నది. 1970 దశకం నేపథ్యంలో నడిచే ఈ కథలో ఓ ముస్లిమ్‌ యువకుడు హిందువులు ఎక్కువగా ఉండే కాలేజీలో చేరతాడు. ఈ నేపథ్యంలో విద్యార్థుల మధ్య తలెత్తిన అభిప్రాయభేదాలు, చివరకు పరస్పర ప్రేమాభిమానాలతో అందరు కలిసి పోయిన వైనాన్ని ఈ చిత్రంలో అద్భుతంగా ఆవిష్కరించారు.

ఈ సినిమాకు పన్ను మినహాయింపును ప్రకటించిన అనంతరం సీఎం సిద్ధరామయ్య తన ట్విట్టర్‌ ఖాతాలో చిత్ర బృందాన్ని ప్రశంసిస్తూ ఓ పోస్ట్‌ పెట్టారు. పరస్పర సహకారం, సౌభ్రాతృత్వంతోనే సమాజంలో శాంతి పరిఢవిల్లుతుందనే సందేశాన్ని ఈ సినిమాలో గొప్పగా ఆవిష్కరించారని, విద్వేష ప్రచారకులకు కనువిప్పు కలగాలంటే ఈ తరహా చిత్రాలు మరిన్ని రావాలని సిద్ధరామయ్య ఆకాంక్షించారు.