Visit:
Tesla | గ్లోబల్ ఎలక్ట్రిక్ కార్ల తయారీ సంస్థ ‘టెస్లా’లో వైస్ ప్రెసిడెంట్‌గా ఉన్న భారత సంతతి అమెరికన్ శ్రీలా వెంకటరత్నం కంపెనీ నుంచి వైదొలిగారు. 2013 నుంచి సంస్థలో పలు హోదాల్లో సేవలందించారు. సుదీర్ఘ విరామం తర్వాత టెస్లా కంపెనీ నుంచి నిష్క్రమిస్తున్నట్లు తెలిపారు. కుటుంబంతోనూ, స్నేహితులతో సరదా గడిపేందుకు మాత్రమే తాను రాజీనామా చేస్తున్నట్లు తెలిపారు. ఆమె తన రాజీనామా లేఖను లింక్డిన్ లో పోస్ట్ చేశారు.
2013లో టెస్లాలో శ్రీలా వెంకటరత్నం చేశారు. తొలుత ఫైనాన్స్ ఆపరేషన్స్ డైరెక్టర్ గా కెరీర్ ప్రారంభించి.. తదుపరి సీనియర్ డైరెక్టర్ హోదా పొందారు. 2019 నుంచి 2024 వరకూ కంపెనీ వైస్ ప్రెసిడెంట్ గా ఉన్నారు. గత 11 ఏండ్లలో టెస్లాలో పలు హోదాల్లో సేవలందించారు. కొంత కాలం విరామం తీసుకున్న తర్వాత కొత్త అవకాశాల కోసం ప్రయత్నిస్తానని తెలిపారు.
శ్రీలా వెంకటరత్నం చేరిన తర్వాతే టెస్లా 700 బిలియన్ డాలర్ల సంస్థగా అవతరించింది. తన ప్రయాణంలో ఎన్నో విజయాలు సాధించానని తెలిపారు. తన సహచర ఉద్యోగుల సహకారాన్ని తానెప్పటికీ మరువలేనని పేర్కొన్నారు. ఈ ఏడాది ఏప్రిల్ లో ముగ్గురు ఎగ్జిక్యూటివ్ లు టెస్లాకు గుడ్ బై చెప్పారు. తాజాగా కంపెనీలో కీలక బాధ్యతలు నిర్వర్తిస్తున్న శ్రీలా వెంకటరత్నం రాజీనామా చేశారు. ఇప్పటి వరకూ కంపెనీలో ఉన్న వైస్ ప్రెసిడెంట్లుగా ఉన్న ఇద్దరిలో శ్రీలా వెంకటరత్నం ఒకరు.
