సూచీల్లో ఫెడ్‌ జోష్‌.. ఒక్క శాతానికి పైగా లాభపడిన ఇరు సూచీలు

దేశీయ స్టాక్‌ మార్కెట్ల వరుస నష్టాలకు బ్రేక్‌ పడింది. వచ్చే ఫెడ్‌ సమీక్షలో వడ్డీరేట్లను తగ్గించే అవకాశాలుండటంతోపాటు విదేశీ సంస్థాగత పెట్టుబడిదారులు భారీగా నిధులు కుమ్మరించడంతో సూచీలు కదంతొక్కాయి. లాభాల్లో ప్రారంభమైన సూచీలు చివరి వరకు అదే ట్రెండ్‌ను కొనసాగించాయి.

• సెన్సెక్స్‌ 1,022, నిఫ్టీ 320 పాయింట్ల లాభం
• రూ.5.5 లక్షల కోట్లు పెరిగిన మదుపరుల సంపద

ముంబై, నవంబర్‌ 26 : దేశీయ స్టాక్‌ మార్కెట్ల వరుస నష్టాలకు బ్రేక్‌ పడింది. వచ్చే ఫెడ్‌ సమీక్షలో వడ్డీరేట్లను తగ్గించే అవకాశాలుండటంతోపాటు విదేశీ సంస్థాగత పెట్టుబడిదారులు భారీగా నిధులు కుమ్మరించడంతో సూచీలు కదంతొక్కాయి. లాభాల్లో ప్రారంభమైన సూచీలు చివరి వరకు అదే ట్రెండ్‌ను కొనసాగించాయి. మధ్యాహ్నాం తర్వాత అంతర్జాతీయ మార్కెట్ల నుంచి వచ్చిన సానుకూల అంశాలు కూడా తోడవడంతోపాటు దేశీయ మదుపరులు కూడా కొనుగోళ్ల వైపు మొగ్గుచూపడంతో ఇరు సూచీలు ఒక్క శాతానికి పైగా బలపడ్డాయి. 30 షేర్ల ఇండెక్స్‌ సూచీ సెన్సెక్స్‌ తిరిగి 85 వేల పాయింట్ల మైలురాయిని తిరిగి అధిగమించగా, నిఫ్టీ కూడా 26 వేల పైకి తిరిగి చేరుకున్నది. చివరకు స్టాక్‌ మార్కెట్‌ ముగిసే సమయానికి సెన్సెక్స్‌ 1,022.50 పాయింట్లు లేదా 1.21 శాతం లాభపడి 85,609.51 వద్ద ముగిసింది. మరో సూచీ నిఫ్టీ సైతం 320.50 పాయింట్లు లేదా 1.24 శాతం అందుకొని 26,205.30 వద్ద స్థిరపడింది. కేవలం తన రికార్డు స్థాయికి పది పాయింట్ల దూరంలో నిలిచింది. సెప్టెంబర్‌ 27, 2024 నిఫ్టీ రికార్డు స్థాయి 26,277 పాయింట్లకు చేరుకున్న విషయం తెలిసిందే. దీంతో మదుపరుల సంపద రూ.5.5 లక్షల కోట్లకు పైగా పెరిగింది. బీఎస్‌ఈలో లిైస్టెన కంపెనీల మార్కెట్‌ క్యాపిటలైజేషన్‌ విలువ రూ.474. 87 లక్షల కోట్లకు చేరుకున్నది.

రిలయన్స్‌ @ 21 లక్షల కోట్లు

దేశీయ శ్రీమంతుడు ముకేశ్‌ అంబానీకి చెందిన రిలయన్స్‌ ఇండస్ట్రీస్‌ మరోసారి రూ.21 లక్షల కోట్ల మార్కెట్‌ క్యాపిటలైజేషన్‌ను అధిగమించింది. క్రితం వారంలో ఈ కీలక మైలురాయిని అధిగమించిన సంస్థ.. మళ్లీ బుధవారం రూ.21 లక్షల కోట్లను దాటింది. కంపెనీ షేరు ధర 1.99 శాతం ఎగబాకి రూ.1,569.75కి చేరుకున్నది. ఇంట్రాడేలో 2.12 శాతం ఎగబాకి 52 వారాల గరిష్ఠ స్థాయికి చేరుకున్న షేరు చివర్లో ఈ భారీ లాభాలను నిలుపుకోలేకపోయింది. దీంతో కంపెనీ మార్కెట్‌ విలువ రూ.21,24,259. 89 కోట్లుగా నమోదైంది. ఈ ఏడాది ఇప్పటి వరకు కంపెనీ షేరు 29 శాతం ఎగబాకినట్టు అయింది.

• బజాజ్‌ ఫిన్‌సర్వ్‌, బజాజ్‌ ఫైనాన్స్‌, టాటా స్టీల్‌ షేర్లు రెండు శాతానికి పైగా లాభపడ్డాయి.
• రిలయన్స్‌, టాటా మోటర్స్‌ ప్యాసింజర్‌ వెహికల్‌, యాక్సిస్‌ బ్యాంక్‌, సన్‌ఫార్మా, ఇన్ఫోసిస్‌, మారుతి, టెక్‌ మహీంద్రా, అల్ట్రాటెక్‌ సిమెంట్‌, ఎల్‌అండ్‌టీ, కొటక్‌ బ్యాంక్‌, అదానీ పోర్ట్స్‌, హెచ్‌డీఎఫ్‌సీ బ్యాంక్‌, ఎటర్నల్‌, టీసీఎస్‌, ఐసీఐసీఐ బ్యాంక్‌, బీఈఎల్‌, టైటాన్‌, ట్రెంట్‌, హెచ్‌సీఎల్‌ టెక్నాలజీ షేర్లు ఒక్క శాతానికి పైగా బలపడ్డాయి.
• వీటితోపాటు ఎన్‌టీపీసీ, పవర్‌గ్రిడ్‌, హెచ్‌యూఎల్‌, మహీంద్రాఅండ్‌మహీంద్రా, ఐటీసీ, ఎస్బీఐ షేర్లు లాభాల్లో ముగిశాయి.
• కానీ, భారతీ ఎయిర్‌టెల్‌, ఏషియన్‌ పెయింట్స్‌ షేర్లు నష్టపోయాయి.
• బీఎస్‌ఈ మిడ్‌క్యాప్‌, స్మాల్‌క్యాప్‌ ఇండెక్స్‌లు ఒక్క శాతానికి పైగా బలపడ్డాయి.
• రంగాలవారీగా మెటల్‌ సూచీ అత్యధికంగా 2.08 శాతం ఎగబాకింది. దీంతోపాటు ఆయిల్‌ అండ్‌ గ్యాస్‌ 1.81 శాతం, ఎనర్జీ 1.68 శాతం, క్యాపిటల్‌ గూడ్స్‌ 1.65 శాతం, సర్వీసెస్‌ 1.63 శాతం, పవర్‌ 1.59 శాతం, కమోడిటీస్‌ 1.58 శాతం చొప్పున పెరిగాయి.
• టెలికాం సూచీ నష్టపోయింది.

సూచీల ర్యాలీకి కారణాలు

• అమెరికా ఫెడరల్‌ రిజర్వు వడ్డీరేట్లను తగ్గించే అవకాశం
• అంతర్జాతీయ మార్కెట్లు పుంజుకోవడం
• క్రూడాయిల్‌ ధర తగ్గుముఖం పట్టడం
• విదేశీ సంస్థాగత మదుపరులు కొనుగోళ్లకు మొగ్గుచూపడం
• బ్లూచిప్‌ షేర్లు భారీగా లాభపడటం