దేశీ పుత్తడిలో 86% దిగుమతులే డబ్ల్యూజీసీ రిపోర్ట్‌

హైదరాబాద్‌, డిసెంబర్‌ 9: గత నాలుగేండ్లకాలంలో భారత్‌ మార్కెట్లోకి జరిగిన బంగారం సరఫరాల్లో 86 శాతం దిగుమతులే ఉన్నాయని వరల్డ్‌ గోల్డ్‌ కౌన్సిల్‌ (డబ్ల్యూసీజీ) నివేదిక తెలిపింది. పుత్తడిపై అధిక సుంకాలు విధించినప్పటికీ, 2016-2020 మధ్యకాలంలో దిగుమతులు పెరిగాయన్నది. 2012లో బంగారంపై దిగుమతి సుంకాల్ని తొలిసారిగా పెంచినప్పటి నుంచి 2020 వరకూ భారత్‌..ఏడాదికి సగటున 730 టన్నుల చొప్పున మొత్తం 6,581 టన్నుల దిగుమతులు జరిగాయని డబ్ల్యూసీజీ ‘బులియన్‌ ట్రేడ్‌ ఇన్‌ ఇండియా’ నివేదికలో వెల్లడించింది.

నివేదిక వివరాలు:

• 2020లో 377 టన్నుల బంగారం..గోల్డ్‌ బార్స్‌, గోల్డ్‌ డోర్‌ (రిఫైన్‌ చేయాల్సిన ముడి ఖనిజం)ను భారత్‌ దిగుమతి చేసుకొంది
• మొత్తం 30 దేశాల నుంచి దిగుమతులు జరగ్గా, 55 శాతం దిగుమతులు స్విట్జర్లాండ్‌ (44 శాతం), యూఏఈ (11 శాతం) నుంచి వచ్చాయి.
• పుత్తడి రిఫైనింగ్‌కు ప్రభుత్వం ప్రకటించిన ప్రోత్సాహకాల ఫలితంగా ఈ మధ్యకాలంలో గోల్డ్‌ డోర్‌ దిగుమతులు అధికమయ్యాయి
• 2012లో 3 రిఫైనరీలు ఉండగా, 2020కల్లా వాటి సంఖ్య 32కు పెరిగింది.
• గత ఐదేండ్లలో మొత్తం పుత్తడి దిగుమతుల్లో గోల్డ్‌ డోర్‌ 30 శాతం మేర ఉంది