Killer | ‘కిల్లర్’ మూవీ రివ్యూ.. రూ.కోటి ఛాలెంజ్ విసిరిన సినిమా ఎలా ఉందంటే!

Killer Movie Review | 'గుప్పెడంత మనసు' సీరియల్ ఫేమ్ జ్యోతి పూర్వజ్ మరియు పూర్వజ్ లీడ్ రోల్స్ లో నటించి, తెరకెక్కించిన తాజా చిత్రం ‘కిల్లర్’ (Killer). ఎ.పద్మనాభ రెడ్డితో కలిసి పూర్వజ్ ఈ చిత్రాన్ని నిర్మించారు.

Killer Movie Review | ‘గుప్పెడంత మనసు’ సీరియల్ ఫేమ్ జ్యోతి పూర్వజ్ మరియు పూర్వజ్ లీడ్ రోల్స్ లో నటించి, తెరకెక్కించిన తాజా చిత్రం ‘కిల్లర్’ (Killer). ఎ.పద్మనాభ రెడ్డితో కలిసి పూర్వజ్ ఈ చిత్రాన్ని నిర్మించారు. “సెకండాఫ్‌లోని ట్విస్ట్‌ను ముందుగానే ఊహించి చెబితే రూ.కోటి బహుమతి” అనే సరికొత్త ఛాలెంజ్‌తో భారీ హైప్ మధ్య అక్టోబర్ 30న ప్రేక్షకుల ముందుకు వచ్చిన ఈ సినిమా ఎలా ఉంది? ప్రేక్షకులను ఏ మేరకు మెప్పించింది? అనేది ఈ రివ్యూలో చూద్దాం.

కథ
రానియా (జ్యోతి పూర్వజ్) అనే మహిళ జీవితంలో ఊహించని విధంగా ఓ పెద్ద ప్రమాదం జరుగుతుంది. ఆమెపై జరిగిన దాడి కారణంగా కోమాలోకి వెళుతుంది. అసలు ఆమె కోమాలోకి వెళ్లడానికి గల అసలు కారణమేంటి? ఆమె గతాన్ని ఎందుకు రహస్యంగా ఉంచింది? అనే ప్రశ్నలతో కథ వేగం పుంజుకుంటుంది. మరోవైపు, ఆర్టిఫిషియల్ ఇంటెలిజెన్స్ (AI) సహాయంతో మనిషి మెదడులో ప్రత్యేకమైన చిప్‌ను అమర్చి, మానవ సామర్థ్యాలను అసాధారణ స్థాయికి తీసుకెళ్లాలని సైంటిస్ట్ పూర్వజ్ (పూర్వాజ్) ఒక భారీ ప్రయోగం చేస్తుంటాడు. ఈ సైన్స్ ప్రయోగానికి, రానియా జీవితానికి ఉన్న సంబంధం ఏమిటి? ఈ క్రమంలో ఓ పోలీసు అధికారి ఈ కేసును ఇన్వెస్టిగేట్ చేయడం ప్రారంభిస్తాడు. రానియా గురించి ఒక్కొక్కరు ఒక్కోలా చెబుతుంటారు కొందరికి ఆమె ఓ నేరస్థురాలు, మరికొందరికి గూఢచారి, ఇంకొందరి దృష్టిలో రక్తపిశాచి! అసలు రానియా అసలు రూపం ఏంటి? ఈ రహస్యాలన్నింటికీ సమాధానం వెండితెరపైనే చూడాలి.

విశ్లేషణ: సినిమా ఎలా ఉందంటే?
సాధారణ క్రైమ్ థ్రిల్లర్ సినిమాలకు భిన్నంగా దర్శకుడు పూర్వజ్ ఈ చిత్రాన్ని ఒక డిఫరెంట్ సైన్స్ ఫిక్షన్ కాన్సెప్ట్‌తో తెరకెక్కించారు. సినిమా ప్రారంభంలోనే హీరోయిన్ చుట్టూ అల్లుకున్న మిస్టరీ ప్రేక్షకులను సీట్లకు కట్టేస్తుంది. ఒకే వ్యక్తి గురించి ఇన్ని వైవిధ్యమైన కోణాలు ఎందుకు వినిపిస్తున్నాయనే క్యూరియాసిటీ సినిమా అంతటా కొనసాగుతుంది. మనిషి మెదడులో చిప్ అమర్చి చేసే ప్రయోగాల చుట్టూ నడిచే కథనం కొత్త అనుభూతిని ఇస్తుంది. టెక్నాలజీని, క్రైమ్ థ్రిల్లర్ ఎలిమెంట్స్‌ను ముడిపెట్టిన తీరు ప్రశంసనీయం. అయితే, సైన్స్ ఫిక్షన్ నేపథ్యాన్ని ఇంకాస్త స్పష్టంగా, సామాన్యులకు కూడా సులభంగా అర్థమయ్యేలా తెరకెక్కించి ఉంటే సినిమా స్థాయి మరింత పెరిగేది. అయినప్పటికీ, రొటీన్ సినిమాలకు భిన్నంగా కొత్తదనాన్ని కోరుకునే ప్రేక్షకులకు ఈ చిత్రం మంచి అనుభూతిని ఇస్తుంది.

నటీనటులు
జ్యోతి పూర్వజ్ తన పాత్రకు పూర్తి న్యాయం చేశారు. ఎమోషనల్ సీన్స్‌లోనూ, యాక్షన్ సన్నివేశాల్లోనూ ఆమె నటన ఆకట్టుకుంటుంది. దర్శకుడిగా, హీరోగా ద్విపాత్రాభినయం చేసిన పూర్వజ్ తన అనుభవాన్ని తెరపై చక్కగా చూపించారు. చంద్రకాంత్ కొల్లు తదితరులు తమ పాత్రల పరిధిలో మెప్పించారు. సినిమాటోగ్రఫీ, ప్రొడక్షన్ డిజైన్ కథకు తగిన మూడ్‌ను క్రియేట్ చేశాయి. సైన్స్ ఫిక్షన్ వాతావరణాన్ని ప్రతిబింబించేలా చేసిన వీఎఫ్‌ఎక్స్ (VFX) పనితీరు బాగుంది. బ్యాక్‌గ్రౌండ్ మ్యూజిక్ (BGM) సన్నివేశాల్లో ఉత్కంఠను మరింత పెంచింది. ఎడిటింగ్ ఇంకాస్త క్రిస్పిగా ఉంటే బాగుండేది.

ప్లస్ పాయింట్లు:
సరికొత్త సైన్స్ ఫిక్షన్ కాన్సెప్ట్
బ్యాక్‌గ్రౌండ్ మ్యూజిక్ మరియు సినిమాటోగ్రఫీ
ఆసక్తికరమైన మలుపులు

మైనస్ పాయింట్లు:
కొన్ని సన్నివేశాల్లో కథనం నెమ్మదించడం
స్క్రీన్ ప్లేను మరింత బిగువుగా మలచాల్సి ఉంది

చివ‌రిగా రొటీన్ థ్రిల్లర్ సినిమాలకు భిన్నంగా కొత్త కాన్సెప్ట్‌తో వచ్చిన ‘కిల్లర్’ సినిమా సైన్స్ ఫిక్షన్ జోనర్ ఇష్టపడే ప్రేక్షకులను ఆకట్టుకుంటుంది.