Tax Deduction for EV Car | ఎలక్ట్రిక్‌ కారు కొంటే ఐటీ రాయితీ.. ఎంతో తెలుసా!

Tax Deduction for EV Car | రుణంపై ఎల‌క్ట్రిక్ కారు కొనుగోలు చేస్తే ఆదాయం ప‌న్ను చ‌ట్టం కింద ప‌న్ను మిన‌హాయింపు క్ల‌యిమ్ చేసుకోవ‌చ్చు.

Tax Deduction for EV Car | విద్యుత్ వాహ‌నాల వాడకాన్ని ప్రోత్స‌హించేందుకు కేంద్ర ప్ర‌భుత్వం ప‌న్ను మిన‌హాయింపులు క‌ల్పిస్తున్న‌ది. ఫేమ్‌-2 కింద ఇస్తున్న స‌బ్సిడీకి ఇది అద‌నం. ఒక‌వేళ మీరు రుణంపై ఎల‌క్ట్రిక్ కారు కొంటే ఈ డిస్కౌంట్‌ను పొందొచ్చు. బ్యాంకు లేదా ఆర్థిక సంస్థ‌ల రుణంతో ఎల‌క్ట్రిక్ కారు కొనుగోలు చేసే వారికి.. ఆ రుణంపై చెల్లించే వ‌డ్డీకి ప‌న్ను మిన‌హాయింపు ఇస్తామ‌ని 2019 బ‌డ్జెట్ ప్ర‌తిపాద‌న‌ల్లో కేంద్ర ప్ర‌భుత్వం ప్ర‌క‌టించింది. ఇందుకోసం ఆదాయం ప‌న్ను చ‌ట్టంలో 80ఈఈబీ సెక్ష‌న్‌ను కొత్త‌గా చేర్చింది కూడా. 2020-21 ఆర్థిక సంవ‌త్స‌రానికి కూడా ఈ ప‌న్ను మిన‌హాయింపు నిబంధ‌న వ‌ర్తిస్తుంది.

క్ల‌యిమ్‌లు ఎలా చేయాలంటే..

• 2019 ఏప్రిల్ ఒక‌టో తేదీ నుంచి 2023 మార్చి 31 లోపు ఎల‌క్ట్రిక్ వెహిక‌ల్స్ రుణాల‌కు ఈ డిడ‌క్ష‌న్ ల‌భిస్తుంది.
• 2020-21 నుంచి ఐటీ చ‌ట్టం 80ఈఈబీ సెక్ష‌న్ కింద ప‌న్ను మిన‌హాయింపు కోసం క్ల‌యిమ్ చేయొచ్చు.
• టాక్స్ డిడ‌క్ష‌న్ కోసం ఈవీ కారు కొనుగోలుదారు తాను రుణం తీసుకున్న ప‌న్ను చెల్లింపు దారు ఇంట‌రెస్ట్ సర్టిఫికెట్ స‌మ‌ర్పించాల్సి ఉంటుంది.
• ఈవీ కారు కొనుగోలు చేసిన ప‌న్ను చెల్లింపుదారులు ఐటీ రిట‌ర్న్స్ దాఖ‌లు చేయ‌డానికి ముందు త‌మ వ‌ద్ద టాక్స్ ఇన్‌వాయిస్‌, లోన్ డాక్యుమెంట్లు సిద్ధంగా పెట్టుకోవాలి.
• ఎల‌క్ట్రిక్ కారు కొనుగోలు చేయ‌డానికి తీసుకునే రుణం మీద రూ.1.5 ల‌క్షల వ‌ర‌కు వ‌డ్డీ చెల్లింపున‌కు ఐటీ చ‌ట్టంలోని 80ఈఈబీ సెక్ష‌న్ కింద ప‌న్ను రాయితీ ల‌భిస్తుంది.
• ఆ ఎల‌క్ట్రిక్ కార్ల‌ను వ్య‌క్తిగ‌త అవ‌స‌రాల‌కు, వ్యాపార ప్ర‌యోజ‌నాల‌కు వాడుకున్నా ఈ డిడ‌క్ష‌న్ క్ల‌యిమ్ చేసుకోవ‌చ్చు.

ఎవ‌రెవ‌రు ఈ రాయితీ పొందొచ్చంటే..

• వ్య‌క్తిగ‌త ప‌న్ను చెల్లింపు దారులు మాత్ర‌మే ఈ మిన‌హాయింపు పొందొచ్చు. మిగ‌తా టాక్స్ పేయ‌ర్ల‌కు ఈ నిబంధ‌న వ‌ర్తించ‌దు.
• అవిభాజ్య హిందూ కుటుంబం (హెచ్‌యూఎఫ్‌), భాగ‌స్వామ్య సంస్థ‌, ఒక అసోసియేష‌న్ స‌భ్యులు.. త‌దిత‌ర ఇత‌ర క్యాట‌గిరీ ప‌న్ను చెల్లింపు దారులు.. ఈవీ కారు కొనుగోలు చేసినా ఈ సెక్ష‌న్ కింద టాక్స్ డిడ‌క్ష‌న్ ల‌భించ‌దు.
• ఈవీ కారు కొనుగోలుదారులు ఆదాయం ప‌న్ను చ‌ట్టంలోని 80ఈఈబీ సెక్ష‌న్ కింద మాత్ర‌మే ప‌న్ను రాయితీ పొంద‌డానికి వీలుంది.
• తొలిసారి ఎల‌క్ట్రిక్ కారు కొనుగోలు చేసిన వ్య‌క్తి మాత్ర‌మే ఈ టాక్స్ డిడ‌క్ష‌న్ క్ల‌యిమ్ చేయొచ్చు.
• ఆర్థిక సంస్థ లేదా బ్యాంకింగేత‌ర ఆర్థిక సంస్థ నుంచి రుణం ద్వారా ఎల‌క్ట్రిక్ కారు కొనుగోలు చేసిన వారికే ప‌న్ను మిన‌హాయింపు ల‌భిస్తుంది.