టాటా వారసుడిగా నోయల్‌

టాటా గ్రూపు గౌరవ చైర్మన్‌ రతన్‌ టాటా వారసుడిగా నోయల్‌ టాటా నియమితులయ్యారు. రతన్‌ టాటా సవతి తల్లి కుమారుడైన నోయల్‌ టాటా..టాటా ట్రస్ట్‌ తదుపరి చైర్మన్‌గా ఎంపికయ్యారు. 67 ఏండ్ల వయస్సు కలిగిన నోయల్‌ టాటా సరైన వ్యక్తి అని టాటా సన్స్‌ బోర్డు సమావేశమై ఈ నిర్ణయం తీసుకున్నది.

• టాటా ట్రస్ట్‌ చైర్మన్‌గా నియామకం

ముంబై, అక్టోబర్‌ 11: టాటా గ్రూపు గౌరవ చైర్మన్‌ రతన్‌ టాటా వారసుడిగా నోయల్‌ టాటా నియమితులయ్యారు. రతన్‌ టాటా సవతి తల్లి కుమారుడైన నోయల్‌ టాటా..టాటా ట్రస్ట్‌ తదుపరి చైర్మన్‌గా ఎంపికయ్యారు. 67 ఏండ్ల వయస్సు కలిగిన నోయల్‌ టాటా సరైన వ్యక్తి అని టాటా సన్స్‌ బోర్డు సమావేశమై ఈ నిర్ణయం తీసుకున్నది. ప్రస్తుతం నోయల్‌..టాటా గ్రూపునకు చెందిన రిటైల్‌ బిజినెస్‌ను చూసుకుంటున్నారు. ఉప్పు నుంచి సాఫ్ట్‌వేర్‌ వరకు వ్యాపార సామ్రాజ్యాన్ని విస్తరించిన రతన్‌ టాటా బుధవారం అర్ధరాత్రి మరణించిన విషయం తెలిసిందే.

దీంతో టాటా గ్రూపు కొత్త చైర్మన్‌ ఎవర్ని ఎంపిక చేసేదానిపై శుక్రవారం ముంబైలోని ప్రధాన కార్యాలయంలో జరిగిన సమావేశంలో బోర్డు ఏకగ్రీవంగా నోయల్‌ను ఎంపిక చేసింది. ఆయన నియామకం వెంటనే అమలులోకి రానున్నట్లు పేర్కొంది. ఈ సందర్భంగా నోయల్‌ టాటా మాట్లాడుతూ..టాటా గ్రూపు వ్యవస్థాపకుల వారసత్వాన్ని కొనసాగించడానికి సిద్ధంగా ఉన్నానని, శతాబ్దం క్రితం ప్రారంభమైన టాటా గ్రూపు అంచలంచెలుగా ఎదుగుతూ లక్షలాది మందికి ఉపాధిని కల్పిస్తున్నదన్నారు. ఇంతటి పెద్ద వ్యాపార సామ్రాజ్యాన్ని కొనసాగించడంతోపాటు దాతృత్వ కార్యక్రమాలకు భంగం వాటిళ్లకుండా తగిన చర్యలు తీసుకుంటానని చెప్పారు.

నోయల్‌ టాటా బయోడేటా

• బ్రిటన్‌లోని ససెక్స్‌ యూనివర్సిటీ నుంచి పట్టా పొందిన నోయల్‌..ఇన్‌సీడ్‌ నుంచి ఇంటర్నేషనల్‌ ఎగ్జిక్యూటివ్‌ ప్రొగ్రాం చేశారు.
• టాటా గ్రూపుతో ఆయనకు 40 ఏండ్లకు పైగా అనుబంధం ఉన్నది.
• ఆగస్టు 2010 నుంచి నవంబర్‌ 2021 వరకు టాటా ఇంటర్నేషనల్‌ లిమిటెడ్‌ ఎండీగా విధులు నిర్వహించారు. ఆయన సారథ్యంలో సంస్థ టర్నోవర్‌ 500 మిలియన్‌ డాలర్ల నుంచి 3 బిలియన్‌ డాలర్లకు చేరుకున్నది.
• అంతకుముందు ఆయన ట్రెంట్‌ లిమిటెడ్‌ ఎండీ, చైర్మన్‌గా విధులు నిర్వహిస్తున్నారు. 1998లో ఒక్క స్టోర్‌తో ప్రారంభమైన ట్రెంట్‌ ప్రస్తుతం 700 స్టోర్లకు విస్తరించింది.
• ఇప్పటికే ఆయన రతన్‌ టాటా ట్రస్ట్‌తోపాటు అనుబంధ ట్రస్టులు, దొరాబ్జీ టాటా ట్రస్ట్‌-అనుబంధ ట్రస్టుల్లో డైరెక్టర్‌గా విధులు నిర్వహిస్తున్నారు.