ఆ పేరుతోనే పిలుస్తున్నారు!

‘గీత’గా హీరోకు చుక్కలు చూపించింది. ‘లిల్లీ’గా ప్రేక్షకుల హృదయాలు కొల్లగొట్టింది. ‘శ్రీవల్లి’గా దేశవ్యాప్తంగా అభిమానులను అలరించి క్రష్మికగా కీర్తి గడించింది రష్మికా మందన్న.

‘గీత’గా హీరోకు చుక్కలు చూపించింది. ‘లిల్లీ’గా ప్రేక్షకుల హృదయాలు కొల్లగొట్టింది. ‘శ్రీవల్లి’గా దేశవ్యాప్తంగా అభిమానులను అలరించి క్రష్మికగా కీర్తి గడించింది రష్మికా మందన్న. తను వరుస అవకాశాలతో దూసుకుపోతున్నది. భాషతో సంబంధం లేకుండా టాలీవుడ్‌ నుంచి బాలీవుడ్‌ వరకు ఊపేస్తున్నది. ఆమె నటించిన సినిమాలు ఈ ఏడాది ఏకంగా నాలుగు విడుదల అవుతున్నాయంటే రష్మిక ఎంత బిజీగా ఉందో అంచనా వేయొచ్చు. తాజాగా, ఈ కన్నడ కస్తూరి నటించిన బాలీవుడ్‌ చిత్రం ‘మిషన్‌ మజ్ను’ విడుదలైంది. ఈ సందర్భంగా రష్మిక చిట్‌చాట్‌..

• ఈ ఏడాది నేను నటించిన నాలుగు సినిమాలు విడుదల కానున్నాయి. మరో మూడు చిత్రాలకు పనిచేస్తున్నా! దక్షిణాది చిత్రాలతోపాటు హిందీ సినిమాలతోనూ బిజీగా ఉన్నాను. ఆగస్టులో ‘యానిమల్‌’ విడుదల కానుంది.
• ఎప్పటికైనా బాలీవుడ్‌లోకి రావాలనుకున్నాను కానీ, ఇక్కడ పరిస్థితులు ఎలా ఉంటాయో అనిపించేది. షూటింగ్‌ మొదటి రోజు చాలా కంగారు పడ్డాను.
  అసౌకర్యంగా అనిపించింది! రెండు రోజుల తర్వాత బెరుకంతా మాయమైంది. మా టీమ్‌ నాకు ఎలాంటి ఇబ్బంది రాకుండా చూసుకున్నారు. నేను వారితో కలిసిపోయే వాతావరణం కల్పించారు.
• కన్నడ చిత్రంతో తెరంగేట్రం చేశాను. తర్వాత తెలుగు, తమిళ చిత్రాల్లో నటించాను. ఇప్పుడు బాలీవుడ్‌ సినిమాలు చేస్తున్నాను. నా వరకైతే ఎక్కడా తేడా కనిపించలేదు. బాలీవుడ్‌ అభిమానులు ఆదరించిన తీరు నాకెంతో సంతోషాన్నిచ్చింది.
• నేను రకరకాల పాత్రలు చేశాను. ప్రేక్షకులు కూడా నేను పోషించిన పాత్రల పేరుతో నన్ను గుర్తుపెట్టుకున్నారు. ‘పుష్ప’ సినిమాలో శ్రీవల్లి క్యారెక్టర్‌కు ఊహించని రెస్పాన్స్‌ వచ్చింది. ఇప్పుడు ఎక్కడికి వెళ్లినా అదే పేరుతో పిలుస్తున్నారు. ‘పుష్ప-2’తో శ్రీవల్లి పేరు మరోసారి మార్మోగడం ఖాయం.