కొత్త ఈ-కామర్స్‌ రూల్స్‌

కేంద్ర ప్రభుత్వం ఈ-కామర్స్‌ వినియోగదారుల రక్షణ నిబంధనలు-2020ని సవరించింది. ధరల్లో పారదర్శకత దగ్గర్నుంచి డార్క్‌ ప్యాటర్న్స్‌ కట్టడిదాకా అన్ని రూల్స్‌ను కఠినతరం చేసినట్టు గురువారం వినియోగదారుల వ్యవహారాల శాఖ తెలియజేసింది. ఈ క్రమంలోనే నూతన కన్జ్యూమర్‌ ప్రొటెక్షన్‌ (ఈ-కామర్స్‌) అమెండ్‌మెంట్‌ రూల్స్‌-2026 వచ్చే ఏడాది జనవరి 1 నుంచి అమల్లోకి రానున్నాయని ఓ ప్రకటనలో తెలిపింది. నానాటికీ ఆన్‌లైన్‌ షాపింగ్‌ విస్తృతమవుతున్న నేపథ్యంలో అమాయక కస్టమర్లను కేటుగాళ్లు నిండా ముంచుతున్న విషయం తెలిసిందే.

• వచ్చే ఏడాది జనవరి నుంచి అమలు

న్యూఢిల్లీ, సెప్టెంబర్‌ 10: కేంద్ర ప్రభుత్వం ఈ-కామర్స్‌ వినియోగదారుల రక్షణ నిబంధనలు-2020ని సవరించింది. ధరల్లో పారదర్శకత దగ్గర్నుంచి డార్క్‌ ప్యాటర్న్స్‌ కట్టడిదాకా అన్ని రూల్స్‌ను కఠినతరం చేసినట్టు గురువారం వినియోగదారుల వ్యవహారాల శాఖ తెలియజేసింది. ఈ క్రమంలోనే నూతన కన్జ్యూమర్‌ ప్రొటెక్షన్‌ (ఈ-కామర్స్‌) అమెండ్‌మెంట్‌ రూల్స్‌-2026 వచ్చే ఏడాది జనవరి 1 నుంచి అమల్లోకి రానున్నాయని ఓ ప్రకటనలో తెలిపింది. నానాటికీ ఆన్‌లైన్‌ షాపింగ్‌ విస్తృతమవుతున్న నేపథ్యంలో అమాయక కస్టమర్లను కేటుగాళ్లు నిండా ముంచుతున్న విషయం తెలిసిందే. అధిక ధరలు వసూలు చేయడం, నాసిరకం వస్తూత్పత్తులను అంటగట్టడం, ఒకటి చూపించి మరొకటి పంపడం, రిటర్న్‌-రిఫండ్‌కు ఇబ్బందులు పెట్టడం వంటివి తరచూ చూస్తూనే ఉన్నాం. దీంతోనే వినియోగదారుల రక్షణార్థం కొత్త రూల్స్‌ను తెచ్చామని కేంద్ర ప్రభుత్వ వర్గాలు చెప్తున్నాయి.

సవరించిన నిబంధనల ప్రకారం..

• ఏదైనా వస్తూత్పత్తి ధర తగ్గిందని ప్రకటించినప్పుడు.. దాని మునుపటి ధర, ప్రస్తుత ధరను తప్పక ఈ-కామర్స్‌ సంస్థలు పేర్కొనాలి.
• ఉత్పత్తి వినియోగానికి సంబంధించి గడువు తేదీలను దానిపై తప్పక ముద్రించాలి.
• రిటర్న్‌-రిఫండ్‌కు సంబంధించిన షరతులు, వారంటీ, డెలివరీ, పేమెంట్‌ వివరాలు వినియోగదారులకు తెలిసేలా ఉంచాలి.
• విదేశాల నుంచి దిగుమతి చేసుకున్న వస్తువులపై అవి ఏ దేశం నుంచి వచ్చాయోనన్న సమాచారం ఉండాలి.
• కస్టమర్ల వివరాలను లేదా వారి వ్యక్తిగత సమాచారాన్ని ఈ-కామర్స్‌ సంస్థలు దుర్వినియోగం చేయరాదు.
• ప్రత్యేకమైన పరిస్థితుల్లో తప్ప ఈ-కామర్స్‌ సంస్థలు కస్టమర్ల నుంచి బండిల్‌ ఫీజులను వసూలు చేయకూడదు.
• ఆన్‌లైన్‌లో దేనిగురించైనా వినియోగదారులు వెతుకుతున్నప్పుడు ఈ-కామర్స్‌ సంస్థలు వారిని తప్పుదోవ పట్టించరాదు.
• పెయిడ్‌ లేదా స్పాన్సర్డ్‌ లిస్టింగ్స్‌ను కస్టమర్లు గుర్తించేలా ఈ-కామర్స్‌ కంపెనీలు చర్యలు తీసుకోవాలి.
• డార్క్‌ ప్యాటర్న్స్‌ నియంత్రణ, నివారణపై 2023లో ఇచ్చిన మార్గదర్శకాలను ఈ-కామర్స్‌ సంస్థలు పాటించాలి.
• వినియోగదారుల ఫిర్యాదుల పరిష్కారంలో నిబద్ధతతో వ్యవహరించాలి.
• నేషనల్‌ కన్జ్యూమర్‌ హెల్ప్‌లైన్‌ (ఎన్‌సీహెచ్‌) బాధ్యతల్లో ప్రతి ఈ-కామర్స్‌ సంస్థ భాగమవ్వాలి.