Bhagyashri Borse | అంతా నేషనల్‌ క్రష్‌ అంటున్నారు: భాగ్యశ్రీ బోర్సే

‘మిస్టర్‌ బచ్చన్‌' చిత్రం ద్వారా తెలుగు సినీరంగంలోకి అరంగేట్రం చేస్తున్నది మరాఠీ సుందరి భాగ్యశ్రీ బోర్సే. తొలి సినిమాకే తెలుగులో సొంతంగా డబ్బింగ్‌ చెప్పడం గొప్ప అనుభూతినిచ్చిందని, తెలుగు బ్యూటీఫుల్‌ లాంగ్వేజ్‌ అంటూ కొనియాడింది.

Bhagyashri Borse | ‘మిస్టర్‌ బచ్చన్‌’ చిత్రం ద్వారా తెలుగు సినీరంగంలోకి అరంగేట్రం చేస్తున్నది మరాఠీ సుందరి భాగ్యశ్రీ బోర్సే. తొలి సినిమాకే తెలుగులో సొంతంగా డబ్బింగ్‌ చెప్పడం గొప్ప అనుభూతినిచ్చిందని, తెలుగు బ్యూటీఫుల్‌ లాంగ్వేజ్‌ అంటూ కొనియాడింది. రవితేజ హీరోగా హరీష్‌శంకర్‌ దర్శకత్వంలో రూపొందిన ఈ చిత్రం ఈ నెల 15న ప్రేక్షకుల ముందుకురానుంది. ఈ సందర్భంగా శుక్రవారం భాగ్యశ్రీ బోర్సే పాత్రికేయులతో ముచ్చటిస్తూ పంచుకున్న సంగతులు…

• నా స్వస్థలం మహారాష్ట్రలోని ఔరంగాబాద్‌. మా నాన్న ఉద్యోగరీత్యా నైజీరియాకు వెళ్లడంతో అక్కడే నా పాఠశాల విద్యాభ్యాసం పూర్తయింది. గ్రాడ్యుయేషన్‌ కోసం ముంబయికి వచ్చిన సమయంలో మోడలింగ్‌ రంగంలో అవకాశాలొచ్చాయి. ‘చందూ ఛాంపియన్‌’ చిత్రంలో చిన్న రోల్‌ ద్వారా బాలీవుడ్‌కు పరిచయమయ్యా.
• ‘మిస్టర్‌ బచ్చన్‌’ సినిమా కోసం హైదరాబాద్‌కు వచ్చి ఆడిషన్స్‌లో పాల్గొన్నా. నా యాక్టింగ్‌ నచ్చడంతో సెలెక్ట్‌ చేశారు. ఈ సినిమాలో నేను తెలుగు మార్వాడి అమ్మాయి జిక్కీగా కనిపిస్తా. ఎప్పుడూ చలాకీగా ఉండే పాత్ర నాది. బచ్చన్‌ జీవితంలో జిక్కీ ఎలాంటి రోల్‌ప్లే చేసిందన్నది ఆసక్తికరంగా ఉంటుంది.
• నా పాత్రకు తెలుగులో సొంతంగా డబ్బింగ్‌ చెప్పాను. అదొక గ్రేట్‌ ఎక్స్‌పీరియన్స్‌. నేను నార్త్‌ ఇండియా అమ్మాయిని కాబట్టి తెలుగు అర్థం చేసుకోవడం తొలుత కొంచెం కష్టంగా అనిపించింది. క్రమంగా భాషపై పట్టు సాధించా. తెలుగు భాష చాలా అందంగా, అద్భుతంగా ఉంటుంది. ప్రస్తుతం పూర్తిగా నేర్చుకునే ప్రయత్నంలో ఉన్నా.
• ఈ సినిమా విషయంలో రవితేజ, దర్శకుడు హరీశ్‌శంకర్‌ ఎంతగానో సహకరించారు. వారి ఎంకరేజ్‌మెంట్‌ వల్లే నా క్యారెక్టర్‌లో రాణించాను. సోషల్‌మీడియాలో చాలా మంది నన్ను నేషనల్‌ క్రష్‌ అంటూ పొగుడుతున్నారు. అదొక బిగ్గెస్ట్‌ కాంప్లిమెంట్‌గా తీసుకుంటాను (నవ్వుతూ).