మెగా పబ్లిక్‌ ఇష్యూలకు జోష్‌.. నిబంధనలను సరళతరం చేసిన సెబీ

స్టాక్‌ మార్కెట్‌ రెగ్యులేటర్‌ సెబీ శుక్రవారం పలు కీలక సంస్కరణల్ని తీసుకొచ్చింది. ఇందులో భాగంగానే అతి భారీ సంస్థల కోసం ఇనీషియల్‌ పబ్లిక్‌ ఆఫర్ల (ఐపీవో) నిబంధనలను సరళతరం చేయాలని నిర్ణయించింది. సెబీ చీఫ్‌ తుహిన్‌ కాంత పాండే నేతృత్వంలో జరిగిన బోర్డు సమావేశంలో పలు ప్రతిపాదనలకు ఆమోదముద్ర పడింది.

• కనీస పబ్లిక్‌ ఆఫర్‌ సైజ్‌ తగ్గింపు
• పబ్లిక్‌ షేర్‌హోల్డింగ్‌ రూల్స్‌ సడలింపు

ముంబై, సెప్టెంబర్‌ 12 : స్టాక్‌ మార్కెట్‌ రెగ్యులేటర్‌ సెబీ శుక్రవారం పలు కీలక సంస్కరణల్ని తీసుకొచ్చింది. ఇందులో భాగంగానే అతి భారీ సంస్థల కోసం ఇనీషియల్‌ పబ్లిక్‌ ఆఫర్ల (ఐపీవో) నిబంధనలను సరళతరం చేయాలని నిర్ణయించింది. సెబీ చీఫ్‌ తుహిన్‌ కాంత పాండే నేతృత్వంలో జరిగిన బోర్డు సమావేశంలో పలు ప్రతిపాదనలకు ఆమోదముద్ర పడింది. ఇవి రిలయన్స్‌ జియో ఇన్ఫోకామ్‌, నేషనల్‌ స్టాక్‌ ఎక్సేంజ్‌ (ఎన్‌ఎస్‌ఈ) వంటి బడా ఐపీవోలకు కలిసిరానున్నాయి. క్యాపిటల్‌ మార్కెట్స్‌ బలోపేతానికి, దేశ, విదేశీ పెట్టుబడులను ఆకర్షించడానికి, మదుపరుల ప్రయోజనాలకు పెద్దపీట వేయడానికి వీలుగా కొత్త మార్గదర్శకాలకూ లైన్‌క్లియరైంది.

ఇదీ సంగతి..

మినిమం పబ్లిక్‌ షేర్‌హోల్డింగ్‌ నియమాలను అందుకోవడానికున్న గడువును 10 ఏండ్లదాకా సెబీ పొడిగించింది. ఈ మేరకు బోర్డు సమావేశం అనంతరం పాండే విలేకరులకు తెలియజేశారు. ఇక కొత్త విధివిధానాలు అమలైతే రూ.50,000 కోట్లు-లక్ష కోట్ల రూపాయల మార్కెట్‌ క్యాపిటలైజేషన్‌తో వచ్చే కంపెనీలకు ప్రస్తుతమున్న 10 శాతం కాకుండా 8 శాతం ఈక్విటీనే అవసరం. అలాగే 25 శాతం మినిమం పబ్లిక్‌ షేర్‌హోల్డింగ్‌ను మూడేండ్లకు బదులుగా ఐదేండ్లలోపు అందుకునే వెసులుబాటు కలగనున్నది. లక్ష కోట్ల రూపాయలకుపైగా మార్కెట్‌ క్యాపిటలైజేషన్‌ ఉన్న సంస్థలకు తప్పనిసరి ఆఫర్‌ రిక్వైర్‌మెంట్స్‌ 5 శాతం నుంచి 2.75 శాతానికి తగ్గించారు. రూ.5 లక్షల కోట్లకుపైగా మార్కెట్‌ క్యాపిటలైజేషన్‌ ఉంటే 2.5 శాతం వాటా విక్రయిస్తే సరిపోతుంది. వీటికి 25 శాతం మినిమం పబ్లిక్‌ షేర్‌హోల్డింగ్‌ నిబంధన అమలుకు పదేండ్లదాకా గడువిచ్చారు. ఇప్పుడు 5 ఏండ్లుగానే ఉన్నది. దీంతో మొదట చిన్న ఐపీవోలతోనూ బడా సంస్థలు స్టాక్‌ మార్కెట్లలోకి ప్రవేశించే వీలు దొరుకుతున్నది. కాగా, ఐపీవోలో రూ.250 కోట్లకుపైగా కేటాయింపుల కోసం అనుమతి ఉన్న యాంకర్‌ ఇన్వెస్టర్ల సంఖ్యను పెంచాలని కూడా సెబీ ఈ సందర్భంగా నిర్ణయించింది. ఇదిలా ఉంటే ప్రతినెలా దేశంలోకి వందమంది విదేశీ పోర్ట్‌ఫోలియో మదు పరులు వస్తున్నట్లు సెబీ తెలిపింది.

• పెద్ద కంపెనీల కోసం మినిమం పబ్లిక్‌ ఆఫర్‌ పరిమాణం తగ్గింపు. కనీస పబ్లిక్‌ షేర్‌హోల్డింగ్‌ నిబంధనల్ని అందుకోవడానికి మరింత సమయం.
• పబ్లిక్‌ ఇష్యూలో యాంకర్‌ ఇన్వెస్టర్ల కేటాయింపుల్ని 33 శాతం నుంచి 40 శాతానికి పెంపు. షేర్‌హోల్డర్‌ అప్రూవల్‌ రిక్వైర్‌మెంట్స్‌ కోసం పరిమితుల సడలింపు.
• సెంట్రల్‌ బ్యాంకులు, సావరిన్‌ వెల్త్‌ ఫండ్స్‌, రెగ్యులేటెడ్‌ గ్లోబల్‌ కంపెనీల వంటి విశ్వసనీయ విదేశీ మదుపరులకు ఇకపై సింగిల్‌-విండో క్లియరెన్స్‌లు.
• ఇంటర్నేషనల్‌ ఫైనాన్షియల్‌ సర్వీసెస్‌ సెంటర్లలో రిటైల్‌ స్కీములను ఇక విదేశీ పోర్ట్‌ఫోలియో ఇన్వెస్టర్లుగా నమోదు చేసుకోవచ్చు.
• సడలించిన నిబంధనలతో అక్రిడిటెడ్‌ ఇన్వెస్టర్ల కోసం ప్రత్యేకంగా ఓ కొత్త ప్రత్యామ్నాయ ఇన్వెస్ట్‌మెంట్‌ ఫండ్స్‌ విభాగం.
• అక్రిడిటెడ్‌ ఇన్వెస్టర్ల కోసం కనీస పెట్టుబడి పరిమితిని రూ.70 కోట్ల నుంచి రూ.25 కోట్లకు తగ్గింపు.
• ఈక్విటీగా రియల్‌ ఎస్టేట్‌ ఇన్వెస్ట్‌మెంట్‌ ట్రస్టు (రీట్‌)ల వర్గీకరణ. ఇన్విట్స్‌ మాత్రం హైబ్రిడ్‌గానే ఉంటాయి.
• ద్వితీయ, తృతీయ శ్రేణి నగరాలు, పట్టణాల నుంచీ పెట్టుబడులను ప్రోత్సహించేలా మ్యూచువల్‌ ఫండ్‌ డిస్ట్రిబ్యూటర్లకు 1 శాతం ప్రోత్సాహకాలు. మహిళా ఇన్వెస్టర్ల పెట్టుబడులపై అదనపు కమీషన్లు.
• ఇన్వెస్ట్‌మెంట్‌ అడ్వైజర్లు, రిసెర్చ్‌ అనలిస్టులు, మార్కెట్‌ ఇన్‌ఫ్రాస్ట్రక్చర్‌ ఇన్‌స్టిట్యూషన్ల కోసం చేసిన సవరణలకు ఆమోదం. రిజిస్ట్రార్ల కోసం రెగ్యులేటరీ ఫ్రేమ్‌వర్క్‌ సమీక్ష.
• ఈక్విటీ క్యాష్‌ సెగ్మెంట్‌లో క్లోజింగ్‌ యాక్షన్‌ సెషన్‌ పరిచయాన్ని ప్రతిపాదిస్తూ తెచ్చిన కన్సల్టేషన్‌ పేపర్‌పై పబ్లిక్‌ కామెంట్స్‌కున్న గడువు ఈ నెల 19దాకా పొడిగింపు.