ఐశ్వర్య రాజేష్‌ చేతిలో అరడజన్‌ సినిమాలు

ఐశ్వర్య రాజేష్ .. తమిళంలో ఈ పేరుకు చాలా క్రేజ్ ఉంది. తెలుగులో ఇప్పుడిప్పుడే గుర్తింపు తెచ్చుకుంటుంది. పవన్ కళ్యాణ్‌ అయ్యప్పునుమ్ కోషియుమ్ రీమేక్‌తో బిజీగా ఉంది.

April 13, 2021 / 08:45 PM IST

ఐశ్వర్య రాజేష్ .. తమిళంలో ఈ పేరుకు చాలా క్రేజ్ ఉంది. తెలుగులో మాత్రం ఇప్పుడిప్పుడే గుర్తింపు తెచ్చుకుంటుంది. రెండేళ్ల కింద కౌసల్య కృష్ణమూర్తి సినిమాతో తెలుగు ఇండస్ట్రీకి పరిచయమైంది. విజయ్ దేవరకొండ వరల్డ్ ఫేమస్ లవర్ సినిమాలో సువర్ణ పాత్రతో గుర్తింపు తెచ్చుకుంది. ఈ సినిమా ఫ్లాప్ అయ్యుండొచ్చు కానీ సువర్ణ పాత్ర మాత్రం సక్సెస్ అయింది. తెలంగాణ యాసలో మాట్లాడుతూ.. పక్కా పల్లెటూరి పిల్లగా మైమరిపించింది ఐశ్వర్య రాజేష్. దాని తర్వాత వరసగా తెలుగులో నటిస్తుంది ఈ బ్యూటీ. ప్రస్తుతం ఈమె చేతిలో 7 సినిమాలు ఉన్నాయంటే నమ్మడం కాస్త కష్టమే. స్టార్ హీరోయిన్ల‌కు కూడా ఇది కలే. అలాంటిది ఐశ్వర్య రాజేష్ మాత్రం ఒకేసారి అరడజన్ కంటే ఎక్కువ సినిమాలనే లైన్ లో పెట్టింది. అన్ని సినిమాలకు డేట్స్‌ అడ్జస్ట్‌ చేస్తోంది.

ఐశ్వర్య రాజేష్‌ ఇప్పుడు తెలుగు, తమిళంలో మోస్ట్ వాంటెడ్ హీరోయిన్ అయిపోయింది. ముఖ్యంగా అందం కంటే కూడా అభినయంతోనే ఎక్కువ అవకాశాలు అందుకుంటుంది. అదృష్టం క‌లిసి రాకపోవడంతో చాలా కాలం ఈమెకు గుర్తింపు రాలేదు. కానీ ఆ తర్వాత వ‌చ్చిన ప్ర‌తి అవ‌కాశాన్ని స‌ద్వినియోగం చేసుకుని ఔరా అనిపించింది ఈ భామ. ఇప్పుడు త‌మిళ‌నాట ఈమె స్టార్ హీరోయిన్ అయింది. తెలుగులోనూ వరస ఛాన్సులు దక్కించుకుంటుంది. ఈ అమ్మడు చేతిలో ఏకంగా 7 సినిమాలు ఉన్నాయి. మరో మూడు నాలుగు సినిమాలు చర్చల దశలో ఉన్నాయి. అంటే మొత్తంగా 10 సినిమాల కంటే పైగానే నటిస్తుంది ఈ ముద్దుగుమ్మ.

ఇప్ప‌టికే రెండు తమిళం.. రెండు తెలుగు సినిమాలు షూటింగ్ పూర్తి చేసుకుని పోస్ట్ ప్రొడక్షన్ దశలో ఉన్నాయి. తెలుగులో నాని టక్ జగదీష్‌.. సాయి తేజ్ రిపబ్లిక్.. పవన్ కళ్యాణ్‌ అయ్యప్పునుమ్ కోషియుమ్ రీమేక్ సినిమాలతో బిజీగా ఉంది. తమిళనాట మూడు నాలుగు సినిమాలున్నాయి. అక్కడ కూడా స్టార్ హీరోలతో సినిమా చేస్తుంది. తెలుగమ్మాయే అయినా కూడా తమిళనాడులోనే పుట్టి పెరగడంతో అక్కడమ్మాయి అయిపోయింది ఐశ్వర్య రాజేష్.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి