కొత్తదనానికే ప్రాధాన్యమిస్తున్నా!

ప్రస్తుతం నాలుగు భారీ చిత్రాలతో బిజీగా ఉన్నారు యువ హీరో బెల్లంకొండ శ్రీనివాస్‌. వాణిజ్య పంథాలోనే వైవిధ్యమైన కథాంశాల్ని ఎంచుకుంటున్నానని, ప్రతీ సినిమాలో నటుడిగా కొత్తదనాన్ని చూపించాలన్నదే తన లక్ష్యమని చెప్పారు బెల్లంకొండ శ్రీనివాస్‌.

ప్రస్తుతం నాలుగు భారీ చిత్రాలతో బిజీగా ఉన్నారు యువ హీరో బెల్లంకొండ శ్రీనివాస్‌. వాణిజ్య పంథాలోనే వైవిధ్యమైన కథాంశాల్ని ఎంచుకుంటున్నానని, ప్రతీ సినిమాలో నటుడిగా కొత్తదనాన్ని చూపించాలన్నదే తన లక్ష్యమని చెప్పారు బెల్లంకొండ శ్రీనివాస్‌. ఆయన మంచు మనోజ్‌, నారా రోహిత్‌తో కలిసి నటించిన తాజా చిత్రం ‘భైరవం’ ఈ నెల 30న విడుదల కానుంది. విజయ్‌ కనకమేడల దర్శకత్వం వహించిన ఈ చిత్రాన్ని కె.కె.రాధామోహన్‌ నిర్మించారు. శనివారం ఏర్పాటు చేసిన సమావేశంలో హీరో బెల్లంకొండ శ్రీనివాస్‌ విలేకరులతో పంచుకున్న విశేషాలు..

• ఈ సినిమాలో హీరో కాలభైరవున్ని కొలుస్తాడు. అందుకే ‘భైరవం’ అనే టైటిల్‌ పెట్టాం. ముగ్గురు మిత్రుల నడుమ ఓ గుడి చుట్టూ ఈ కథ నడుస్తుంది. యాక్షన్‌, ఎమోషన్స్‌, డివైన్‌ ఎలిమెంట్స్‌తో ఆద్యంతం ఉత్కంఠను పంచుతుంది.
• నా గత చిత్రాల ద్వారా నాకు కమర్షియల్‌ హీరో అనే పేరొచ్చింది. అయితే మాస్‌కు బాగా కనెక్ట్‌ కావాలనే ఆలోచన ఎప్పటి నుంచో ఉంది. అందుకే ఓ రూరల్‌ స్టోరీ కోసం ఎదురుచూస్తున్న తరుణంలో ఈ కథ దొరికింది. తమిళ ‘గరుడన్‌’కు మన నేటివిటీకి అనుగుణంగా మార్పులు చేసి దర్శకుడు విజయ్‌ కనకమేడల అద్భుతంగా ఈ చిత్రాన్ని రూపొందించారు.
• ఈ సినిమాకు కాస్టింగ్‌ బాగా కుదిరింది. నేను, మనోజ్‌, రోహిత్‌..ముగ్గురం సినిమాలకు కొంత కాలంగా బ్రేక్‌నిచ్చాం. దాంతో మా కాంబో ప్రేక్షకులకు ఫ్రెష్‌గా అనిపిస్తుంది. ఈ కథకు మనోజ్‌, రోహిత్‌ పర్‌ఫెక్ట్‌గా కుదిరారు. కథానాయిక అతిథి శంకర్‌ ఎనర్జిటిక్‌ రోల్‌లో కనిపిస్తుంది.
• నేను కమర్షియల్‌ పంథాలోనే కొత్త కథల్ని అన్వేషిస్తున్నా. ప్రతి సినిమాను లాంఛింగ్‌ మూవీలా ఫీలవుతూ కమిట్‌మెంట్‌తో పనిచేస్తున్నా. కమర్షియల్‌ ఫార్మాట్‌లోనే ప్రయోగాలు చేయాలన్నది నటుడిగా నా లక్ష్యం. ఇప్పుడు నా వయసు 31. ఇంకా కెరీర్‌ చాలా ఉంది. విభిన్న కథల్లో నన్ను నేను కొత్తగా ఆవిష్కరించుకోవాలనుకుంటున్నా.
• ప్రస్తుతం ‘హైందవ’ ‘టైసన్‌ నాయుడు’ ‘కిష్కింధపురి’ చిత్రాల్ని చేస్తున్నా. ఇవి వేటికవే ప్రత్యేకం. ‘కిష్కింధపురి’ అనే ఊహాత్మక ప్రపంచంలో నేపథ్యంలో నడుస్తుంది. ఇక ‘హైందవ’ భారీ గ్రాఫిక్స్‌ కలబోసిన ఓ అద్భుతమైన కథ. రాబోవు నా చిత్రాలన్ని ప్రేక్షకులకు వినూత్నమైన థియేట్రికల్‌ అనుభూతినందిస్తాయి. ‘భైరవం’ చిత్రానికి తొలిరోజే పాజిటివ్‌ టాక్‌ లభిస్తుందనే నమ్మకంతో ఉన్నాం. అంత గొప్పగా రూపుదిద్దుకుందీ చిత్రం.
• పూరి జగన్నాథ్‌తో నేను సినిమా చేయబోతున్నానని వార్తలొచ్చాయి. ఆయనతో సినిమా చేయాలనుంది. మేమిద్దరం కలిసి కొన్నిసార్లు చర్చించాం. తప్పకుండా మా ఇద్దరి కాంబోలో సినిమా ఉంటుంది.