సందిగ్ధంలో దాదాసాహెబ్‌ఫాల్కే బయోపిక్‌

భారతీయ సినీ పితామహుడుగా అభివర్ణించే దాదాసాహెబ్‌ఫాల్కే జీవిత కథను వెండితెర దృశ్యమానం చేయడానికి అగ్ర హీరో అమీర్‌ఖాన్‌, దర్శకుడు రాజ్‌కుమార్‌ హీరానీ గతకొంతకాలంగా ప్రయత్నాలు చేస్తున్నారు. స్క్రిప్ట్‌వర్క్‌ మొత్తం పూర్తయిందని, అక్టోబర్‌లో సినిమాను లాంఛనంగా ప్రారంభిస్తారని వార్తలొచ్చాయి.

భారతీయ సినీ పితామహుడుగా అభివర్ణించే దాదాసాహెబ్‌ఫాల్కే జీవిత కథను వెండితెర దృశ్యమానం చేయడానికి అగ్ర హీరో అమీర్‌ఖాన్‌, దర్శకుడు రాజ్‌కుమార్‌ హీరానీ గతకొంతకాలంగా ప్రయత్నాలు చేస్తున్నారు. స్క్రిప్ట్‌వర్క్‌ మొత్తం పూర్తయిందని, అక్టోబర్‌లో సినిమాను లాంఛనంగా ప్రారంభిస్తారని వార్తలొచ్చాయి. విశ్వసనీయ సమాచారం ప్రకారం ఈ ప్రాజెక్ట్‌ను అమీర్‌ఖాన్‌ తాత్కాలికంగా వాయిదా వేసినట్లు తెలిసింది. అమీర్‌ఖాన్‌-రాజ్‌కుమార్‌ హీరానీ కలయికలో గతంలో త్రీ ఇడియట్స్‌, పీకే వంటి బ్లాక్‌బస్టర్‌ హిట్స్‌ వచ్చాయి.

దాంతో తాజా ప్రాజెక్ట్‌పై సర్వత్రా ఆసక్తి మొదలైంది. అయితే ఈ సినిమా స్క్రిప్ట్‌ విషయంలో అమీర్‌ఖాన్‌ అసంతృప్తిగా ఉన్నారని అంటున్నారు. ‘ప్రేక్షకుల్ని థియేటర్‌కు రప్పించే ఎలిమెంట్స్‌ ఈ స్క్రిప్ట్‌లో లేవు. మొత్తం సీరియస్‌ డ్రామాలా డిజైన్‌ చేశారు. వినోదం మచ్చుకైనా లేదు. స్క్రిప్ట్‌లో మార్పులు చేస్తే ఈ సినిమా విషయంలో నిర్ణయం తీసుకోవచ్చు’ అని అమీర్‌ఖాన్‌ రాజ్‌కుమార్‌ హీరానీకి తేల్చిచెప్పారట. ఈ నేపథ్యంలో ఈ సినిమా కార్యరూపం దాల్చేది అనుమానమేనని బాలీవుడ్‌ సర్కిల్స్‌లో వినిపిస్తున్నది.