జీఎస్టీ ఎగవేత శిక్ష హేతుబద్ధం.. జైలు లేదా జరిమానా.. వీలైతే రెండూ: సీబీఐసీ

వస్తు, సేవల పన్ను (జీఎస్టీ)కు సంబంధించిన నేరాల్లో శిక్షలను జీఎస్టీ కౌన్సిల్‌ హేతుబద్ధం చేసింది. జైలు లేదా జరిమానా.. వీలైతే రెండూ ఉంటాయని ప్రకటించింది.

న్యూఢిల్లీ, అక్టోబర్‌ 9 : మునుపు జైలు, జరిమానా రెండూ ఉండేవి. కాగా, రూ.10 కోట్లకుపైగా పన్ను ఎగవేత కేసుల్లో జైలు శిక్ష ఐదేండ్లదాకా లేదా జరిమానా లేకుంటే రెండూ పడనున్నాయి. అలాగే రూ.5-10 కోట్ల కేసుల్లో రెండేండ్లదాకా జైలు లేదా జరిమానా లేకుంటే రెండూ ఉంటాయి. ఈ మేరకు గురువారం జరిగిన 57వ జీఎస్టీ కౌన్సిల్‌ సమావేశంలో నిర్ణయం తీసుకున్నట్టు పరోక్ష పన్నులు, కస్టమ్స్‌ కేంద్ర బోర్డు (సీబీఐసీ) తరచుగా అడిగే ప్రశ్నల్లో జవాబుగా తెలిపింది.

‘ఎవరికైనా శిక్ష పడితే జైలు తప్పనిసరేమీ కాదు’ అని వివరించింది. ఈ నిర్ణయాలు వచ్చే ఏడాది ఏప్రిల్‌ 1 నుంచి అమల్లోకి రానున్నాయి. కాగా, జీఎస్టీ ఎగవేత కేసుల్లో నేర విచారణకున్న పరిమితిని కోటి రూపాయల నుంచి రూ.5 కోట్లకు తాజా కౌన్సిల్‌ భేటీలో పెంచిన సంగతి విదితమే.