చిరు-వెంకీ కలిసి స్టెప్పులెస్తే..

చిరంజీవి నటిస్తున్న ‘మన శంకరవరప్రసాద్‌ గారు’ శరవేగంగా చిత్రీకరణ జరుపుకుంటున్నది. వచ్చే ఏడాది సంక్రాంతి బరిలో ప్రేక్షకులకు కావాల్సినంత వినోదాన్ని పంచడానికి ముస్తాబవుతున్నది.

చిరంజీవి నటిస్తున్న ‘మన శంకరవరప్రసాద్‌ గారు’ శరవేగంగా చిత్రీకరణ జరుపుకుంటున్నది. వచ్చే ఏడాది సంక్రాంతి బరిలో ప్రేక్షకులకు కావాల్సినంత వినోదాన్ని పంచడానికి ముస్తాబవుతున్నది. అనిల్‌ రావిపూడి దర్శకత్వంలో తెరకెక్కుతున్న ఈ సినిమా ఆద్యంతం హాస్య ప్రధానంగా సాగుతుందని, చిరంజీవి తనదైన శైలి వింటేజ్‌ కామెడీతో ప్రేక్షకుల్ని అలరిస్తారని చెబుతున్నారు. ప్రస్తుతం ఈ సినిమా షూటింగ్‌ హైదరాబాద్‌లో జరుగుతున్నది. వచ్చే నెలలో 20 రోజుల పాటు నాన్‌స్టాప్‌ షెడ్యూల్‌కు ప్లాన్‌ చేస్తున్నట్లు తెలిసింది. ఈ చిత్రంలో అగ్ర నటుడు వెంకటేష్‌ కీలకమైన అతిథి పాత్రలో కనిపించబోతున్న విషయం తెలిసిందే.

చిరంజీవి, వెంకటేష్‌ ఇద్దరూ సమకాలీనులు కావడం..దాదాపు 40 ఏళ్లుగా సూపర్‌స్టార్‌డమ్‌తో కొనసాగుతుండటంతో వీరిద్దరి కాంబో సినిమాకు స్పెషల్‌ అట్రాక్షన్‌ కాబోతున్నది. ఈ నేపథ్యంలో ఈ సూపర్‌స్టార్స్‌ ఇద్దరూ ఓ పాటలో కలిసి సందడి చేయబోతున్నారట. దీనిని అక్టోబర్‌ షెడ్యూల్‌లో తెరకెక్కిస్తారని తెలిసింది. ఈ పాట కోసం సంగీత దర్శకుడు భీమ్స్‌ సిసిరోలియో ఇప్పటికే అద్భుతమైన ట్యూన్‌ను సిద్ధం చేశారని, చిరు-వెంకీల సిగ్నేచర్స్‌ డ్యాన్‌ మూమెంట్స్‌, ఎనర్జీతో ఈ పాట సినిమాకే హైలైట్‌గా నిలుస్తుందని అంటున్నారు. ఈ చిత్రాన్ని షైన్‌స్క్రీన్స్‌ అండ్‌ గోల్డ్‌బాక్స్‌ ఎంటర్‌టైన్‌మెంట్స్‌ పతాకంపై సాహు గారపాటి, సుస్మిత కొణిదెల నిర్మిస్తున్నారు.