Starbucks | ప్రముఖ అంతర్జాతీయ కాఫీ షాప్.. స్టార్బక్స్ సీఈవోగా నియమితులైన లక్ష్మణ్ నర్సింహన్.. మహారాష్ట్రలోని పుణెలో జన్మించారు. పుణె యూనివర్సిటీలో గ్రాడ్యుయేషన్ పూర్తి చేసుకుని జర్మనీలో పీజీ, పెన్నిసెల్వేనియా యూనివర్సిటీలోని లౌడర్ ఇన్స్టిట్యూట్లో ఇంటర్నేషనల్ స్టడీస్, వార్టన్ స్కూల్లో బిజినెస్ అడ్మినిస్ట్రేషన్లో పీజీ పట్టా అందుకున్నారు.
సెర్చింజన్ `గూగుల్` సీఈవో సుందర్ పిచ్చాయ్, ఎలక్ట్రిక్ కార్ల తయారీ సంస్థ టెస్లా సీఈవో ఎలన్మస్క్, అమెరికా మాజీ అధ్యక్షుడు డొనాల్డ్ ట్రంప్ వంటి వారు వార్టన్ స్కూల్ సహ-విద్యార్థులు కావడం విశేషం. త్వరలో స్టార్బక్స్ సీఈవోగా బాధ్యతలు స్వీకరించనున్న లక్ష్మణ్ నర్సింహన్ ఈ పదవిలో ఉన్నంత వరకు వార్షిక వేతనం 1.3 మిలియన్ డాలర్లు, బేస్ శాలరీలో 200 శాతం సమానమైన క్యాష్ ఇన్సెంటివ్ అందుకుంటారు.
తన విద్యాభ్యాసం పూర్తి చేసుకున్న తర్వాత లక్ష్మణ్ నర్సింహన్.. మెకెన్సీ అండ్ కంపెనీలో చేరారు. అటుపై పెప్సికోలో 2012లో చేరిన నర్సింహన్.. లాటిన్ అమెరికా, యూరప్, సబ్-సహారా ఆఫ్రికా ప్రాంతాల ఆపరేషన్లు బాధ్యతలు నిర్వర్తించడంతో సంస్థళ చీఫ్ కమర్షియల్ ఆఫీసర్గా ప్రమోషన్ పొందారు. 2019 సెప్టెంబర్లో ఆంగ్లో-డచ్ మల్టీ నేషనల్ కన్జూమర్ గూడ్స్ కంపెనీ రెకిట్ట్లో చేరారు. కరోనా వేళ ఆరోగ్యం, హైజిన్ ( health and hygiene ) ఉత్పత్తుల విక్రయంలో ఆయన కీలక పాత్ర పోషించారు.
ప్రస్తుతం లండన్లో ఉన్న లక్ష్మణ్ నర్సింహన్ త్వరలో సియాటెల్కు షిఫ్ట్ అవుతారు. వచ్చేనెల ఒకటో తేదీ నుంచి ఇన్కమింగ్ సీఈవోగా బాధ్యతలు చేపడతారు. వచ్చే ఏడాది ఏప్రిల్ ఒకటో తేదీ నుంచి స్టార్బక్స్ డైరెక్టర్ల బోర్డులో సభ్యులుగా చేరతారు.