రియల్‌ జోరు.. రాబడి హోరు నెలకు 1000 కోట్లు

• తెలంగాణలో భారీగా పెరిగిన రిజిస్ట్రేషన్ల రాబడి
• డిసెంబర్‌ నాటికి ఆల్‌టైమ్‌ రికార్డు ఆదాయం నమోదు
• సిరులు కురిపిస్తున్న స్టాంపులు రిజిస్ట్రేషన్ల శాఖ
• ప్రభుత్వ చర్యలతో ప్రజలకు భారీగా పెరిగిన ఆదాయం
• ప్రభుత్వ ప్రణాళికలతో రాష్ట్రంలో రియల్‌ బూమ్‌
• ప్రాజెక్టులు, సంస్కరణలతో భూముల ధరలకు రెక్కలు
• కరోనా కల్లోలాన్నీ తట్టుకొని నిలబడిన రియల్‌ రంగం

‘ప్రభుత్వాలు ముందుగా ప్రజల ఆదాయం పెంచాలి.. ఆ తర్వాతే ఖజానా నిండటం గురించి ఆలోచించాలి’.. పరిపాలన గురించి ఆర్థిక శాస్త్రవేత్తలు తరచూ చెప్పే మాట ఇది. తెలంగాణ ప్రభుత్వం దీనిని వందశాతం అమలుచేసింది. రాష్ర్టావిర్భావం తర్వాత అన్నిరంగాల్లో దీర్ఘకాల ప్రణాళికలు అమలుచేసి సంపదను సృష్టించింది. ప్రజల ఆదాయాన్ని పెంచింది. ముఖ్యంగా రాష్ట్రంలో హైదరాబాద్‌సహా అన్ని జిల్లాల్లో రియల్‌బూమ్‌ బాగా పెరిగింది. స్టాంపులు, రిజిస్ట్రేషన్ల శాఖ నెలనెలా వెయ్యి కోట్లకు పైగానే ఆదాయాన్ని ఆర్జిస్తున్నది.

రిజిస్ట్రేషన్ల ఆదాయ వివరాలు

2019-207,061
2020-215,260
2021-226,250 మొదటి 9 నెలలు

హైదరాబాద్‌, నవంబర్‌ 24, (నమస్తే తెలంగాణ): ‘తెలంగాణ రాష్ట్రం ఏర్పడితే రియల్‌ ఎస్టేట్‌ రంగం పడిపోతుంది. ఇతర ఆదాయ వనరులు కూడా తగ్గిపోయి రాష్ట్రం మనుగడ కష్టమౌతుంది’.. ఇదీ తెలంగాణ ఉద్యమ సమయంలో సమైక్యవాదుల నుంచి బలంగా వినిపించిన వాదన. వీరికి కొంతమంది తెలంగాణ నేతలూ వంతపాడారు. వారందరి కండ్లు బైర్లు కమ్మేలా, నోర్లు మూతపడేలా తెలంగాణ రాష్ట్రంలో రియల్‌ ఎస్టేట్‌ రంగం దూసుకపోతున్నది. ప్రస్తుతం ఈ రంగంలో హైదరాబాద్‌ నగరం దేశంలోనే అగ్రగ్రామిగా నిలిచింది. ఢిల్లీ, చెన్నై , కోల్‌కతా, పుణె, అహ్మదాబాద్‌ కంటే హైదరాబాద్‌లో చదరపు అడుగు ధర ఎక్కువ. గతేడాది కరోనా కాలంలో దేశవ్యాప్తంగా రియల్‌ రంగం కుదేలైనా తెలంగాణలో మాత్రం ఆ ప్రభావం నామమాత్రమే. ఎలాంటి పరిస్థితుల్లోనూ తొణకక, బెణకక స్థిరాస్తి క్రయవిక్రయాల హోరు అప్రతిహతంగా దూసుకుపోతున్నది. రిజిస్ట్రేషన్ల ద్వారా ఖజానాకు కాసుల వర్షం కురిపిస్తున్నది.

ఆల్‌ టైమ్‌ రికార్డు బద్దలు

రిజిస్ట్రేషన్ల ఆదాయంలో గత ఆర్థిక సంవత్సరం రికార్డును ఈ ఆర్థిక సంవత్సరంలో 9 నెలలకే అధిగమించింది. మరో పదిహేను రోజుల్లో తెలంగాణ రా్రష్ట్రం ఏర్పాటు తర్వాత ఆల్‌ టైమ్‌ రికార్డులను బద్దలు కొట్టబోతున్నది. 2020-21లో రిజిస్ట్రేషన్లపై రూ.5,260 కోట్ల ఆదాయం రాగా, ఈ సంవత్సరంలో ఇప్పటికే రూ.6,600 కోట్ల ఆదాయాన్ని ఆర్జించింది. మరో 15 రోజుల్లో రూ.7,000 కోట్లు దాటుతుందని అధికారులు అంచన వేస్తున్నారు. రాష్ట్రం వచ్చిన తర్వాత 2019-20లో అత్యధికంగా రూ.7061 కోట్లు ఆర్జించింది. ఇప్పుడు ఈ రికార్డులను కూడా బద్దలుకొట్టబోతున్నది. స్టాంపులు అండ్‌ రిజిస్రేష్టన్ల శాఖ గత ఐదు నెలల నుంచి వెయ్యి కోట్లకు తగ్గకుండా ఆర్జించడం అనూహ్యమని ఆ శాఖ ఉన్నతాధికారి ఒకరు వ్యాఖ్యానించారు. గత జూలై ఒక్క నెలలోనే రూ.1,200 కోట్ల రాబడితో రికార్డు సృష్టించినట్టు వెల్లడించారు.

రాష్ట్రం మొత్తం రియల్‌ బూమ్‌

• ఉమ్మడి రాష్ట్రంలో అభివృద్ధి అంటే కేవలం ఒకటిరెండు పరిశ్రమల స్థాపనే. అదికూడా హైదరాబాద్‌ కేంద్రంగా జరిగింది. దీంతో రాజధానిలో మాత్రమే భూముల విలువ పెరిగింది. తెలంగాణ రాష్ట్రం ఏర్పడిన తర్వాత సీఎం కేసీఆర్‌ నిర్ణయాలతో రాష్ట్రవ్యాప్తంగా సమానంగా అభివృద్ధి జరుగుతున్నది. రియల్‌ఎస్టేట్‌ రంగం అనూహ్య వృద్ధి సాధించింది. ప్రతి 15 కిలోమీటర్లకు ఒక పెట్టుబడి ఆకర్షక కేంద్రం తయారైంది. జిల్లా కేంద్రం/ మండల కేంద్రం/ కలెక్టరేట్‌/ రిజర్వాయర్‌/ యూనివర్సిటీ/ ఇండస్ట్రియల్‌ కారిడార్‌.. ఇలా రాష్ట్రవ్యాప్తంగా సగటున 15-20 కిలోమీటర్లకు ఒక ‘రియల్‌ సెంటర్‌’ వెలిసింది. దీంతో ఏడేండ్లలో భూముల విలువ అమాంతం పెరిగిపోయింది.
• ఒకప్పుడు పడావు పడిన తెలంగాణ భూములు మిషన్‌ కాకతీయ, కాళేశ్వరం తదితర సాగునీటి ప్రాజెక్టులతో ఇప్పుడు బంగారు పంటలు పండిస్తున్నాయి. దీంతో వ్యవసాయ భూముల ధరలు మూడునాలుగు రెట్లు పెరిగాయి. పదిరెట్లు పెరిగిన ప్రాంతాలు కూడా ఉన్నాయి.
• టీఎస్‌ఐపాస్‌, బీపాస్‌ వంటి విప్లవాత్మక సంస్కరణలతో రాష్ర్టానికి పెట్టుబడులు వెల్లువెత్తాయి. పరిశ్రమలను హైదరాబాద్‌కే పరిమితం చేయకుండా రాష్ట్రవ్యాప్తంగా విస్తరించేలా ప్రభుత్వం చర్యలు తీసుకున్నది. ఇందుకోసం ప్రత్యేకంగా ఇండస్ట్రియల్‌ కారిడార్లను, క్టస్లర్లను, పారిశ్రామిక పార్క్‌లను ఏర్పాటుచేయటంతో వాటి చుట్టూ భూముల ధరలకు రెక్కలు వచ్చాయి.
• రాష్ర్టానికి గుండెకాయగా ఉన్న ఐటీ పరిశ్రమ హద్దులను ప్రభుత్వం చెరిపివేసింది. ఒకప్పుడు హైదరాబాద్‌కే పరిమితమైన ఈ పరిశ్రమ ఇప్పుడు ఖమ్మం, వరంగల్‌, కరీంనగర్‌, సిద్దిపేట, నిజామాబాద్‌, మహబూబ్‌నగర్‌ వంటి జిల్లా కేంద్రాలకు తరలివెళ్లింది. పెట్టుబడులు పెరిగి స్థలాల విలువ ఎగబాకింది.
• పాలనా సంస్కరణల్లో భాగంగా చేపట్టిన కొత్త జిల్లాలు, రెవెన్యూ డివిజన్లు, మండలాల ఏర్పాటు, సమీకృత కలెక్టరేట్ల నిర్మాణంతో రియల్‌ ఎస్టేట్‌ రంగంలో కొత్త శకం మొదలైంది. దాదాపు ప్రతి 15-20 కిలోమీటర్లకు ఒక మండల కేంద్రం లేదా జిల్లా కేంద్రం వచ్చింది. ఫలితంగా అనేక వెంచర్లు వెలిసి భూముల ధరలు పెరిగాయి.
• రూ.1,000 కోట్లకుపైగా వెచ్చించి యాదా ద్రి ఆలయం అభివృద్ధి చేయడం ద్వారా యాదగిరి గుట్ట చుట్టూ సుమారు 30 కిలోమీటర్ల మేర భూముల విలువ పెరిగింది.