Pre EMI | ప్రీ-ఈఎంఐ గురించి తెలుసా.. ఎప్పుడు వీటి అవసరం ఏర్పడుతుంది?

గృహ రుణాల కోసం ఆరా తీసినప్పుడు ప్రీ-ఈఎంఐలను వినే ఉంటారు. అయితే వీటి గురించి చాలా తక్కువ మందికే తెలిసి ఉంటుంది.

గృహ రుణాల కోసం ఆరా తీసినప్పుడు ప్రీ-ఈఎంఐలను (Pre EMI) వినే ఉంటారు. అయితే వీటి గురించి చాలా తక్కువ మందికే తెలిసి ఉంటుంది. అసలు ఈ ప్రీ-ఈఎంఐ రుణాలు అంటే ఏమిటి?.. వీటిని ఎవరు తీసుకుంటారు?.. ఎప్పుడు వీటి అవసరం ఏర్పడుతుంది?.. చెల్లింపుల విధానం ఎలా ఉంటుంది?.. అనేది ఇప్పుడు తెలుసుకుందాం.

• ఓపెన్‌ ప్లాట్‌లో ఇల్లు కట్టుకోవాలనుకునేవారు ప్రీ-ఈఎంఐ రుణాలను ఎక్కువగా తీసుకుంటారు.
• ఈ తరహా గృహ రుణాల్లో పూర్తయ్యే ఇంటి నిర్మాణాన్నిబట్టి బ్యాంకుల నుంచి విడుతలవారీగా నిధులు రుణగ్రహీతలకు విడుదలవుతాయి.
• తొలి పేమెంట్‌ అందుకున్న దగ్గర్నుంచి ఈ ప్రీ-ఈఎంఐలు మొదలవుతాయి. తీసుకున్న మొత్తాలకు కేవలం వడ్డీని చెల్లించడమే ఇందులో ఉంటుంది.
• ఇల్లు పూర్తయ్యేదాకా బ్యాంకుల నుంచి దశలవారీగా నిధులు వస్తూనే ఉంటాయి. ఎప్పుడైతే ఆగిపోతాయో అసలు ఈఎంఐలు మొదలవుతాయి.
• అప్పటిదాకా మీరు తీసుకున్న అసలుకు ఈ ప్రీ-ఈఎంఐల రూపంలో వడ్డీలను చెల్లిస్తూ ఉండాలి.
• ప్రీ-ఈఎంఐలు అనేవి పూర్తిగా గృహ రుణానికి సంబంధించిన వడ్డీ చెల్లింపులే. మీరు తీసుకున్న రుణం (ప్రిన్సిపల్‌ అమౌంట్‌)లో నయాపైసా కూడా చెల్లించినట్టు కాదు. అందుకే అసలు ఈఎంఐల కంటే ఈ చెల్లింపులు తక్కువ.
• మీకు ఏ వడ్డీరేటుకైతే సాధారణ గృహ రుణం లభిస్తుందో.. దాదాపు అదే వడ్డీరేటు ప్రకారమే ఈ ప్రీ-ఈఎంఐలుంటాయి. అయినప్పటికీ ముందే తెలుసుకోవడం ఉత్తమం. ఇక రోజువారీ లెక్కన వీటిని గణిస్తారు. అసలు ఈఎంఐలు మొదలయ్యేదాకా నెలనెలా వీటిని చెల్లించాల్సి ఉంటుంది.
• ప్రీ-ఈఎంఐలకు ఎటువంటి పన్ను ప్రయోజనాలుండవు. అసలు ఈఎంఐలు మొదలైనప్పుడే ట్యాక్స్‌ బెనిఫిట్స్‌ వర్తిస్తాయి. అలాగే ఈ ప్రీ-ఈఎంఐల ప్రభావం రుణగ్రహీత క్రెడిట్‌ స్కోర్‌పైనా ఏమాత్రం ఉండబోదు.