‘ప్రతి నటుడికి భరోసానిస్తూ వారికి స్టార్ ఇమేజ్ను అందించడంలో దిగ్దర్శకులు రాఘవేంద్రరావుగారు ఎప్పుడూ ముందుంటారు. అందుకే ఆయన పట్ల గురుభావన ఉంటుంది. నా కెరీర్ ఉన్నతిలో ఆయన తోడ్పాటు మరువలేనిది’ అన్నారు అగ్రనటుడు చిరంజీవి. ఆదివారం జరిగిన ‘పెళ్లిసందడి’ చిత్ర ప్రీరిలీజ్ వేడుకకు ఆయన ముఖ్యఅతిథిగా హాజరయ్యారు. శ్రీకాంత్ తనయుడు రోహన్, శ్రీలీల జంటగా కె.రాఘవేంద్రరావు పర్యవేక్షణలో రూపొందిన చిత్రం ‘పెళ్లిసందడి’. గౌరి రోణంకి దర్శకురాలు. మాధవి కోవెలమూడి, శోభు యార్లగడ్డ, ప్రసాద్ దేవినేని నిర్మాతలు. చిరంజీవి మాట్లాడుతూ ‘శ్రీకాంత్ నటించిన ‘పెళ్లిసందడి’ మాదిరిగా ఈ చిత్రం కూడా పెద్ద విజయాన్ని సాధించాలని కోరుకుంటున్నా’ అన్నారు. రాఘవేంద్రరావుగారి లాంటి దర్శకుడు ఇండస్ట్రీలో ఉండటం అదృష్టమని వెంకటేష్ చెప్పారు. రాఘవేంద్రరావు మాట్లాడుతూ ‘నటించాలని ఎప్పుడూ అనుకోలేదు. అయితే ఈ సినిమాలో చిన్న పాత్ర చేయడం సంతోషంగా ఉంది. కొత్తవాళ్లతో సినిమా చేస్తే ఓ కిక్ ఉంటుంది’ అన్నారు. రాఘవేంద్రరావు చేతుల మీదుగా తన కుమారుడు హీరోగా పరిచయం కావడం ఆనందంగా ఉందని, ప్రేక్షకులు రోహన్ను ఆశీర్వదించాలని శ్రీకాంత్ కోరారు. రాఘవేంద్రరావు సాధించిన విజయాల్లో పదిశాతం సాధిస్తే చాలనే భావన కలుగుతున్నదని దిల్రాజు చెప్పారు. ఈ సినిమా ద్వారా తాను ఎన్నో విషయాల్ని నేర్చుకున్నానని హీరో రోషన్ పేర్కొన్నారు.