ప్రేమదేశం హీరో అబ్బాస్ ఇప్పుడు ఎక్కడ ఉన్నాడో తెలుసా..?

June 1, 2021 / 05:20 PM IST

కొన్ని డబ్బింగ్ సినిమాలు ఎప్పటికీ అలా గుర్తుండిపోతాయి. ఎన్ని సంవత్సరాలు అయినా కూడా అది నిత్యనూతనంగా ఉంటాయి. అలాంటి ఒక అద్భుతమైన సినిమా ప్రేమ దేశం. 1996లో విడుదలైన ఈ సినిమా తెలుగు, తమిళ భాషల్లో సంచలన విజయం సాధించింది. ఈ సినిమాతోనే ప్రేక్షకులకు పరిచయమైన నటుడు అబ్బాస్. ఎక్కడో పశ్చిమ బెంగాల్లోని హౌరాలో పుట్టిన ఈయన తెలుగు, తమిళ సినిమాలతో ఎక్కువగా గుర్తింపు సంపాదించుకున్నాడు. దాదాపు 50 సినిమాలకు పైగా నటించిన అబ్బాస్.. ఆరేళ్లుగా ఇండస్ట్రీలో కనిపించడం లేదు. ఇంకా చెప్పాలంటే పదేళ్లకు పైగానే అయ్యుంటుంది ఆయన రెగ్యులర్ గా సినిమాలు చేసి. కేవలం 20 ఏళ్ళ వయసులో హీరోగా అడుగుపెట్టిన ఈయన.. 40 ఏళ్ల లోపు రిటైర్మెంట్ తీసుకున్నాడు.

అబ్బాస్ కొన్ని సంవత్సరాలుగా ఆయన ఎక్కడ ఉన్నాడు అనేది చాలా మందికి కనీసం తెలియదు. సినిమాలు చేయడం లేదు.. మోడలింగ్ కూడా మానేశాడు. మరి ఇప్పుడు ఆయన ఎక్కడ ఉన్నాడు.. ఏం చేస్తున్నాడు అనేది అభిమానులకు సస్పెన్స్. దీనికి సమాధానంగా ఆయన సోషల్ మీడియా పేజీ నిలిచింది. ఈయన ప్రస్తుతం న్యూజిలాండ్ లో ఉన్నాడు. కొన్నేళ్ళుగా అక్కడే నివసిస్తున్నాడు. ఇంకా చెప్పాలంటే అబ్బాస్ పూర్తిగా ఇప్పుడు న్యూజిలాండ్ వాసి అయిపోయాడు. కుటుంబంతో సహా అక్కడే సెటిల్ అయిపోయాడు ప్రేమదేశం హీరో. ప్రస్తుతం ఈయన మోటివేషనల్ స్పీకర్ గా పని చేస్తున్నాడు. ఇలాంటి ఒక జాబ్ ఉంటుందా అని చాలా మందికి ఆశ్చర్యంగా ఉండొచ్చు. కానీ ప్రస్తుతం చేస్తున్న ఉద్యోగం అదే. సోషల్ మీడియాలో ఎప్పటికప్పుడు మోటివేషనల్ స్పీచ్ చాలా మందిలో ధైర్యాన్ని నూరిపోస్తున్నాడు అబ్బాస్.

ఒకప్పుడు తన హెయిర్ స్టైల్ అందంతో అమ్మాయిలతో పాటు అబ్బాయిలను కూడా ఆకర్షించాడు అబ్బాస్. చాలా తక్కువ సమయంలోనే మంచి హీరోగా గుర్తింపు తెచ్చుకున్నాడు. తెలుగు తమిళ భాషల్లో ఎన్నో సినిమాలు చేశాడు.. హిందీలో కూడా నటించాడు. అయితే 2010 తర్వాత ఈయన పూర్తిగా తన దారి మార్చుకున్నాడు. అడపాదడపా సినిమాలు చేసి తనకంటూ ప్రత్యేకమైన లైఫ్ ఏర్పాటు చేసుకున్నాడు అబ్బాస్. ప్రస్తుతం అందులోనే ఆనందంగా ఉన్నాడు. న్యూజిలాండ్ లో భారతీయులను కలిసినప్పుడు ఫోటోలకు ఫోజులిస్తూ సంతోషంగా గడుపుతున్నాడు. మళ్లీ సినిమాల్లోకి వచ్చే ఉద్దేశం లేదు అంటూ కుండ బద్దలు కొట్టేసాడు అబ్బాస్.